2018年8月4日星期六

2018.05 首爾行 Day 4 Last day Seoul 落大雨

2018.05.22 Last day Seoul: 落大雨

最後一天, pancake 控終於出動
之前搵咗幾間比較受歡迎的 pancake 店
最後決定食呢間

弘大  Paulin pancake
呢間 Pancake 店其實唔係開咗好耐
當日我哋未夠十二點就去到
好彩仲有有位, 可以即入
再遲多十分鐘就已經無哂位啦

一份 pancake 兩個人 share, 然後再各自一杯飲品
我哋揀咗呢款清清的香蕉 pankcake

味道同質感都唔錯, 同日本食到的差不多 
(不過當然我都係覺得日本的幸せのパンケーキ 好味啲)
好彩無揀錯~

食完之後就喺弘大最後衝刺
呢度啲衫真係好鬼抵, 件件都百幾二百蚊有交易
最後都執咗幾件衫同兩條牛仔褲返去

行到咁上下要去食個正正經經嘅 lunch
雖然蝸牛先生麻麻哋人參湯飯
但因為我鍾意, 所以佢就陪我去食
(蝸牛先生真好~)

百年百歲蔘雞湯
呢間網上都有好多人推介
之前有人講過話佢份量好大, 可以兩人share 一碗
但似乎係唔得的
兩個人入去, 係要 order 兩碗的

鮑魚人參雞湯
我好鍾意人參雞湯, 相信冬天飲的話, 感覺一定好正
不過真係好大碗, 最後飲到好飽好飽
(其實應該有味精, 我記得之後都有啲口渴)

黑蒜人參雞湯
黑蒜味太搶, 我比較鍾意普通版的人參湯多啲
但蝸牛就話覺得有黑蒜好飲啲

食完就再繼續行弘大
點知行行吓開始落雨, 仲愈落愈大
最後行多陣就返酒店

而蝸牛先生就去外賣雪濃湯帶返香港
雖然今次飲完無上一次咁驚喜
但都依然覺得幾好飲
同埋佢啲泡菜好好味
後悔無買多幾盒返香港

喺酒店執拾吓, 見無乜嘢做就決定早少少去機場
7:45 機, 我哋三點就出發去機場了

今次住弘大, 可以直接行去坐機場鐵路
不過其實都要行成十幾分鐘先去到月台, 好彩我哋行李唔算多

由於弘大係中途站, 所以無位坐
以為去到金浦機場會好啲, 點知都係無乜人落車
最後, 企咗成個鐘終於到機場

蝸牛先生習慣要食飽飽先上機
T2 呢面感覺比 T1多嘢食
最後蝸牛先生揀咗食呢個

之後就去退稅
T2 呢邊又係無乜人, 而且自助退稅都好方便

退完稅又忙住要去樂天DUTY FREE 拎貨
跟住就結束今次四日三夜的首爾之旅

首爾, 唔知幾耐之後我哋先再見啦

2018.05 首爾行 {Day 3} Celine 控

2018.05.21 {Day 3} Celine 控

今日去食醬油蟹
喺弘大坐的士過去, 又係兜咗好遠路
又上山又落山, 我差啲以為被賣豬仔
如果再去韓國, 下次我一定會拎單, 然後再記低司機資料, 哼!

大瓦房
網上見到好多人都激讚
原本打算 book 位, 點知店方話唔接受外國人預訂

去到大約十一點鬆啲, 無位
好彩只係等咗十五分鐘就有位

order 完餐就會送上小碟

雖然醬酒蟹出名
但我玻璃肚唔敢試
蝸牛先生怕一個人食唔哂, 所以都無叫
最後佢叫咗醬蟹拌飯
我試咗少少, 覺得好鮮甜, 好味
蝸牛先生清哂

鰻魚係另一款出名的食物
雖然無醬蟹咁標青, 但都好味
跟餐有碗湯 (無出到鏡)
我覺得好好飲

呢餐好滿足
雖然又係好多港人, 但味道真係唔錯

食完就沿途行出去, 路經見到個地方幾得意
又入去行吓影吓相

買完入場劵都無留意呢度係景福宮
(直到行完行去車站見到係景福宮站先知)

入面都幾大, 但行來行去嘅感覺都差不多

離開呢度之後, 就向明洞出發
其實今次嚟韓國除咗係想食韓牛之外, 仲想去Celine 朝聖吓
出發之前已經喺香港睇中, 不過價錢太貴所以無買
而韓國買就可以平兩, 三千
咁當然都要去睇吓

我哋去咗新世界百貨
先去佢嘅 Duty free, 不過無我想要的款
之後落 shop 八掛吓
有喎, 雖然唔係我原本睇中嘅色
但試完之後又好想買, 雖然比香港平, 但都係好貴

之後蝸牛先生話同我去飲杯嘢冷靜吓先


掙扎完一輪, 最後都係........

