2013.12.25 聖誕大快樂!

今個聖誕好快樂!!

25號朝早起身就見到窗台有堆禮物
嘩!!  原來尋晚聖誕老人 (蝸牛) 0黎0左
好驚喜~

係蝸牛先生半夜專登起身整架
佢話好擔心放0係窗台會俾人偷0左...haha


係 Celine 銀包
襯返我個手袋


蝸牛先生擔心我唔鍾意
係咁話可以拎去換款
其實我好鍾意呀!  唔太花巧, 岩我!!
(最重要係佢揀架嘛~ 係佢的心意, 我點捨得拎去換)


24號晚
我就趁蝸牛先生沖涼時將佢份禮物放0係 sofa
(今次輸0左比蝸牛先生, 製造的驚喜唔夠佢大添)

禮物係一件衫
第一次買衫送俾蝸牛先生
我都好驚佢唔鍾意 (佢呢方面比較奄尖)
好彩佢都鍾意, 只係 size 唔岩, 要拎返去換

****

25號晚, 去0左我大哥屋企開 party

今次買0左一隻大火雞 (我地有成十人, 但都食唔哂)

 

火雞 from Towngas Avenue

跟雞有燒汁同小紅莓汁

估唔到隻雞幾好食, 點埋紅莓汁仲好特別



 

元氣壽司

 

白汁意粉

芝士三文魚扒

 

 其實仲有阿鴻小吃滷水鵝半隻同我整的咸豬手

 又買了想試好耐的東海堂特濃 cheese cake


在富澤商店買0左隻聖誕老人裝飾
為蛋糕增添聖誕氣氛


2013 聖誕大快樂!!
多謝蝸牛先生~
 

婚禮 - 商戶評價 (當日攝影: Contrast Studio)

店鋪: Constrast Studio
評分: (十粒滿分)

哈哈, 估唔到結婚一年零一個月仲有得寫婚後評價
呢篇咁遲唔係因為懶
而係...一直都未揀相印相簿 (不過相的 SOFT COPY 就一早拎0左, 只係相太多, 唔願揀...hehee...)
新年前終於的起心肝攪埋佢, 上星期終於有得拎

相簿:
揀完相, around 兩至三個月有得拎, 而且相簿比我想像中整得靚, 有驚喜!!!

其實我早在十二月時已經 EMAIL 揀好的相俾佢地, 但一直未有人覆我. 之後一月忍唔住打去 FOLLOW, 最後要SEND 多次先有人幫我跟進!! 而其實之前都 SEND 過幾次EMAIL 俾佢地, 但就唔係次次都有人覆...

VIDEO:
video 就只得一隻少於一個鐘的 CD....比我想像中少...

佢地拍 video 的攝影師是 freelance 的. 因為我當日的攝影師竟然同我其中一個姊妹 wedding day 的攝影師一樣!!! 但我地係分別 join 了兩間不同的攝影公司~

相:
相就有 4 隻CD, 不過影得麻麻地, 有好多都似偷拍照. 不過, 佢地 facebook post 出來的相就堅靚, 跟我的有好大的出入, 我估係攝影師不同吧!! 其實第一次睇相, 我同蝸牛先生都覺得影得唔靚, 只係之後睇睇下先覺得順眼D.

婚後 AROUND 3 個月有 SOFT COPY 拎, 不過, 第一次拎0個隻CD, 佢 COVER 印錯0左我個名!!!! 太大意呢.....

服務:由始至終都唔覺佢地有 service. big day 前開會係我一星期前主動打去約的, 而big day 前一日佢地亦無人confirm 我時間.....
不過 big day 當日尚算合作愉快....只係....略嫌佢0地有少少 hea.....由於我BIG DAY 當日太忙, 無時間出去望 下 RECEIPTION 的 DECORATION, 以為攝影師點都會影兩張, 點知乜都無, 好失望呀!!

總結:感想寫完, 大家想唔想揀呢間公司就自己決定吧~
可能, 只係我遇著的攝影師唔好...(又要UP 多次, 我睇佢的 PREWEDDING PHOTO 真係覺得好鬼靚, 可能佢地唔岩影BIG DAY PHOTO 吧)
不過揀得佢地, 就要有心理準備樣樣自己跟得緊 D (其實都幾無癮, 俾0左錢, 但事事要自己 follow~)

回到大婚日: 2011.03.20 我們結婚了

2011.03.20: 大日子
晨早五點幾起身刷牙洗面, 之後為就煮個公仔麵打打底 (我好怕今日無飽飯食!!) 化好妝後就開始影花絮....
第一個感動位: 攝影師的指定 POSE - 媽媽為女兒著褂
當拉鏈拉上來的一刻, 不知為什麼忽然覺得好感動, 好想喊, 不過當時我忍住了....
第二個感動位: 接新娘
之後大約九點開始接新娘. 第一個 GAMES 是要蝸牛先生寫出娶我的原因, 寫完後再搵家坊簽名, 到入屋時就要將原因大聲讀出來. 最初的原因都是無聊和行貨的 , 但到最後一個我聽到後覺得好感動, 仲忍唔住滴了幾滴眼淚呢........ 0個句就是:

我想以後都同佢過!!

