2015.1.25 {尖沙咀} Tea buffet @ Hyatt Regency

上星期日蝸牛先生去跑渣打馬拉松

晨早五點出發, 七點幾就跑完返來

小眠一陣就諗下去邊度食 LUNCH

哈哈, 最後竟然係去食BUFFET

趕唔切食 LUNCH, 唯有食TEA

本來打算去美麗華, 不過最後改去 Hyatt

呢度之前已經食過幾次, 印象中幾抵食

不過今日唔俾用 credit card discount

所以埋單都要三百蚊一位

Tea buffet 來講, 呢度算係多款式

冷盤

蝦好大隻, 不過無乜味

火腿好似有兩款

另外, 仲有幾款芝士 

刺身

通常 tea buffet 刺身的選擇都唔多

但呢度都有成四款

不過, 好似又係無乜鮮味, 最好味係前面連魚皮0個款

冷盤

螺, 蟹鉗

又係唔夠鮮味

熱食

龍蝦鉗無味的, 失望呀!!

另外仲有燒烤食品: 香腸, 漢堡扒, 秋刀魚

味道都不過不失, 但又唔算特別好味

熱食: 印度 & 意粉區

 烤雞都幾好味

意粉, 又係無味0既?!  

 熱食

 呢碟蝸牛先生的, 我無食過, no comment

燒味

記得呢度的燒味比較出色

叉燒同雞亦都好好味

燒鵝脾

蝸牛先生拎0左成隻燒鵝脾返來

我食0左一件覺得味道好"SO"

雲吞

我太鍾意食湯麵, 每次食BUFFET 都會叫一碗

呢度只有雲吞麵

我興趣麻麻, 所以只叫了一碗剩雲吞

雲吞皮出奇地厚, 唔好食!!

甜品

蜜瓜好甜

焦糖格仔餅都好味

CAKE

呢度的甜品款式超多

而且好多都係細細杯

我只係食0左CHEESE CAKE 同士多啤梨0個杯

兩杯都幾好味, 唔會太甜

今日呢餐我覺得好清淡 

好多食物都無乜味

(之前明明唔係咁的)

不過勝在款式多取勝

食自助餐好難會食到一間款式多而又好味的

之前去過 Conrad 食 dinner buffet

好好味不過款式勁少

真係好難想像 lunch/tea 會有乜食

食 buffet 其實係一件幾奢侈的事

兩個人, 六百蚊

用呢個價錢出去食散餐, 已經可以食到好好質素0既餐

不過間唔中一兩次, 都幾開心的

2015.01.24 {北角} LUNCH @ 一流一海南雞

呢間鋪頭的格局 UP UP DUP DUP

個名又改得衰

剩睇外表, 其實唔太想入去食

不過, 又好奇點解可以開咁耐都唔執

之前都有打算試下

不過一次去到已經打佯, 另一次就話海南雞已經賣哂

一流一海南雞專門店

北角 書局街12-18號樂嘉中心地下1A號鋪

呢日我地中午就去

點了兩客海南雞飯 ($39/碗)

先食油飯, 我同蝸牛先生都覺得味道幾好, 唔會太油

雞就好嫩口, 好滑, 只係嫌雞的份量少0左D

可能人手不足, 上飯時無跟醬油 

(我好鍾意用黑醬油撈飯食架!!) 

不過, 原來係有的, 問完佢就即刻送上

$39 確係抵食的

不過呢度唔太好坐, 感覺有點污糟

如果下次再幫襯, 我應該會外帶 

食完飯我地又沿山路行落銅鑼灣

今日我同蝸牛先生都有收獲

一個買衫, 一個買褲

之後行去名店坊的 LOG ON

未入到去就見到人山人海

原來新開0左一間雪糕店

愛雪糕的蝸牛先生又點會錯過

I Cremeria

銅鑼灣記利佐治街11-19號名店坊1樓

呢度清一色賣抹茶同牛奶雪糕

其中最勁的一個係, 半個日本蜜瓜加雪糕 

售價係 $180!!!