財散人安樂, 之後行程去邊都無所謂了
喺附近行多陣就出發去食晚飯

今晚去食海鮮鍋, 地方有點遠
由明洞坐地鐵過去大約要九個字

 八八海鮮鍋
我哋六點鬆去到, 竟然岩岩好無位, 要等
原來韓國人興咁早食飯!!
最後都等咗大半個鐘

我哋 order 咗一個小size 的海鮮鍋 (夠2-3人食)
個鍋上枱時真係好澎湃 
入面有唔同嘅貝殼類, 有蝦, 有帶子, 鮑魚, 魷魚, 仲有半隻龍蝦
除咗貝殼類外, 食之前會有OPPA 幫你將啲海鮮剪到入到口嘅 Size
所以呢個鍋係可以好優雅咁食的
材料全部都好新鮮, 只係貝殼類太多, 食食吓有啲厭

去到中段其實都已經開始飽, 不過一定要追加麵
雖然只係方便麵, 但個麵吸哂海鮮的精華, 真係好正
(而加見到都想食)

食飽之後就搵的士去永浦登 e mart (超市)
今次發覺韓國都幾難搵的士
等咗好耐先有車

呢間超市雖然比首爾站的樂天超市細
但基本上想買嘅嘢都會有
而其實而加韓國零食喺香港都好易買到
所以係咁倚掃少少返去就夠了

離開超市, 有人話今晚嘅宵夜想食cake
記得酒店附近個商場有間賣 cheesecake 的, 就帶蝸牛先生上去

(去完 cake shop, 有人又要去air jordon 店巡視吓, 不過今次都係無買)

cafe C27 CHEESECAKE & COFFEE @ 弘大 K Square

雪櫃有成十幾廿款, 超多!!
之後上網睇返, 原來呢間都係人氣蛋糕店

兩人share 一件, 應該唔會太邪惡掛

件 cake 都唔錯, 唔會太甜
芝士味濃, 但又唔太感覺好漏
如果有機會, 下次都想再食

食完就要執行李, 明天返港了

2018.05 首爾行 { Day 2} 嘗 米芝蓮韓菜 [羅宴]

2018.05.20 {Day 2}嘗 米芝蓮韓菜 [羅宴]

今日 book 咗餐廳食 lunch
出發之前先去唱錢, 不過弘大無明洞咁多找換店
而且 rate 又無咁好
不過我哋手上現金唔多, 唯有焗唱
行來行去, 最後終於搵到網上多人講的 Travel depot
預計今日都會去明洞, 所以唱住少少先

唱完就坐的士去餐廳啦
我哋坐咗好耐的士, 同 google map 預計的車程遠咗一半
我估應該被兜路了!!
後來發現其實係有渠道舉報不良司機的
(詳細按呢度)

今日食 lunch 的地點: 羅宴 @ 新羅酒店

由於呢度係米芝蓮三星 + 雙宋都係喺呢度結婚
所以我哋嘅期望好高

坐低就有兩碟"前菜"

薄脆: 無乜味道, 但得閒食兩啖又幾好食

紅棗亁: 呢碟我好欣賞, 甜甜哋又脆脆哋, 有啲後悔無問佢有無得買

request 咗窗口位, 有 view 睇吓都唔錯

蝸牛先生order 咗一 set tasting wine

呢度的食物同一般的韓國菜唔同
味道比較清淡, 唔會好濃
由於唔算特別好食, 所以無下次想再來的感覺
一生人, 試一次就夠了




網上睇人哋呢個飯以為好正, 點知食落味道只係普普通通
無乜味, 太清







反而甜品我覺得幾好味

嗰杯糖水都唔錯的

食完就出去欣賞吓風景
當日雙宋就係喺呢個花園完婚架啦

跟住就行咗過隔離的 duty free 兜個圈
入面好多大陸人, 所以無乜特別都係走先

之後就坐返 shuttle bus 出去東大入口站再轉地鐵去明洞

明洞其實都幾多嘢行, 只是人太多
有人又去買雪糕

行到咁上下又出發去食晚飯
今晚要去搵我朝思暮想的韓牛

今晚目的地係大都食堂
又係坐咗一架行咗好耐嘅的士

可能時間尚早的關係 (六點鬆), 去到唔駛排隊
好緊張!  
上次喺馬場洞食完韓牛後就一直念念不忘
今次轉場試吓呢間都多人推介的食堂

全店只有一個餐 (入面有不同部位), 所以坐低後係唔駛點餐的
不過兩個人食一大盤, 其實有啲漏
加上全晚就只有牛, 食食吓有少少唔想再食落去嘅感覺
下次都係想去返馬場洞, 或揀啲有其他肉嘅鋪頭會好啲



其實最後仲可以追加蘿蔔泡菜炒飯的, 但已經食唔落所以就無要了
不過見到隔離個飯又好似幾正, 無緣~

食飽之後去咗東大門
雖然有好多商場, 但唔係個個都岩行
有啲 MK feel 唔太想行, 有啲就純批發太花多眼亂
只有樂天fitin 係感覺好少少

行完都成九點幾十點
今次我哋坐地鐵返去
返酒店前去買炸雞做宵夜

TwoTwo 炸雞 (弘大店)
雖然唔肚餓, 但一場來到韓國又想試吓炸雞
酒店附近有間 TwoTwo 炸雞店
一於買盒返去試吓

入面大半間店都係港人, 好誇張
外賣等咗差不多十五分鐘

諗住呢間咁出名諗住實好食啦
點知........

