2016.8 雜煮

最近雖然懶寫BLOG

不過都有煮吓新菜式

有一日忽然興起想食焗豬扒飯

於是夜晚就煮咗

記得之前都煮過一次, 但就唔太成功

今次煮出來都似樣, 但就唔夠汁

下次一定會再試

[焗豬扒飯]

隔咗好耐無玩包, 呢次整的過程好"呢HEA"

因為技術上問題, 等完第一次酵見佢唔漲先發現原來未落酵母

之後好格硬地將啲酵母搓返入個麵團度

好彩最後都發得起, 有驚無險

(不過發得唔係咁好)

[餐肉包]

有晚放工後打大風, 放工急急腳去買糧, 之後就返屋企整包

喺SOGO 買咗隻日本腸, 好好食

今次都有意外, 忘記了二發, 所以包包唔夠鬆軟

第一次整呢隻型嘅包, 包得好樣衰

[腸仔包]

最近心情唔多好

今個月媽媽入咗兩次醫院

雖然只係腸胃不適, 但感覺到佢嘅身體狀況已經大不如前

我幫唔到佢啲乜

唯有多啲陪吓佢, 有時間就同佢傾吓電話

比多啲正能量佢

2016.06 雜食記

好耐好耐都冇寫 blog 了

趁住端午放假有時間，記錄下最近嘅生活先

明明話減肥，但又密密食

呢排真係試咗好多新餐廳

秋光 

銅鑼灣永光中心

來自日本淺草

開張頭一晚已經想試，冇 book 位，上去前打去問佢話最快要十點後先有位

於是第二日諗住 book 食 lunch

點知又full

但只要一點埋單就可以攝到位

(我哋12:15 先上到去，食到一點都未食完，但職員又冇催喎，服務ok)

呢個天婦羅丼份量都幾勁

我覺得女仔係唔會食得哂的

下次去想試天婦羅定食

因為應該會比丼入面的脆口啲

整體嚟講呢碗丼都幾好味, 只係嫌佢啲飯粒唔夠綿

之前貪得意喺 Jasons 買咗盒 pad thai noodle kit

入面有一包醬同粉

再用埋藍象冬蔭公醬，整咗一個泰式晚餐

太貪心，煲湯落咗好多水

如果唔係應該幾好飲

pad thai 都唔錯，都幾似街食到的味道

等我得閒搵下佢個醬邊度有得買先

放假前夕偷懶唔想煮飯

放工行完街就喺 citysuper 買咗盒刺身同牛肉

然後返屋企再煮兩碗飯就一餐

真係好味又簡單

同事介紹咗間食炸魚薯條的餐廳

Fish & Chick

西環堅尼地城新海旁街25號地下6號舖

餐廳喺堅尼地，對住一大片海，好好view

我哋叫咗個二人餐，有炸魚同烤雞

呢度特別之處係有幾個不同產地的魚可以揀，貴魚要加錢

而烤雞係香草味，雞肉好嫰又唔乾 

(even 雞胸都唔韌)

我反而鍾意雞多過魚

同埋杯檸檬茶好飲

有日想食上海菜

就同蝸牛先生去咗灣仔的老上海飯店

香港諾富特世紀酒店地庫1層

第一次試，估唔到又幾好味

呢餐樣樣都好食, 但我最鍾意嘅係酸辣湯

小插曲: 見到有個侍應喺執枱的時候, 將客人食剩的乳鴿拎咗入一間房

然後隔咗一陣就吉碟拎返出來, 我哋懷疑佢自己拎入房食咗

我之後偷裝過間房, 只係一間普通的房, 入面唔係廚房

所以佢應該唔係 recycle 俾客人食 

六月過咗一半都未夠, 但就真係食咗好多

好好彩試幾間新嘢都幾好味

今篇寫完, 唔知下次要等到幾時先再得閒出 blog

因為日文班真係好忙, 每星期都有功課同默書

真係少啲精神都唔掂

2016.04 雜

而加每日一有時間就溫日文, 好充實, 好鬼忙

下星期就飛韓國了, 係我同蝸牛先生的第一次

唔知好唔好玩呢

今次只係去四日, 所以唔會有太多的行程

加上第一次去, 所以只係 plan 吓去明洞, 弘大之類熱門的地方

無乜特別的期望...