抹茶雪糕

呢杯雪糕仲貴過今日碗海南雞飯, 要 $49/杯

抹茶味好濃, 我鍾意 

旁邊有點似侯頭菇的東西其實係糯米磁

煙煙韌韌, 入面又有D餡, 我地覺得幾好食

等0既時候見人用銀色匙羹, 仲以為食完要還

但原來係膠來的, 又幾特別

食完就返大埔娘家

到夜晚返屋企的時候路經 APM

見到 Das Gute有抹茶蛋糕, 又忍唔住買0左一個

(你話想唔肥都幾難)

以為係日式0個款 CHEESE CAKE

點知原來唔係, 有少少失望

不過都好食的, 唔太甜

有見到我的 Le Creuset 小叉嗎?

就係前日買 cosmopolitan 送的 (才 $50 一本)

0個日八點未夠就落街買

搵0左兩間先有貨

我自己要了兩 set, 再幫阿嫂買0左一set

total 3 set 用0左我差不多半個鐘

不過我想要的紫色始終都係搵唔到

Le Creuset 真係愈來愈受煮婦歡迎

2015.01 {灣仔} Lunch @ 李家

好OUT 的我地

上星期先第一次食韓國炸雞

李家

灣仔駱克道405-419華發大廈地下C鋪

聽聞呢間要排個幾兩個鐘先食到

我雖然為食, 但要我排咁耐去食一餐真係好唔願

所以我寧願揀唔食

前排攪裝修時路經灣仔

見到呢間0係尖沙咀好出名的炸雞店

於是下定決心要搵日0黎試

拖下拖下, 終於上星期先同蝸牛先生來試

 出到灣仔發現餐廳開兩點 (openrice 資料)

不過蝸牛先生話一場0黎到, 過去望下

點知, 原來人地有開, 而且仲有 lunch set 

我地點0左個粉絲 set

入面幾款前菜, 另跟飯同湯

味道都 ok, 而且份量唔細

一場0黎到, 雖然明知炸雞好大份 (15 pcs), 但都要 order

我地無做大哂鬼架, 食剩有帶走, 夜飯繼續食

甜辣炸雞

無想像中咁好味, 茄汁味好重

不過都好味0既...

如果有機會再0黎, 我反而想試原味

唔知大家係咪都信0左 openrice 的開店資料

定係炸雞熱潮已退

我地呢日唔駛等位之餘仲包場

直到我地食完都無一個人入過0黎

嘩哈哈, 好彩自己從未因為炸雞而哂時間排過隊

2015.01 自家煮

最近忙 OT, 忙 plan 行程, 忙追劇

所以好耐都無出過BLOG

話咁快一月就過0左一半

好快就到新年

然後好快又到我地的蜜月旅行

真係好想快 d 到!

我的生活, 離不開都係食

最近試煮 (試玩) 好多新菜色

荷葉蒸海鮮飯

用0左 $150 買海鮮, 有鮑魚, 蟹, 魚, 蝦, 蚌

個飯吸收哂海鮮的鮮味, 好正

個飯蒸0左好耐先熟, 下次會打開塊荷葉蒸熟 d 飯先放海鮮

自己整真係好抵食, 百五蚊已經食到好飽

呢個飯我成日心 cc 想再整

雜錦魚生飯

魚生飯想整好耐, 因為好味又易整

刺身買0左唔夠二百蚊 (三文魚, 三文魚子, 帶子, 大蝦)

但就已經整到兩大碗

出去食的話, 一碗已經百幾蚊啦

自家制真係好鬼抵

咖哩炒蟹

呢味係蝸牛先生煮的, 好惹味~

話說我地買完蟹叫個檔主幫我地劏埋

佢好爽快就話好

但原來佢所謂的劏, 只係用手幫我地將 d 蟹腳撕走

其他蟹肺之類0個 d 係無清的

真係呆0左

下次都係幫襯返相熟0個檔

爐端燒

新屋有個細細的露台

未收樓前我已經想0係出面吹住涼風, 食下燒烤 (感覺好似好寫意)