雞唔入味, 而且唔滑
失望~

食完炸雞仲要食岩岩東大門買的士多啤梨
(好紅好靚, 點知得個樣, 麻麻哋)
真係飽到上心口


2018.05 首爾行 {Day 1} 兩年一次首爾行

2018.05.19 兩年一次首爾行

同蝸牛先生喺佛旦嗰陣快閃咗首爾四日 (請一日去四日)
不過機票就貴咗少少 (三千一個人)
今次第一次坐大韓航空, 感覺都唔錯 (係機上的戲少啲囉)
揀咗中午十二點幾班機出發
終於唔駛倒塔咁早出機場, 好 relax

仲以為個飛機餐會好韓式, 但原來都唔係
同埋我覺得味道麻麻

由香港出發去首爾只有大韓會喺 T2 降落
呢邊好新, 而且無咁多人
好快就過到關, 好正

之後就坐機鐵去弘大
今次住呢間今年先新開的酒店

L7弘大
地點好方便, 好近地鐵口 (弘大站 1號出口, 行幾分鐘就到)
因為我係好早之前 BOOK 的, 所以有開業優惠, 好抵住
(呢間仲係免稅的)

Check in 要先上21樓
雖然係自助 check in, 但有職員喺旁邊幫你的
而且過程都好快 (連passport 都無影印!)

房的空間感唔錯, 仲可以睇到日落 (呢個係晚上七點半的日落)

休息陣就急不及待出去行吓
酒店附近有間好大的 Air Jordan SHOP
我同蝸牛都心思思想買返對
不過最後都係睇唔岩

之後就去搵食
上次無機會去呢間好多人都話好食的豬手
今次住弘大一定要去食
 去到時都有堆人等緊位
不過等咗十幾分鐘就有位了

Myth Jokbal

沙律
點豬手送沙律, 可能係要中和豬手的漏


配菜


蒜蓉豬手
可能對佢嘅期望太大, 有少少失望
佢味道偏甜, 同我想像中有啲偏差
而且食咗幾舊就覺得好漏, 唔想再食落去

湯麵
呢個湯麵都無想像中咁好味


呢餐雖然未至於難食, 但唔係我杯茶
食飽之後就開始行街啦
弘大的夜晚好熱鬧, 鋪頭好多都未收
有人行行吓買咗杯邪惡的香蕉朱古力

行完街見時間尚早, 於是決定坐的士去永登浦的樂天超市
弘大坐車過去都唔近 (都唔知係咪被兜路)
落咗的士後見條街黑媽媽, 又無乜人, 仲以為去錯地方
原來要行去另一邊先見到入口

睇介紹 (GoTrip) 以為好多嘢行
點知個超市唔太多嘢買
買咗完嘢後就截車返酒店
等咗好耐先有車
上車後的士司機又唔多識路
又係左兜右兜, 完全同我個 google map 路線唔同
不過雞同鴨講, 唉...想出聲都唔知可以點出聲
最後, 去到酒店附近就叫咗佢停車
如果唔係唔知佢想兜到幾時

落車地方好近雪濃湯
上次飲完覺得好好飲, 我一直都好掛住
又覺得湯做宵夜感覺唔太好邪惡
所以就決定買碗返去

跟湯會有白飯同泡菜
佢啲泡菜其實都幾好食
由於我勁鍾意用泡菜送飯
所以忍唔住又爬咗幾啖飯

不過弘大呢間無明洞嗰間咁細心
上次外賣會有鹽跟埋的
今次係無, 所以唔多夠味~

第一日的行程都算幾豐富
無預算下竟然玩到差不多十二點仲食埋宵夜

2018.04 女子東京一人旅 {Day 4} 圓滿結束

2018.05.03 女子東京一人旅 {Day 4} 圓滿結束

起身 check out 之後就喺涉谷漫無目的咁行
先去涉谷西武買麵包食
之後再行0101, abc mart....
跟住又去睇吓波鞋
最後買咗呢對香港都有嘅 adidas (暈)

行到咁上下, 去車站改返遲少少張車飛
跟住就去食烏冬

山下本気うどん (tabelog 3.52分)

本來想食熱烏冬
點合叫錯咗凍烏冬
 不過好彩佢都唔算太冰
烏冬質地煙煙韌韌, 有機會都再想來試吓熱烏冬

食完就返酒店拎行李出機場

因航而加無人坐, 我來回旁邊都係無人的

麻麻哋

第一次的一人旅終於都圓滿結束
一個人去旅行其實都幾 FREE
所有嘢都好彈性, 好隨意
今次的經驗都好難得, 亦幾好玩

不過, 中途其實都有掛住蝸牛先生
食到好食嘅嘢都好想同佢一齊分享
一人行同二人行比較
我會覺得二人行開心啲