Welcome to our world: 2015

2015年12月25日星期五

2015.11 {Day 5｝福岡[秋] - 御船山遊 (蝸牛先生番外篇)

旅館阿久根的朝早，訓醒咯，說好朝早七點就食早餐，我都唔敢賴床了。出到去，發現原來搞錯，係七點半先真，咁我唯有番房，然後準備去浸溫泉，去到房外的溫泉，開門發出嗰把「女人尖叫聲」，點知驚動了叔叔，即刻衝出嚟話朝早冇得浸呢，睇嚟我又闖禍了，真係難為呢家人，服侍我呢隻奀皮的蝸牛仔。

之後就食早餐啦，口味極清新，但一樣能刺激味蕾。

佢嘅四小碟，伴一支貎似麻油的甜汁任倒，無論邊一碟，加左汁之後都提升。佢個蛋花湯亦好好飲。同樣重要係，佢個白飯配上脆脆嘅紫菜已經好好食，簡簡單單都可以咁好，估佢唔到。

日本高水準嘅食肆，唔單止提供好味嘅嘢，更加係用你估唔到嘅形態呈現畀你，更加有令你難忘嘅味道，食完某一碟，若干年後都記得個味道，就係因為獨一無二，第二度食唔番，或許咁樣先係高嘅境界。

呢間旅館有趣之處，係一位估計超級八旬的伯伯主理傳統鄉土料理，感覺好傳統，但相信佢亦放咗唔少創意，至少好多烹調方式係蝸牛仔未見過，傳統、創意能夠融為一體，真係大師級先做到。

其實旅館阿久根主人一家幾乎完全不懂英文，貎似小丸子爺爺嘅男主人廚藝高超，但直頭一個英文字都唔識講，都會戰戰兢兢咁出嚟招呼我。一對公公婆婆，加上佢哋的兒子，將人生嘅全部本領，用嚟招呼只留一天的客人，這種真誠，打動了我呢個客人，此行，真係獲益良多。

去到九點幾，我要離開旅館咯，佢地一家人出嚟同我影相送別，大家都好開心，婆婆更話會學多啲英文。日本人嗰種投入、毅力同堅持，真係值得學習。

離開柳川，下一站番去天神同博多逛一陣，然後搭車去武雄溫泉站。喺博多行吓，然後去醫肚，今次去咗博多站樓上AMU PLAZA 9樓嘅矢場豬排，TABELOG 3.55分，都不俗吧。

叫咗豬排同炸蠔小碟（此行突然變得大食起來，一定變肥蝸牛），豬排醫汁甜甜哋，唔錯，肉質都幾好，當然同神級嘅東京「成藏」冇得揮，但都好食。炸蠔就正常水平啦，不錯。

如果喺博多搵食，平又好、貴又好，喺AMU PLAZA樓上9樓同10樓已經夠多好嘢食，買嘢亦喺AMU PLAZA有著落，博多絕對係個好地方。

小蝸牛再喺阪急買咗甜品上車食，出發！

搭咗個幾鐘頭，去到武雄溫泉站咯，今次係由一位的士司機迎接我，載我去御船山樂園酒店，的士唔使收錢的。

順利上房，不過房間令人失望少少，可能18000YEN一晚，一分錢一分貨的關係，窗景完全被樓下的房頂擋住了，唯有衝去附近的御船山樂園逛逛。

住御船山樂園酒店，會附送即日的樂園入場票。入到樂園，遊客比較少，亦如預期般比較細，一小時內可以行哂，至於紅葉亦沒有紅海般的澎湃感覺，相比10月去立山黑部時經過的信濃大町就差好遠了，始終日本的人工樂園多數靚極有個譜，強如出名的金澤兼六園如是。

還好，樂園每逢紅葉季節，夜晚會開燈畀人睇夜楓，原本我去御船山樂園當日，夜楓活動已完結，幸好佢延長活動一星期，令我幸運地可以睇到夜楓。

喺樂園留到太陽落山，可以坐喺湖邊欣賞夜楓，都算不錯，但一眼睇哂，大概係得以下咁多。

去完樂園，6點已天黑，返酒店準備食晚餐，餐前去睇下酒店附設公眾溫泉係點，點知入到去見到好似浴堂，無風景，溫泉亦好細個，當堂冇心機，唯有乖乖回去等食飯。

晚餐都係一般懷石料理的舖排，不過恕蝸牛仔直言，真係好難食，有可能係小蝸牛喺日本食過最難吃的晚飯。

天哪！魚生質感相比香港的一田百貨買的魚生為差（當然一田的魚生都不錯的）；蒸豬肉的肉質比香港Sogo貨遜色多了；至於所謂和牛，連埋芝士汁釀落蘋果裡面，賣相好，但牛肉感覺有怪味，應該將貨就價，以低質食材煮調，所以做和牛菜式也要整色整水，冇辦法。所以我都求其拿拿聲食完，維持生命便算數。