搵0左好耐終於比我搵到呢個細細地的燒爐

新屋入伙一直都未得閒試

尋日終於都實現0左我呢個心願

簡單買0左少少海鮮, 蔬菜, 仲有雞亦同香腸

另外, 燒薄餅都好好食

嘩哈哈, 真係過癮得來又好味

而且都係0個句, 自家制比街外食抵好多

今年新年, 打算整蘿蔔糕, 馬蹄糕同黃金糕

哈哈, 希望到時有心機, 有時間 

2015.1.1 A New Start

2014 已過, 今日係 2015 的第一天

蝸牛先生要返工

而我就一個人0係屋企

買0左一個好豐富的 lunch [冬蔭海南雞湯賴 + 酸辣鳳爪]

本來諗住留少系鳳爪比蝸牛先生

點知, 買完餸返來忍唔住食哂 [我超愛酸辣鳳爪]

最近食得太放肆

為了減低罪疚感, 我一個人走0左上山

香花徑

由書局街行上去, 之後去到香花徑的入口, 我就落山啦, 嘩哈哈

我計過時, 十分鐘唔駛

不過一路上去都係樓梯, 都幾索氣的

之後沿山路經天后廟道行落大坑, 再一直行落銅鑼灣

今日天氣好岩行山, 唔太哂又唔太熱

今晚打邊爐, 專登去鵝頸橋街市買牛頸脊

前面兩個人都係買牛頸脊, 點知到我時就賣哂啦

最後牛佬話仲有一舊叫牛頸錐的, 無咁肥, 問我要唔要

唉, 好過無啦

之後買埋脆鯇同菜就攪掂

"唔小心" 走0左入 曲奇四重奏

好耐無食佢的蝴蝶酥啦, 本來想買一包的, 點知無哂

要買就要買一盒

同蝸牛先生兩個人 share食, 都唔係好過份0者

今日鋪頭入面迫滿強國人

佢地唔用夾隨手就拎樽入面的餅試食, 嘔心

成堆人迫0係入面, 無論我想入去定係走, 都好困難

好討厭!!!

2015 三月會同蝸牛先生到九州旅行 

尋日已經買好 package

今次會以睇景為主

蝸牛先生就最期待體驗當地的溫泉旅館

而我就希望可以夾到櫻花的檔期

上次北海道之旅的行程好似太趕

今次想 relax 一 d

不過暫定的 itinerary 好似都 chur chur 地

只怪我地太貪心, 好多地方都想去, 哈哈

2015 無乜特別的計劃

只係希望屋企人健健康康

同蝸牛先生開開心心就 ok 了

2014.12.31 除夕晚餐

大時大節我鍾意0係屋企食

唔駛同人迫, 又唔駛食貴餐

呢晚蝸牛先生又好遲放工, 差不多成十一點幾

我地食完都已經可以倒數啦

蘑菇湯

食西餐, 菜的比例好似好少

蘑菇湯就可以平衡返纖維量

前菜: 煙三文魚

唔想食咁多, 所以前菜無特別整

一打開包三文魚, 我簡直嚇親, 得三塊

價錢係: 當日特價, 八十幾蚊, 正價係九十九個幾!!!!

味道, 我又唔覺得特別好, 不過又真係比平時好食少少0既

而蝸牛先生就最鍾意佢入面包香草汁

就係呢隻, 我唔會再買, 實在太貴!!

墨魚汁帶子麵

之前貪得意0係無印買0左包墨魚汁

味道無乜特別, 不過真係好夠色

傻傻地煮哂成包意粉

最後食剩一大兜

照燒銀雪魚

全晚我覺得最好食係銀雪魚

自製的照燒汁都幾好味

本來今晚唔想食太豐富

不過煮下煮下都唔少0野

以後預份量都係要僅慎d, 唔好再眼闊肚窄, 新一年唔想再做大哂鬼