2017-18 大阪跨年之旅 {Day4} 神社參拜

2018.01.01 大阪跨年之旅 {Day4} 神社參拜

今日係日本的大年初一

我同蝸牛先生都係第一次喺日本過新年

當然要趁機去感受一下當地的過年氣氛

(不過我哋無去搶福袋)

check out 後先喺京都站搵食

不過新年的關係, 唔多食店有開

最後揀咗間食日式西餐嘅

味道普普通通, 唔難食

之後我哋就出發去八坂神社

呢日真係好多人去參拜

繪馬好靚, 我都買咗兩塊返屋企做紀念

好多攤檔, 都幾熱鬧

冰糖胡佬個 friend, 好甜

 沿住神社周圍行下又影下相, 比想像中好玩

之後行埋花小路就返京都

每次來日本都一定會食雪糕的蝸牛先生

行出車站時俾佢遇見"佢"

濃濃的牛奶雪糕上灑上厚厚的抹荼粉, 好正

(可惜我哋無留意間鋪頭叫乜名) 

返到京都又行咗陣 The Cube

新年好多鋪頭都大平賣, 雖然無想像中咁多人, 但都係太迫無心機揀

之後就離開返大阪繼續我哋餘下的旅程

今次我哋又住返 Osaka Granvia

鍾意呢間酒店係因為佢地點實在太太太方便

位置就喺大阪站上蓋, 而且梅田站轉車比較方便

而今次我哋住 Granvia 樓層, 房的裝置較普通房高級, 例如床褥係用 Sealy

走廊出面有專屬的 reception, 可以幫手 book 下枱同埋直接 check out

另外出面又有一個小小的 Lounge  

入面除咗有電腦之外, 仲有一個小小的飲食區, 所有嘢都係免費的

(不過佢係有開放時間的) 

房亦比一般的大, 有sofa, 廁所係乾濕分離

如果下次再住, 我諗我都會住返呢層

感覺無咁閒雜亦都靜啲

喺房休息陣, 未到食飯時間就出去搵小小嘢食填下肚

不過新年真係唔多鋪頭有開

最後買咗麥當勞返酒店食

其實我係第一次喺日本食麥當當

買啲香港無嘅款式

個甜品又幾好味, 感覺似肉桂味西多

另外個包都好食, 剩係塊包都已經比香港的鬆軟

真係唔怪得成日聽人講日本嘅麥當勞比香港好食啲啦

食飽之後, 有人竟然沖涼上床瞓覺 (才五, 六點)

之後等到差不多晚飯時間就出去食飯

我哋今晚 book 咗枱食元旦晚餐

ピエール @ Inter-Continental  (Tabelog 3.7分)

味道雖然唔算十分突出, 但都岩口味

份量亦唔會太多或太少, 岩岩好

環境同服務都唔錯

2018 年第一日過得好開心, 好精彩

2017-18 大阪跨年之旅 {Day3} 2017 再見~

2017.12.31 大阪跨年之旅 {Day3} 2017 再見

8:30 食早餐, 估唔到早餐都有一大盤蟹

晨早流流拆蟹真係第一次, 感覺好瘋狂

食飽就返房休息, 蝸牛先生就享受下房的私人風呂

(由於房入面的唔係溫泉水, 所以我哋前一晚喺溫泉街買咗包溫泉粉返來浸)

 浸完執吓嘢就要 check out 走人

由於趕上車的關係, 我哋今次又無買到指定席

雖然第一程有位坐, 但眼見上車的人愈來愈多, 好擔心下一程會無位坐

好彩, 最後都係有位的

落車第一件事先去酒店 check out 放低行李

京都站實在太大, 我哋左兜右兜先搵到一個岩的出口

出左車站, 其實過條馬路再行多一, 兩分鐘就到酒店

今次放棄傳統酒店, 揀咗一間設計比較 modern 的酒店

估唔到酒店職員的英文幾好, 而眼見呢度大部份都係外國住客

以為未夠 4 點無得入房住, 但 check in 完後就可以上房, 讚~

Sakura Terrace The Gallery

大堂入口的休息區

餐廳

每位住客會送一杯welcome drink

而飲品絕對唔係頹頹的凍檸水之類的物體

而且可以揀坐低飲或 take out 帶上房

餐廳有部份食物亦可以 order 上房慢慢享用

我覺得幾方便

呢個格局令我諗起香港的井型公屋

講完酒店外圍, 講返間房 

今次專登揀一間有露台的, 諗住可以夜晚出去睇下星

點知........呢日落大雨, 夜晚返到去出面所有嘢都濕哂

早知係咁就 book 間普通房啦, 因為露台房價錢唔平呀! 

其實個露台比我想像中無咁靚

廁所超大

 休息一陣就出去搵食

之前家姐有個日本同事介紹我哋食呢間

 新福菜館 (Tableog 3.59分)

新福菜館旁邊仲有另一間人氣拉麵店, 第一旭拉麵  (Tableog 3.6分)

當日第一旭人龍超長, 而新福菜館就只得五,六個人排緊

但其實兩間店喺網上都各有支持者

所以我哋最後都揀咗人龍短啲嘅新福菜館

呢度賣的係中華拉麵, 味道同日式拉麵唔同

見佢有大細之分, 唔想食太飽就各自叫咗一碗細 size 的

(以為會好細, 點知原來份量同平時正常份量的差不多)

見到好多人都有叫炒飯, 又以為自己叫咗細拉麵應該食得哂, 於是跟

炒飯比拉麵出色, 好彩有叫

拉麵其實都好食, 只係唔算太突出

最後我哋兩個都食唔哂碗拉麵, 真係好唔好意思

食飽飽就喺The cube 行咗一陣, 之後轉戰四条河原町

第一次嚟呢度, 原來都有幾多百貨公司, 感覺好正~

路過錦市場先入去逛一陣

不過新年前夕的錦市場塞滿辦年貨的日本人同遊客

入面超超超迫, 完全無辦法可以睇到嘢

所以我哋行到一半就放棄咗

之後就去行百貨, 行咗陣見攰攰哋就入間餐廳飲杯嘢先

不過一入去就話 last order

(相信因為日本新年前夕要早收的關係)

休息咗半個鐘再起程

入手咗一條頸巾後無耐, 就聽到廣播

原來除夕的關係要提早關門, OMG, 六點就 close

之後再行去其他百貨都同樣早收, 好灰!

