2016年12月26日星期一

2016.11 大阪 {Day 3a} 大阪瘋食

2016.11.28 大阪 {Day 3a}大阪瘋食

返到來大阪嘅第一日, 一早起身就出去搵食
一直都好想試呢種梳乎里 pancake
今次來到大阪終於都試到

幸せのパンケーキ梅田店 (Tabelog 3.52分)
因為怕要排長龍, 所以我哋十點幾就去到
結果..平日嘅早上不用排隊, 直入

由於之後要去食拉麵, 所以我哋只 order 了一份 share
香蕉 pancake
pancake 好鬆軟, 又唔會太甜, 我哋覺得好好食 
有機會要再來食

另外再 order 了飲品

離開 pancake 店, 就去食正餐

らーめん 弥七 (Tabelog: 3.82分)
拉麵店開十一點, 我哋十一點幾去到就已經要排隊了
不過呢度好好, 係派籌制
職員會叫你大約幾點返返去

不過附近主要係民居, 無乜嘢行
有個公園, 不過唔太多設施

差不多時間就返去啦

 呢度拉麵款式唔多, 我揀咗醬油拉麵
麵條係我鍾意嘅粗身拉麵, 湯底唔會過咸, 好飲
整體都好食嘅, 但就唔會有想返食嘅感覺

蝸牛先生嘅鹽味拉麵
可能佢加了大量嘅蕃茜, 湯底有少少西式嘅感覺
蝸牛先生就覺得唔錯, 但我就比較鍾意傳統嘅醬油味

食完拉麵之後, 就開始我哋嘅 shopping 之旅
今日我哋行咗 EST, Hep five, 阪急
行到咁上下就返酒店小休同順便放低戰利品

返去之前先去超市買少少嘢食
松阪牛壽司, 味道都唔錯, 幾好

魚餅就普普通通

蛋糕 @五感 阪急百貨
蛋糕好鬆軟, 不過我就覺得甜咗少少

休息完就出去行埋 LUCUA
行到咁上下就坐的士去食飯啦
(梅田區都幾難截的士, 我哋最後要行返去車站附近先有車)

由於晚飯相太多, 所以要下個 post 再出..

待續.....

2016年12月24日星期六

2016.11 大阪 {Day 2b} 大阪到著

2016.11.27 大阪 {Day 2b} 大阪到著

由於呢日落大落, 所以我哋只係去咗三個景點
離開とれとれ市場之後, 我哋決定提早返大阪

先去酒店 CHECK IN
今次住 Granvia Osaka, 地點超方面, 就在梅田大丸旁邊
CHECK IN 時, 職員撩我哋加錢 upgrade 間房
我聽錯咗 200 yen 一晚, 見咁抵當然 up 啦
 但最後 check out 時先發現原來係 2,000 yen 一晚
不過, 間房同張床都好大, 都算無白俾

第一日落機時喺機場用托運將行李先送來酒店
check in 完就叫職員拎埋比我哋
點知佢推咗兩個唔屬於我哋嘅喼出來
嚇到我以為啲件行李寄失咗
好彩只係職員拎錯
咁大間酒店, 估唔到咁失魂

喺房休息一陣之後就爭取時間出去行下
去咗我最鍾意行嘅 Tokyo hands
之後就去食飯
今晚 book 咗一間食蟹的餐廳

想食蟹但又唔想次次都食蟹道樂
於是蝸牛先生就喺 Tabelog 搵到呢間

香住 北由商店 (Tabelog 3.6分)
兵庫県美方郡香美町香住区若松691-3

呢度全日文menu, 全日文staff, 真係好難溝通
見到個外國人樣嘅staff 以為可以講英文啦
點知, 佢唔識英文的!!!!!
最離奇係我講日文單字佢都唔明喎~
不過, 好彩menu 有圖, 勉強都知係乜

呢碟蟹膏嘅前菜, 都幾好食

Order 呢碟嘅時候, 個鬼仔不斷依依哦哦唔知佢 up 乜
最後我哋估係因為呢碟嘢同上面佢送嘅前菜係一樣掛

魚生都幾新鮮

燒蟹腳
其實每人張枱都有兩支醬汁用來點蟹的
但唔知點解咁岩我哋張枱無喎
於是問個鬼仔拎啦, 但佢英文唔明, 日文又唔明
我哋指住 menu 入面堆醬, 結果佢幫我哋落多一碟
頂!!  好彩唔算大碟, 如果唔係真係食唔哂
個鬼仔領悟能力真係超乎常人!!!