食完再同蝸牛太太傾吓電話，然後拿拿聲訓覺，留番啲精力，早啲起床逃離呢間酒店，去第二度玩冇咁嬲。

總括而言，御船山樂園係一個可以不去的景點，如網友們有考慮一去，小蝸牛會強烈建議另覓景點。

2015.11 {Day 4｝福岡[秋] - 柳川遊 (蝸牛先生番外篇)

2015.11.29 {Day 4｝福岡[秋] - 柳川遊 (蝸牛先生番外篇)

話說第四天朝早，蝸牛太太要搭飛機番香港，朝早10點幾就目送佢搭的士走。事後蝸牛太太就話，下次都係要一齊走呢。

跟住餘下四日三夜，我就做一隻甩縄馬騮。第一站，就按計劃搭車去柳川玩。由博多去柳川，首先要去天神站，再由西鐵天神站搭電鐵去柳川，由天神去柳川只需48分鐘。如果喺博多落腳，大可即日來回去柳川。

柳川最出名係坐艇仔同鰻魚飯。柳川係一個好特別嘅地方，市內有好多細細條河道，於是坐艇仔成為旅客活動。而係西鐵天神站嘅賣票COUNTER，有提供柳川車票＋坐艇仔＋鰻魚飯的套票。由於網友話套票包的鰻魚飯SIZE好細，所以我只選車票＋艇仔PACKAGE，COUNTER姐姐英文溝通冇問題，順利買票！

當日我大概12點就去到柳川啦，第一站就要去坐艇仔，原來去到車站，仲要搭接駁車去渡頭。不過一出站就有個女仔示意帶我去搭接駁車，服務非常貼心，包保冇盪失路，所以大家有機會去，一定要買套票呢。

我坐車唔夠5分鐘，就去到渡頭啦，跟住排隊好快有得上船。坐艇仔可以睇到柳川市內沿途景色，環境都幾清靜。船夫好搞笑，一路旁述之餘，間中亦會唱下歌搞下氣氛，可能日日唱嘅關係，歌喉都唔錯㗎，高音都唱得幾穩。

大約一小時嘅船程期間，亦會經過好窄嘅河道口，經過河道口，大家就要DUB低頭啦，河道口上面有時係行人路、馬路，有學生哥特登停低鞠躬打招呼，都幾得意㗎。

坐到尾聲，見到另一條船嘅船夫使出絕技！！嗰條船去到河道口，船夫從船上跳上行人路，然後隻船係河道口另一邊漂番出嚟之際，船夫再由行人路跳番落隻艇度，勁！呢招我記得睇大台嘅長腳蟹做旅遊節目時，都有船夫表演過，今次就係真人SHOW。

去到柳川，自然要食埋鰻魚飯。呢度嘅鰻魚飯係蒸嘅，同平時食開嘅蒲燒不同，但食落唔會差太遠，因為都係用差不多的汁料。

柳川落船處附近，就會見到最馳名嘅本吉屋分店，十分方便。去到等大約10分鐘先有得坐低，叫埋餐，再等15分鐘先有得食。

登登登櫈，本吉屋鰻魚飯。

份量唔大，小朋友都食得哂，味道不錯，但未至於十分難忘，都好，可以等我留力食今晚的重頭戲。

離開本吉屋時，只係日本時間兩點幾，距離去旅館仲有兩小時，時間充裕，於是選擇沿水路慢慢行番去鐵路站附近的「旅館阿久根」。

一個人悠閒地慢慢行，慢慢影相，驚喜的是，喺行人路的景色，比艇上更加靚，有圖有真相，幾有驚喜。

行到尾聲啦，遇上有一段滿佈雀屎的路，換言之，滯留呢條路會有極高的中頭獎風險，大概要行成兩三分鐘，於是急步走過，最後武士，好彩。

好啦，終於到咗「旅館阿久根」啦，去到門口不見人影，又冇門鐘，點好呢，望吓望吓發現有一天花板吊下來嘅響鈴，拉一拉就有一位叔叔出來了。

呢位叔叔唔識英文的，情況有點兒尷尬，他帶我坐低後，留下一句「SUMIMASEN」，就行開了。本著日本作客的禮儀，我又不敢亂跑，不過，呢個時候突然急尿起來，坐左幾個字，越坐越急，點算好呢？於是忍唔住跑入去搵厠所咯。