玩完 GAMES 就到奉茶俾長輩和收禮物時間 , 之後由哥哥負責揸主花車送我倆過男家. 而 LUNCH 時間就留在男家吃飯, 不過在吃飯時忽然覺得有點肚痛, 所以我都不敢吃太多, 累我之後覺得好肚餓 (好彩我早有準備, 一早叫伴娘為我帶了雪芳蛋糕, 如果唔係, 實餓到手軟腳軟).

之後就返女家進行回門儀式. 我們一行十多人踏進電梯, 或者是太重了吧, 電梯去到 4 樓時忽然急墜, 頓時尖叫聲四起, 我當時心想: 死啦, 我唔想著住褂等消防員救, 亦都唔想著住褂0係部 LIFT 爬出去, 今次一定見報, 好樣衰喎!!!! 而當時蝸牛先生就心想: 死啦, 今次實 OVERRUN, 無得去影相. 好彩, 最後架 LIFT 忽然間又落返地下, 於是全部人急急腳走出去撘第二架!! 總算有驚無險....

回門後就同兄弟姊妹一齊出發去海濱公園影相. 因為今早天陰陰, 還擔心會下雨, 好彩最後都可以順利出發. 影完相就直接去酒店, 休息一陣就開始轉妝換衫.

六點半證婚, 證婚前見到枱面有炒麵和串燒, 怕夜晚無啖好食, 於是九秒九秒先將它們消滅, 填飽個肚先 .

證婚時, 沒有想像中咁感動...也沒有想哭的感覺. 當時的我, 只是在意婚紗正在下滑中 (我估應該好多張相都會見到當時我係勁望住自己心口的). 證婚完就要轉妝換衫出來迎賓.

跟客人影相到差不多的時候, 又要返入去轉妝換婚紗準備進場 (不斷換衫其實都幾攰!!).

我們的進場形式是: 蝸牛先生在入面唱歌, 唱到一半就出來拖我入去. 在出面等的時候, 忽然覺得緊張....不過呢個感覺好快又消失了 ...

之後成晚就不斷換衫轉妝, 攪到都無乜 MOOD 出去同人影相閒聊 (其實都無時間).

雖然中間出現了一段小插曲 (蝸牛先生準備了三首歌想唱, 但 FINAL 只唱到兩首), 而我其中一個造型都因為趕時間而整得麻麻地.......但當日總算順利完成.

回到未嫁時: 2011.03.19 婚前一日

前幾日拎返隻 "早拍晚播" 出0黎睇, 先醒起原來我無寫過大婚當日的心情係點的, 趁而加仲有少少記憶, 一於回到未嫁時~
2011年3 月 19日: 婚禮前一日
心情: 混混噩噩, 還未有緊張的感覺
下晝同蝸牛先生去拎衫, 拎花球, 而哥哥就做司機負責接送. 當日的拎衫過程都尚算順利, 沒有想象中辛苦, 幾個鐘就攪掂哂.
夜晚我所有的家姐哥哥都回家跟我吃單身的最後一餐, 好熱鬧!!! 食完飯就開始佈置屋企 (其實只是貼上 "囍字貼" 和執拾一下雜物而已), 到十點鐘左右就上頭了, 當時的我仍然是沒有什麼特別的感覺, 只想早一點上床瞓個靚覺.
婚前一晚, 其實唔多唔少都有點不捨得. 婚後搬得離娘家遠, 不會時常都回去, 跟屋企人見面的時間都會少了. 而這個家, 這張床....又跟我相處了幾廿年, 好唔捨得呢. 又因為我倆的新居地方不大, 所以好多東西都沒有帶過去....(我好多芝麻街精品都要被迫留在娘家 ).
十一點多就上床, 但輾轉反側, 花了個幾鐘才可以入睡, 不過成晚就不斷醒, 到第二朝起身時好似無瞓過一樣...
婚前一日, 就這樣平平淡淡的過去了...

