2017.03.18 廣島 福岡 {Day 1} 福岡到著
話說有日見到 HK Express 買去程送回程
於是又貢入去望吓
一張來回機票 around 千五蚊一個人
雖說未算好抵, 但呢個價錢對比國泰都爭一大截
留返啲錢用來住好啲同食好啲都唔錯丫
再加上三月係我哋結婚周年
旅行慶祝好似都唔錯
就係咁....三月福岡之旅成行
航班: 07:55
當日倒塔咁早起身, 五點半 call 車出機場
去程只係買咗一位 20kg 嘅行李
我哋兩個大喼, 出發前好擔心會超重
好彩最後 15kg 都唔過
之後食完早餐就準備出發啦
航機準時起飛, good~
話咁快就到福岡
貪方便我哋坐的士去酒店
JR BLOSSOM FUKUOKA
呢間酒店我哋第二次住
鍾意佢近車站, 房間大, 同埋價錢唔太貴
上房放低行李, 坐一陣就拿拿聲出去食 LUNCH 喇
由於今晚 BOOK 咗食西餐
所以呢餐唔可以食咁飽
我哋揀咗拉麵
Shin Shin (Tabelog 3.58分)
去到見到一條人龍
最後排咗差不多二十分鐘先入到去
餃子
味道就無乜特別, 正常
拉麵
湯底係豬骨湯底, 入口唔會覺得好油, 都唔錯
麵嘅質地又唔會太淋, 少少硬身, 岩我
食完之後, 行咗陣 AMU 同阪急
有人竟然話攰要返酒店午睡, 真係好奢侈嘅一件事
不過今個 Trip 無乜行程要趕, 就返去休息吓
結果, 都瞓咗成差不多一個鐘
瞓醒就食茶點啦
岩岩喺阪急超市買的, 都見到好多日本人幫襯
神戶 觀音屋芝士蛋糕
其實呢個蛋糕係要食之前放入焗爐焗溶面層塊芝士先食的
不過買嘅時候無為意, 但就咁食都唔錯
有機會真係要試吓焗後版本
官網食法
聽聞焗後芝士會溶咗, 個底又會脆咗
好似幾正, 早知買返香港試吓
食完就換衫出發去天神食飯
今晚去嘅西餐廳都算做高級
所以專登帶咗套斯文衫同鞋去
免得太失禮
ASO 天神 (Tabelog 3.73分)
今次呢間我哋又係第二次去
上次食完覺得都幾抵食, 於是今次再去
今晚呢餐都幾精彩, 日本嘅西餐真係好鬼抵食
無論食物, 招呼都好一流
呢個係我哋鍾意去日本食西餐嘅原因
食飽飽就返去休息啦
