2017.08 五天東京遊 {Day 4 } 大雨下原宿 / 新宿遊

2017.08.15 五天東京遊 {Day 4 } 原宿  新宿

今日十點幾就出發食炸豬排

雖然東京有好多炸豬扒店喺 Tabelog 都好高分

不過呢幾日係東京嘅假期, 好多話題鋪都無開

所以最後都去返前年食過嘅豬扒店

(舊post 重溫2015.10 東京北陸十天遊)

成藏 (Tabelog 4.12分)

去到已經大排長龍, 今次應該第一 round 都入唔到去

餐廳十一點開門, 上一次差不多時間就會有職員出來排menu

不過今次點解無嘅?

到十一點幾, 終於有職員出來, 不過佢up 咗一大埋嘢

唔知佢up 乜, 但似乎出現咗啲事故

最後排到差不多一點先有得入座...

豬排依然好味, 不過我覺得佢跟餐嗰碗豚肉湯仲出色

食完就出發去原宿啦

今日超超大雨, 好狼狽, 亦都好影響購物嘅心情

無乜特別目標, 求其行吓 Laforet, Line shop 同埋細街嗰邊

都有少少收獲

本來蝸牛先生想試波鞋, 不過大雨之下佢成對鞋連襪都濕哂

佢話唔好意思去試鞋喎

就係咁, 佢吉手而回

大雨加上行到攰, 所以我哋決定返酒店放低行裝之後轉戰新宿

新宿咁大半日真係無可能行得哂

最後都係行唔哂

由於落大雨關係, 晚飯都無周圍去
近近哋去咗高島屋搵食
最後揀咗一間食懷石料理的

福ろく寿 (Tabelog 3.5分)
竟然俾間房我哋
另一枱仲有一家人, 所以我哋都要靜靜哋唔好打擾到人
後尾呢家人走咗, 我同蝸牛先生就變咗包房喇

食物方面就唔算特別好食
特別係個魚鍋, 完全無味
但個燒牛就幾好

食完飯拿拿聲去 Tokyu hand 入貨
距離收鋪仲有15mins, 真係好趕...
好彩最後都買到想買嘅嘢

旅行嘅日子時間過得特別快
今次只玩五日, 真係話咁快就完
聽日係最後一日啦

2017.08 五天東京遊 {Day 3} 築地、銀座、有樂町

2017.08.14 五天東京遊 {Day 3} 築地、銀座

今日去築地唔係為咗食壽司

而係去買乾瑤柱俾老媽

不過原來都幾貴, 原粒裝 8,000 YEN 起跳

一場來到, 最後都買咗少少嘢

可能今日係日本假期, 築地都幾多人

再加上落雨, 行得都幾狼狽

其實今日 lunch book 咗銀座一間壽司店

所以去到築地唔可以食咁飽

本來想食玉子燒, 不過超超超長龍, 只可以放棄

之後隨意買小小嘢食

本來蝸牛先生都想去喜代村食少少魚生

只可惜幾間鋪都排長龍

無緣喇~

差不多時間就坐車去食壽司喇

鮨銀座　おのでら (Tabelog 3.87)

book 位時已經訂埋食咩餐

所以去到只係 order 飲品就ok

揀咗12件的 Omakase

呢餐都幾好食, 而且職員都好nice

蝸牛先生用日文講埋單, 點知原來仲有甜品

食完之後, 個 staff 好鬼馬地叫蝸牛先生講多次

講完之後仲要話佢叻

哈哈, 笑死我~

(識少少日文, 同 staff 有交流都幾好玩, 我要努力!!)

食完之後就向銀座出發

去行吓新商場 - GINZA SIX

商場啲嘢都幾靚, 不過都幾貴

今個 trip 蝸牛先生第一杯雪糕

銀座太高檔, 唔岩行

於是行落有樂町 Lumine, 都係呢度岩行啲

入商場之際突然比我見到有 pancake 店

雖然唔係我鍾意嘅梳乎里pancake

但見佢喺 tabelog 分數都唔差

所以又去食

cafe&books bibliotheque (Tabelog 3.54分) 

去到咁岩full 咗, 又要排隊

呢個 pancake 都幾漏, 我始終都係鍾意食一陣風嘅梳孚里pancake

雖然漏, 佢味道唔差的

儲夠能量之後就起行

估唔到八月中仲有減價貨買

喺度買咗幾件幾千yen 嘅衫

有件仲要係made in japan, 好抵!