婚禮 - 商戶評價 (花球: Cherish Wedding Decoration)

店鋪: Cherish Wedding Decoration
評分: (十粒滿分)
有次遊 BLOG 時無意中發現了這間公司, 其實它主力是做 decoration 的, 但吸引我的卻是它的花球 (不過, 它的 decoration 都好靚, 只是我好早已經 confirm 了佈置公司).
我對花沒有多大的認識, 於是在婚前找了一堆我喜歡的花球給 Cherish 做 reference, 結果負責人 Ron 好快就給我定好款式, 而且最後還很合我心.

Cherish 的公司在新蒲崗, 原本我擔心地方隔涉, 取花不方便, 但原來客人可以揀在九龍塘交收的. 不過, 在取花前一天跟 Ron 聯絡, 發現她當天會到我家附近, 所以最後她把花球送到我家樓下 , 很好人呢!!
我揀的花種是淺粉玫瑰襯白色小花, 我又怕這兩種花不能襯褂, 於是我又打給 Ron, 但她叫我放心, 她會替我準備一些頭花襯褂用的.

Cherish 的價錢好合理 (這是我揀它的其中一個原因), 但扣分位在花不夠新鮮 (但可能是因為玫瑰易殘吧), 有興趣的可去他們的 BLOG 望望.
相關 blog: 大婚日鮮花球 confirmed

婚禮 - 商戶評價 (租褂: 鴻運繡莊)

店鋪: 鴻運繡莊
評分: (十粒滿分)
我是在婚展時落訂的, 所以可以用優惠價去租褂 (根據 price list, 大約便宜三百至六百蚊不等).
揀 <鴻運> 的原因, 是因為我愛老字號褂鋪, 而它的鋪頭又在尖沙咀區, 比較方便我一次過去拎衫和還衫. 而由於我覺得每套褂的款式都差不多, 所以我一直都懶懶閒無去揀褂. 直到婚禮前三個月, 他們打電話來催促我上去揀褂, 因為怕我太遲到時沒有了我想要的款式和 size, 所以提醒我要盡快抽空上去. 我估應該無乜新娘子係要人催先上去揀款的.
上到去, staff 先問我大約心目中想要怎樣的款式, 例如, 多金線 or 多紅色的? 我沒有 idea, 於是 staff 就俾哂兩類我試, 期間可以隨意的試上身 (下半身除外), confirm 好款式後就可以影相留念.
這裡的褂, 最細去到 XXS, 但要 addition 加 $200. 我覺得不要太慳, 因為褂要 fit 身才好看的 (而我都估唔到我需要著 XXS 囉..haha). 另外, 拎褂時亦無需交低按金, 我覺得幾好 (起碼唔駛怕還衫時俾人無理扣票).
我沒有揀好多人都 like 的小/中五福, 反而揀了 "水晶金魚" (其實個名都幾攪笑), 有什麼喻意我就不知道了, 只知這件我穿上後較為順眼. 本來以為水晶褂會比較特別, 又以為會好閃, 但原來出來效果只是一般, 不太閃, 有點哂錢的感覺 (我呢件的價錢是小五福的2點5倍, 嚴重 out budget!!!!)

我的褂其實不算新淨, 如果細心看其實會見到有少許勾線的, 但就不算太嚴重 (我回家後才發現呢, 還擔心還褂時會遭到留難).
之前睇別人的 blog 說, 還衫時它們會把褂驗屍咁驗, 但好彩又沒有發生在我的身上, 店員望兩望就收貨了, 過程好快.
整體上, 我都幾滿意這裡的褂, 如果它們的價錢可以定低一點, 我會更滿意 (它的褂比上海街那幾間是稍為貴一點的).

婚禮 - 商戶評價 (場地佈置: Wedding Art)

店鋪: Wedding Art
評分: (十粒滿分)

其實我好喜歡這個 backdrop, 款同顏色都好合我心意, 而且款式又不會有似曾相識的感覺....(不喜歡有些佈置公司, backdrop 永遠是只換顏色不換款, 太沒新意了..)

我六點半註冊, 本來擔心趕不及佈置, 結果是...它們好早就攪定了...good!

Staff 好 helpful, 會按我們的 budget 去遷就個 design, 但因為酒店的台是老土紅地毯, 所以我們要額外加鋪白地毯上去, 令到 final 埋單的價錢有點貴, 但都無計.

Design 的草稿其實是在婚前5 天才 finalize 的, 時間有點趕..如果它們可以早點交圖, 就可以令新人安心一點.

本來已 finalized 的 design 不是這樣的, 但在婚前幾天, 它們再 send 來這一個 design, 說這個比較清雅....我倆都覺得這個比較好, 所以 final 就用了這個. 雖然我倆之前已 finalized 了, 但它們仍然會為我們想更好的....抵讚啦!!

我覺得 Wedding Art 是值得推介的一間 decoration 公司.