只係期望可以食到好食的韓牛

上星期買咗機票九月去名古屋

今次主打岐阜縣 (高山, 白川鄉. 奧飛驒溫泉鄉) 

未出發先興奮

已經搵緊溫泉酒店, 好多間都好似好靚呀~

(希望到時  yen 唔會升得太高)

7-11 最近 換的 Le Creuset 小餐具

其實本來唔覺得特別靚

不過換完一個之後, 又好想儲齊一套

多得同事, 朋友, 屋企人的幫助之下, 我已經換咗六個啦

要繼續努力!

(不過每次都唔知抽到邊隻, 攪到無乜心機再換落去....)

有次 weekend 同蝸牛先生去翠園飲茶

一打開點心紙, 咦...點解咁少選擇嘅

當我哋以為中伏之際, 阿姐就話出面有點心車

已經好耐無見過點心車啦, 真係好懷舊~

亦令我諗返起以前細個同屋企人飲茶的時光

有一晚學人整燒肉

過程雖然唔算煩覆, 但因為味道無乜特別

最重要係整唔到脆皮

所以應該唔會再整第二次了

今年會去三次旅行

呢半年都要慳慳哋儲下彈藥先~

2016 復活節

自從學日文後

已經疏懶咗好耐無寫 BLOG

語言天份低加上記性差的我

而加每日最少都要抽半個鐘出來複習

如果唔係真係好難追到進度

再加上老師每堂都要默生字

所以真係要勤力啲先得

今個復活假宅宅哋

每日剩係食同食....說好的減肥.....唉

公司今年凍薪 (但明明 2015 年賺到笑)

"良心地" 做下樣獎勵吓啲表現好的同事

我係其中一位

得到 2K 的獎金, 真係多乜謝!!

2K, 好過無, 比我有藉口去請蝸牛先生去食好嘢

蟹膳

灣仔 譚臣道3號地下

呢間想試好耐, LUNCH 大約三百幾蚊一位

DINNER 就 千五 UP

一入到鋪頭, 就聞到一陣好熟悉的味道 {木魚湯}, 感覺好幸福

同時亦幻想自己身處日本 (思鄉病發作)

我 ORDER 了火鍋的 SET

蝸牛先生就揀了燒蟹加天婦羅 SET

可能我期望太高

我覺得有點失望

味道唔係唔好, 只係我覺得唔夠精彩

又或者, 下意識地將佢同蟹道樂比較咗

總之, 試過一次就已經唔會想再來

又有一日, 去了食川菜

雲陽 

勿地臣街1號時代廣場10樓1001B號舖

我肚仔唔爭氣, 但又鍾意食辣, 尤其係水煮魚

不過蝸牛先生食唔到咁辣

所以今次無叫到

我地ORDER 了另一個唔係水煮的魚片

呢度的魚片整得好滑, 但又唔會有骨, 真係好正!

暫時呢間係我至愛的川菜館

BAKE 而加終於都唔駛排隊啦

呢日就買咗半打返去孝敬屋企人, 大家都覺得好食

之前聽過不少人讚半熟工房的芝士TART 好食

於是我又買來試

佢無論餅皮同芝士的質地都同 BAKE 好唔同

佢的比較淋身

但我同蝸牛先生就鍾意 BAKE 多啲

除了出街食, 我最近都有下廚

平時出街我都鍾意叫泡菜鍋

最近我試咗自己整, 原來係好易

呢晚蝸牛先生唔返, 我去買了一人份的海鮮 

(5 隻蝦, 鮑魚兩隻, 十幾隻蜆)

加埋泡菜同烏冬, 成本價約九十蚊

雖然可能出去食仲平

但至少我的海鮮係游水貨式

同埋煮完後好有成功感

又有一晚想食三文魚
一個人整咗一個和式 SET
方便又好食

下個月就出發去韓國

所以呢幾日我又忙於編行程搵地圖

第一次去韓國

唔知好唔好玩呢?