無汁點嘅蟹淡而無味, 麻麻哋

成晚最正係呢條魚

蟹飯, 普普通通

牛肉壽司就幾好味

呢餐唔算好貴, 但味道偏普通
加上個鬼仔 staff 實在唔知想點
連最初指住隻有污漬嘅碗叫佢換但佢都唔明!!!!
(不過都真係第一次喺日本見到啲碗筷唔乾淨)
所以呢度唔多推介

離開之後喺街口見到間賣魚仔餅的
於是又買咗一件來食

我哋揀咗蕃薯味, 都幾好食

返到酒店就食士多啤梨

第二日嘅旅程就係咁完滿結束啦~

2016年12月17日星期六

2016.11 大阪 {Day 2a} 白浜 千疊敷 / 三段璧 / とれとれ市場

2016.11.27 大阪 {Day 2} 白浜 千疊敷 / 三段璧 / とれとれ市場

一早起身望出露台, 白濛濛一片, 好大雨呀!
個心即刻灰咗一灰, 因為今日主要係戶外活動
不過都無辦法, 唯有希望食完早餐後會停雨

海舟嘅早餐係非預約形式的
只要喺特定時間去到餐廳就得
呢個安排我都幾buy, 因為去旅行要瞓到自然醒先至夠 relax 

呢度嘅早餐都幾岩我食, 因為熱盤多
我真係好怕晨早流流食咁多冷盤

其實早餐前有去貸切風呂嗰邊望下, 不過都係全full
食完早餐死心不息又走去望下
今次有位喎
難得有位唔理岩岩食完早餐都去浸

貸切風品有三個, 今次我哋浸石匠之湯

個風呂唔算好大, 不過有view
相信如果晴天會更靚

lobby 有免費梅子水供應, 浸完出去飲返杯凍冰冰嘅嘢都幾舒服
休息咗一陣打算返房
路經貸切風呂門口, 又八掛走去望下有無位
咦....又有喎
於是決定又走落去睇下

今次係梅香の湯


 都係大同小異, view 差不多, 所以我哋浸咗一陣就返房

check out 時間係十一點, 食完早餐, 浸完兩次溫泉都仲有小小時間瞓個覺
住下住下, 又覺得呢度幾舒服

check out 完雨都仲未停
喺 lobby 等咗陣, 但啲雨都係無細到
所以最後都係決定出發

下一站景點係千疊敷
由海舟行過去只係 around 十幾分鐘腳程
如果唔落雨都幾好行
兩人只用一把傘, 每人半邊身都差不多濕哂
好彩呢度有間物產商店, 即刻入去買多把傘


落雨之下嘅千疊敷完全唔覺得靚
如果唔係落雨, 都可能會走落去玩下
不過落雨就費事啦

逗留咗一陣, 之後就出發去三段璧
由千疊敷行過去, 都係大約十幾分鐘腳程

入面其實無乜嘢睇, 大約十五分鐘已經可以行完


行完岩岩好趕得切坐巴士去 とれとれ市場

依然係落緊雨

入面有乾濕貨, 無想像中咁大
撞岩有解體 SHOW
我覺得個刀手有點似變態佬

之後買咗少少刺身同海鮮去燒烤
(刺身係幾新鮮的, 不過燒烤就唔多抵)

蝦同象拔蚌我哋揀咗燒烤同刺身各一半, 呢度係半份
買嘅時候, 隻象拔蚌明明好大隻, 點知........出來得咁少


懷疑被騙, 左下兩隻螺係食唔到架, 入面好似石頭咁硬
無記錯仲要成 700 yen 一隻!!
其他海鮮亦唔覺得有咩特別, 唔怪得燒烤區剩係得香港人, 無日本人啦
(基本上好似九成都係香港人)
不過好彩我哋只係買咗好少嘢~

食完之後就坐的士去車站返大阪啦

返大阪要兩個幾鐘頭車, 岩岩又唔算食得好飽
所以決定上車前買多盒壽司醫肚
(早知喺とれとれ市場 買啦)

第二日 待續...