跟住叔叔卒之帶我入房咯，勉強溝通完示意我可以浸溫泉，然後自由活動咯。

睡房非常日式傳統，有獨立厠所同浴室，溫泉風呂不在房，要出去浸，是公眾的。

出去浸溫泉，就有怪事發生咯。

話說個溫泉風呂係不分男女的，不過叔叔叫得我去浸，應該冇人卦，於是我一鼓作氣拉開門，點知一開趟門聽到好高音嘅「啊」一聲尖叫，點解裡面有個女人叫聲㗎，嚇屎禾，今次真係死咯，第一次一個人去浸溫泉就出事？然後「啊」完一聲之後，又再冇聲喎，心諗冇理由剩係得「啊」一聲，照計點都有幾句日文鬧吓我啦。

我停一停，諗一諗，冇理由咁奇怪嘅，於是我試吓叩門啦，又冇人應喎。可能我自己幻覺啫，咪自己嚇自己，跟住試吓第二次開門，鼓起勇氣，點知一開門，今次「啊」一聲仲大聲，今次嚇到我關門再退後兩步，心仔都跳出嚟了，唔通有女鬼？

今次關門後，又係冇人鬧喎，咁奇怪，咁我唯有試吓開多次門入去，鼓起勇氣，開門衝入去！

最後發現聲音唔係女人聲，而係度趟門生銹，開門就發出響聲，真係好似㗎。

跟住未完㗎，入到去，說好的溫泉呢？點解得個花灑同張長櫈？莫非呢個係桑拿房至真？

不過，長櫈上面又有個水龍頭喎，咁奇怪嘅？咁唯有多手搞吓張長櫈，原來打得開㗎，打開後嘅木箱，裡面係水，原來個風呂匿埋咗，咁古惑，其實我都半信半疑呢個係咪溫泉，只不過啲水暖暖的，有見及係唔係都要畀錢，梗係浸咗先講。事實上，我到而家都唔肯定呢個係咪溫泉風呂來的。

浸完之後，入面唞一陣，又係時候食MUM MUM啦！

話說選BOOK「旅館阿久根」，係從TABELOG網站睇到，佢嘅得分達到4.11分，係Tabelog全日本首500家食肆之一，一定不簡單。而我不知佢嘅「有明海料理」是什麼，只知日本都冇幾多間做得到。

晚餐都係類似懷石料理嗰種食十幾小碟，但好特別地，菜式冇牛冇雞冇豬冇羊，幾乎全部海鮮。

小弟並不精通飲食，但覺得碟碟都非常特別，亦好好食，前菜三小碟之中，白色係帆立貝配超濃sake味醬汁，超有驚喜。

鰻魚小飯系蒸煮形式製作，因為柳川出名蒸鰻魚，而佢蒸個反，蒸到反唔反、粥唔粥，有年糕的煙靱但冇咁靱，原來可以同鰻魚咁夾。

另外，令人非常難忘嘅係冷麵。我本身麻麻地鍾意日式冷麵，但呢碗係我食過最好味的冷麵，剩番啲汁仲可以沖熱水變湯，一樣好飲。餘下嘅都好好食，反而去到最後兩條魚就冇咁特別，可能因為烹調方試同廣東菜比較相似，但整體絕對是超水平。

MUM MUM食完都夜晚十點咯，剩番甜品，老闆娘帶我去其它房參觀。去到第一間房，一面食甜品，一面努力咁講解日本嘅傳統故事，雖然我唔明日文，但隱約知道係講緊傳統故事、講佢做咗好多工藝品、又講佢有研究漢字仲上左報紙、又講佢同男主人結婚52年，指手劃腳令我明少少，好似當我家人咁，其實幾窩心的。

同婆婆溝通不良之下都傾咗超過半個鐘，之後就番房覺豬啦！

2015年12月13日星期日

2015.12 蝸牛誔

2015.12.10

蝸牛先生正日生日
難得蝸牛先生今年放假
本來我都好想可以陪佢慶祝
不過無奈我已經無哂假

咁岩生日前一晚蝸牛先生約0左朋友食飯
咁我就可以放工落 IFC 買蛋糕
之後當晚十二點就開始慶祝

暫時最鍾意都係 Le Salon de thé de joël robuchon 的蛋糕
唔會太甜, 而且 size 岩岩好