(去四日, 但買咗三本書, 再問家姐借咗一本, 自己都覺得好過份~)

2015 平安夜

呢餐一定要blog

因為我用咗靚靚枱布

年頭時在博多買的，係一見鍾情

鐘情到一直都唔捨得拎出來用

終於平安夜呢晚見天日

懶浪漫, 熄哂燈, 但原來影出來好暗

成張枱除了心心碟, 碗同杯係香港買之外

其餘的都係由日本托返來的 

南瓜湯

與其話佢係南瓜湯, 不如話佢係南瓜溶

因為除0左水同南瓜之外, 我乜都無落

不過好甜喎, 日本種0既0野就硬係甜 D

前菜: 三文魚, 鯖魚刺身

豬扒 + 香腸

呢款豬扒, 簡單用鹽麴, 酒, 蒜醃下就已經好好味

之後加蜜糖入爐焗, 方便又簡單

海膽白汁長通粉

其實呢個粉0係街食過, 我同蝸牛先生都好鍾意

於是又試下自己煮

其實都好簡單 (因為我用了現成白汁)

甜品 by Teresa Festival

今次呢兩件麻麻地

連好鍾意食蛋糕的蝸牛先生都食剩

今餐真係超級滿足

易煮無難度, 但又好好味

本來諗住買少少花裝飾下

不過最後唔記得0左

下次一定要記得, 如果唔係點襯得起我張枱布呀, 哈哈~

2015 情人節

今年的情人節同新年好近

為了遷就返 SHIFT 的哥哥

所以情人節要返娘家食團年飯

我跟蝸牛先生的情人節晚餐就改在 2 月 15

其實都只係普通一餐晚飯而已

(反正我地都已經不是情人啦)

呢晚我地都差不多六點先去買餸

扒0係樓下凍肉鋪買的

價錢比 CC Super 平一截

所以味道都爭一大截

蜜糖豬鞍

我覺得質地同味道都同平時買的爭好遠

不過, 佢價錢比平時平一半

黑椒牛扒

反而牛扒質素就差不多

間唔中都可以買來食下

大蝦意大利飯

之前0係一田買0左一pack 意大利米

入面有菇, 番紅花, 香料

不過煮完出來我覺得味道一般

今年的情人節就咁簡單過0左啦~

{送馬迎羊} 年三十團年飯

今年夫家提早食團年飯

所以年三十我地可以食一個兩口子的團年飯

咁耐以來第一次呀!!

今日放半畫, 先去尖沙咀拎之前網購的衫

之後再街市買馬蹄, 芋頭整糕

本來想買魚生飯返屋企食, 但拎住太多0野

唯有拎返屋企先

不過返到屋企就懶得再落街啦

最後, 唯有食公仔麵

餐蛋麵, 永遠都係最好的配撘

食飽就開工整糕

一整就整0左三個幾鐘

到差不多整完的時候, 望下個鐘原來已經六點

於是拿拿臨落街市買餸 (仲要蝸牛先生話今晚可以早放喎)

落到去好多檔口都已經收爐

未諗到煮乜, 再加上時間關係, 於是決定海鮮餐

一支箭衝去北角碼頭買海鮮

好彩, 都仲有少少0野買

買0左條魚, 蠔, 蝦都只係百五蚊

煲唔切老火湯就改做燉湯

再加埋下畫食剩的午餐肉

0係無乜準備之下

呢餐年夜飯有魚, 有肉, 有菜又有湯

都算做豐富吧~

洗完碗, 再食埋今日0係 Pierre Hermes 買的 Macarons

見佢出0左幾隻新味, 於是又試下

白松露, 松露味真係好濃, 不過用來做甜點又覺得怪怪

鵝肝朱古力, 可能我份人比較傳統, 我覺得好奇怪

我始終最愛都係玫瑰荔枝味, 好清香而且又唔會太甜

來年希望一切都順順利利, 無病無痛

2015 蒸糕熱

今年一口氣蒸了四款糕, 好勤力
(其實之前仲試整0左黃金糕, 不過失敗0左)

首先出場有蘿蔔糕

有 HAND BLENDER 幫手仲唔駛刨到手軟添

今年整出來的味道偏淡, 下年要重手返 D

失敗了的椰汁年糕

佢醜樣之餘, 屋企人仲一致覺得無乜味

芋頭糕,, 桂花馬蹄糕

本身唔鍾意食芋頭

不過唔知點解又鍾意食芋頭糕喎

屋企人覺得幾香口

我就嫌芋頭切得太大粒 (愈切愈痕, 後尾已經唔想再切)

出年再整的話, 一定會戴手套切細粒d

屋企人最鍾意係馬蹄糕

有桂花香又唔太甜

其實蒸糕無乜難度, 只係功夫比較多

我個人覺得幾好玩, 哈哈!!

幾日的假期眨眼又來到最後一日

點解放假的日子永遠係過得咁快?!

*****

下個月的今日, 我同蝸牛先生已經0係日本啦~ 好心急呀!!!