2016年12月11日星期日

2016.11 大阪 {Day 1} 白濱 海舟溫泉

2016.11.26 大阪 {Day 1} 白濱 

年底壓續大旅行 - 大阪九天梳乎之旅
今次 7:50 起飛, 5 點幾要出發去機場
前一晚竟然完全瞓唔著, 眼瞓到傻

*****
原本第一日想出發去和歌山浸溫泉
不過想住嘅溫泉旅館已經滿咗
所以最後唯有改去白濱

不過白濱嘅溫泉旅館比較舊
我哋揀咗好耐先決定到住邊間

海舟 (房型: 波の抄)
http://www.hotespa.net/hotels/kaisyu/

呢間應該好多香港人都聽過
最初唔太想 book 佢係因為唔想遇見太多嘅香港人
但最後無乜選擇下都唯有揀佢

一落機, 我哋先將行李寄去大阪嘅酒店
拎完行李過哂海關之後, 出去向左走向右走都會有快遞公司
而我哋就揀咗向右走
寄件過程比想像中快
兩個 28 寸大喼運費為 JPY 3,800
唔平, 不過總好過拎住佢喺白濱周圍走

由於過程一切順利 (飛機無DELAY, 寄行李手續又簡單快捷)
最後竟然可以趕到早一個鐘頭嘅火車
本來預計六點先會去到白濱, 而加未到五點就到啦, 賺咗

關西空港 >> 日根野 >> 和歌山 >> 白濱
其實機場由過去白濱無乜 so, 車程同大阪出發差不多, 而且仲要轉兩次車
但就可以慳返由機場出市區嗰程時間

兩個鐘多少少就去到白濱
今日天色麻麻

今日為咗趕車, 食完早餐就無正正經經食過嘢
(好彩預先喺香港買定一袋麵包醫肚) 
所以入溫泉酒店之前先去車站附近買少少嘢食

雖然有免費巴士/ 付費巴士去酒店
但因為中途勁多站, 所以我哋就直接坐的士過去
的士站前有料金表, 可以大約知道車費係幾多

去到酒店有人帶我哋去 check in
先喺大堂度等, 無 welcome 小點心, welcome drink 就要自己去拎
之後 check in 完無人帶我哋入房, 而且要自己拎住行李上去
住過咁多間, 咁嘅安排真係第一次
老老實實, 第一印象唔多好

房就正常, 只係細咗少少

個私人風呂都比較細

VIEW 都 OK
對住一個大海, 可惜當日天氣唔好

巡視完間房就食頭先喺車站附近買的壽司便當

望住個海休息下其實都幾舒服

呢度食飯時間分兩段, 五點半同八點
我哋咁肚餓其實好想揀五點半, 不過已經 full 左
(另一個原因想揀五點半係因為呢度十點至十一點有免費拉麵食)

食完便當, 喺房浸完溫泉都仲有耐先有飯食
無所事事就唯有瞓晏覺
(今日舟車勞頓都咪話唔攰)

終於都捱到七點半
出去貸切溫泉望下, full 哂

諗住早啲去食堂可以早啲食
點知係唔得嘅, 一樣係等到八點先可以入去

一坐低就叫我哋 order 飲品 (額外付費)
蝸牛先生揀咗清酒

前菜

呢隻剌身船好精彩
剌身好新鮮, 另外入面仲有少少熟食, 而且份量唔少
我哋覺得都幾好食

炸物

鮑魚好新鮮, 同埋都算幾大隻

茶碗蒸
 主食可以揀烏冬 or 魚生飯
我揀咗烏冬, 味道就無乜特別

蝸牛先生揀咗魚生飯, 佢話都幾好味

甜品: 普普通通

呢餐食到好飽, 已經無胃口再去食免費拉麵
返到房例排浸多次溫泉就瞓覺
不過生寶床, 呢晚又瞓得唔多好