行到咁上下就要離開去食飯

今晚 book 咗去食牛

餐廳地點好隔涉, 惠比壽車站行去要成15分鐘

於是決定坐的士

估計呢度係住宅區

由於我地早到而餐廳又full 哂

所以我哋都等咗差不多半個鐘先有得入去

全日文menu 

好彩而加睇日文menu已經無咁騰雞 (大前題係個staff 唔好企我隔離, 哈哈)

不過 staff 唔識英文, 其實都有少少雞同鴨講

最後總算都叫到啲嘢食

前菜

多士旁邊堆嘢, 其實一上枱我已經覺我佢好似米田共

雖然食完都唔知佢係乜, 但出奇地好食

呢餐好食, 其中好欣賞佢嗰兩碗飯

埋單後餐廳每人有一袋小禮物

返酒店打開發現原來係吉列牛三文治

不過已經食到好飽, 唯有求其咬幾啖試下就算

臨返酒店買咗盒提子返酒店食

不過勁酸~

今日都幾充實~

2017.08 五天東京遊 {Day 2} 慢步自由之丘

2017.08.13 五天東京遊 {Day 2} 慢步自由之丘

今日無行程, 只打算輕鬆漫遊自由之丘

出發之前先去食早/午餐

近近哋去高島屋搵食

揀咗呢間雞鍋

水たき玄海 (Tabelog 3.58分) 

order 了lunch set, 另外再加菇

雞湯好好飲, 不過雞肉就無之前九州食到的咁鮮嫩

蝸牛先生個鰻魚飯都唔錯

呢餐係幾好食的, 但似乎有味精, 因為之後成個下晝我要不斷飲水

食飽之後就出發去自由之丘

前一晚發現有優惠車飛 (俗稱三角車票)

400 yen, 一日內可以任撘東急線

原本打算今日行哂下面 highlight 的幾個熱門地方

點知..........最後太攰, 只係去咗自由之丘就回程

白白浪費咗張車票

蝸牛先生第一次來自由之丘, 而我就係第二次

今日無乜特別目的地

只係想周圍行吓同食吓cake

先去蝸牛先生的 target cake shop 探路

之後就周圍亂行

食完 lunch 太口渴, 途中買咗杯柚子蜜, 不過太甜 

去咗 Cuoca 朝聖
雖然好多嘢都想買, 但懶得拎, 所以只係買咗一個麵包模

之後去景點 LaVita 影吓相 

就喺呢度發現鏡頭下嘅我好肥...好沮喪!!

雖然好肥, 但依然要陪蝸牛先生去食 cake

パティスリー・パリ セヴェイユ (Tabelog 3.98分)
我哋兩點幾去到, 大排長龍, 最後都排咗 over 15 mins 先有位
貪食嘅蝸牛先生 ORDER 咗三件CAKE, 真係無眼睇

賣相好靚, 不過甜到打冷震
估唔到咁高分會係咁.....睇嚟日本人真係好食得甜

食完cake 好失望!

之後又周圍行吓, 附近都幾多特色賣衫小店

反而之前網上見人話有好多家品店又唔多覺眼

行到差不多就坐車返涉谷

喺車稍為休息之後, 到步就去新商場 Hikarie 行吓

行到六點已經開始攰, 於是提早食晚飯
今晚想食居酒屋, 最後喺 tabelog 揀咗呢間

権八 渋谷 (Tabelog 3.48分)
食物中規中舉, 無乜驚喜

食完飯時間尚早, 又行吓街

以前好似唔多覺有呢個商場, 原來又係 0101 group

行完就返酒店

不過返到新宿我就去酒店附近的藥妝店行一陣

蝸牛先生就返酒店休息

返去食飯後果, 不過提子唔算好甜

今晚太早食飯, 去到十點幾十一點嘅時候突然覺得肚餓
但又已經沖咗涼唔想郁, 掙扎咗一輪都係無去買嘢食
最後求其食返尋日香港帶來嘅嘉頓蛋糕 (可憐!)

漫無目的嘅第二日完