2015.02.01 周日自家煮

最近公司無咁忙 (touch wood) 多返小小時間

可以0係屋企煮下0野食

上個 weekend 煮了一個 Sunday brunch

(哈哈, 基本上全部都係現成的)

最愛香腸同茄汁豆

同日的夜晚, 煮了一個簡單又好岩食的晚餐

大蝦蒸飯

呢晚 d 蝦好靚好新鮮

本來打算整白灼蝦

不過後來都係轉做蒸蝦飯

我同蝸牛先生都覺得蝦飯比蟹飯好味

清酒煮蜆

本身好鍾意食呢味餸

一來易煮, 二來我鍾意飲蜆湯

牛肉粒炒帶子

呢晚所有餸都係我鍾意食的

第一次買急凍牛柳粒

估唔到味道同質感都唔差

鱷魚肉燉湯

蝸牛先生作感冒

於是即刻煲個鱷魚肉湯等佢舒緩下

除了煮飯, 最近都有整麵包

不過就唔太得心應手

估唔到大焗爐係咁難 handle

焗出來的包完全唔似樣

唔係外皮太脆就係入面唔熟

唉...唔通我真係揀錯0左焗爐?! 

2015.01 自家煮

最近忙 OT, 忙 plan 行程, 忙追劇

所以好耐都無出過BLOG

話咁快一月就過0左一半

好快就到新年

然後好快又到我地的蜜月旅行

真係好想快 d 到!

我的生活, 離不開都係食

最近試煮 (試玩) 好多新菜色

荷葉蒸海鮮飯

用0左 $150 買海鮮, 有鮑魚, 蟹, 魚, 蝦, 蚌

個飯吸收哂海鮮的鮮味, 好正

個飯蒸0左好耐先熟, 下次會打開塊荷葉蒸熟 d 飯先放海鮮

自己整真係好抵食, 百五蚊已經食到好飽

呢個飯我成日心 cc 想再整

雜錦魚生飯

魚生飯想整好耐, 因為好味又易整

刺身買0左唔夠二百蚊 (三文魚, 三文魚子, 帶子, 大蝦)

但就已經整到兩大碗

出去食的話, 一碗已經百幾蚊啦

自家制真係好鬼抵

咖哩炒蟹

呢味係蝸牛先生煮的, 好惹味~

話說我地買完蟹叫個檔主幫我地劏埋

佢好爽快就話好

但原來佢所謂的劏, 只係用手幫我地將 d 蟹腳撕走

其他蟹肺之類0個 d 係無清的

真係呆0左

下次都係幫襯返相熟0個檔

爐端燒

新屋有個細細的露台

未收樓前我已經想0係出面吹住涼風, 食下燒烤 (感覺好似好寫意)

搵0左好耐終於比我搵到呢個細細地的燒爐

新屋入伙一直都未得閒試

尋日終於都實現0左我呢個心願

簡單買0左少少海鮮, 蔬菜, 仲有雞亦同香腸

另外, 燒薄餅都好好食

嘩哈哈, 真係過癮得來又好味

而且都係0個句, 自家制比街外食抵好多

今年新年, 打算整蘿蔔糕, 馬蹄糕同黃金糕

哈哈, 希望到時有心機, 有時間 

2014.12.31 除夕晚餐

大時大節我鍾意0係屋企食

唔駛同人迫, 又唔駛食貴餐

呢晚蝸牛先生又好遲放工, 差不多成十一點幾

我地食完都已經可以倒數啦

蘑菇湯

食西餐, 菜的比例好似好少

蘑菇湯就可以平衡返纖維量

前菜: 煙三文魚

唔想食咁多, 所以前菜無特別整

一打開包三文魚, 我簡直嚇親, 得三塊

價錢係: 當日特價, 八十幾蚊, 正價係九十九個幾!!!!

味道, 我又唔覺得特別好, 不過又真係比平時好食少少0既

而蝸牛先生就最鍾意佢入面包香草汁

就係呢隻, 我唔會再買, 實在太貴!!

墨魚汁帶子麵

之前貪得意0係無印買0左包墨魚汁

味道無乜特別, 不過真係好夠色

傻傻地煮哂成包意粉

最後食剩一大兜

照燒銀雪魚

全晚我覺得最好食係銀雪魚

自製的照燒汁都幾好味

本來今晚唔想食太豐富

不過煮下煮下都唔少0野

以後預份量都係要僅慎d, 唔好再眼闊肚窄, 新一年唔想再做大哂鬼