我哋今晚 book 咗 20:00 食dinner

附近好多鋪頭都 close 哂, 無嘢行但想搵個位坐下休息吓都無

返酒店 d 時間又唔拖唔水, 都唔知點算好

不過最後我哋決定返京都

時間唔係好多就唯有喺車站搵個位坐吓就算

兩個傻人唔係撘車但喺月台坐左大半個鐘

呢晚其實都幾凍

終於到食飯時間, 因為餐廳地點唔近車站, 於是我哋坐的士過去 (JPY1,070)

今晚食懷石料理, 點知去到人哋話我哋無 reconfirm 個 booking

所以已取消咗我哋個預約

又因為佢哋無預備到食材, 所以好抱歉招呼唔到我哋啦

呢一刻真係想喊, 喺街度等咗成晚最後竟然無得食

今晚又係除夕, 好多餐廳都fully booked

一心打算食餐好嘅除夕晚餐, 點知攪成咁

臨時臨急又唔知食乜好, 好沮喪

最後同蝸牛先生返酒店食

款式唔算太多, 味道亦都好普通

我倆的除夕晚餐最後變成咁, 好失望

本來有諗過出去除夕活動

不過今晚餐飯咁已經令個人無哂 mood

再加上喺唔方便的日子, 人好攰

所以最後唯有睇住紅白倒數

 臨返酒店之前喺便利店買咗杯雪糕

呢邊的 Godiva 比香港平, 款式亦比較多, 好幸福

2017 的最後一天, 都算幾難忘

2017-18大阪跨年之旅 {Day2} 城崎溫泉進發

2017.12.30 大阪跨年之旅 {Day2} 城崎溫泉進發

今日天氣好啲, 酒店望出去的 VIEW 好似都唔差

check out 之後, 坐 shuttle 出大津車站

之後去京都站地下街 porta 搵食

田ごと (tabelog 3.54分)

主打喬麥麵, 個餐都幾好食

貪心又想食麵又想食壽司

不過呢個份量嘅早餐對我嚟講都幾大份, 最後要蝸牛先生幫手先食得哂

食完就去 Isetan 買水果今晚食 

跟住就坐火車出發去今次重點行程 - 城崎溫泉

年尾好多日本人坐火車返鄉下過年

而我哋嘅 JR pass 只有自由席

雖然已經預多咗半個鐘去排隊

但去到時條隊已經超長

呢一刻個心極度後悔無加錢買指定席

因為去城崎車程要兩個幾鐘, 一定企到傻

最後, 如我所料係無位坐嘅

不過好彩搵到個半企半座嘅位, 都總算無咁辛苦

個幾鐘後到達福知山站轉車

又好好彩俾我搵到一個位坐

剩返最後半個鐘的車程, 蝸牛先生終於都有位坐

兩個半鐘後終於都到達

第一次撘長途火車係要企, 真係好難忘的經歷 

如果再有機會年尾來日本, 一定要買指定席

(相係之後補影的, 我哋去到時只係三點鐘)

到站後就坐旅館的 Shuttle bus 入去

今次我哋住呢間

城崎 円山川温泉 銀花

由於係蟹季, 今晚晚餐係食蟹 (津居山蟹)

再加上年尾近新年, 所以房價都幾貴

講真對我來講算係天價, 所以都糾結咗好多日先至決定 BOOK

不過又好知道解禁後的蟹到底有幾鮮甜

而今次難得遇岩季節, 所以最後都係去馬

由於咁貴, 所以對呢度都幾有期望

入到房有少少失望嘅, 因為 SIZE 唔大

但個 view 都 ok 嘅

室內的私人風呂都係失望

因為佢同我講開出來的水唔係溫泉水

喺房休息陣就坐返 SHUTTLE 出去行吓

(酒店出返去商店街大約十分鐘)

如果落雪呢度應該幾靚

不過呢日只係好凍, 無落雪, 有少少失望

呢度有好多唔同的付費溫泉俾遊人享用

不過我哋乜都無帶就無去體驗啦

另外呢度會見到好多日本人著住浴衣隨街行, 感覺都幾得意

有少少肚餓, 買咗個包 SHARE, 味道正常

行咗個半鐘就返去了

蝸牛先生又小睡片刻

飯前半個鐘見到賃切風呂有位, 於是走去浸咗一陣

 大木筒一個, 無 view, 無驚喜

大浴場係咁的, 一個室內一個室外

同樣地, 無 view

 終於都到食飯時間

好期待的蟹宴

成餐蟹好精彩

無論邊種烹調方法都好好味

我同蝸牛先生都好鍾意

臨尾仲有兩隻蕃薯俾我哋帶返去做宵夜

旅館的硬件上麻麻哋, 好彩餐飯拎返啲分數

如果唔係呢個價錢真係俾得好唔抵