2014 大閘蟹宴

呢兩個月要攪裝修又忙OT

簡直係忙到癲咗

就連食蟹都要押後

月頭終於都入咗伙

安頓好哂後就急不及待蒸蟹

今次都係揀返老字號老三陽

來自陽澄湖的

@ $180 and @ $120 each

先食貴價蟹

SIZE 大 D, 約有五至六兩重

大特寫

打開蟹蓋, 見唔係咁多膏, 有少少失望

但原來好戲在後頭

打開蟹身, 就見到入面好多膏

不過掛住食, 無影相

蟹粉雲吞麵

今年已經食過一次蟹粉小龍包

所以今次買雲吞試下 

@ $128 / 打

入面個餡其實同蟹粉小龍包一樣

我覺得幾好食同埋好似無咁漏

薑茶湯丸

買完蟹又專登落返炮台山買湯丸

芝麻& 花生湯丸 @ 福元湯丸

鍾意食佢的湯丸, 唔會太甜, 又唔會太漏

自家薑茶好飲, 可以自己調較甜度, 只係煮得太辣

今餐食得好滿足

第二日仲係不斷回味中

哈哈, 好想再食多次

2014.10.25 {觀塘} Lunch @ 上海榮華川菜館

今日又同蝸牛先生出去搵食

因為之後想去 Mega box 睇家品

所以我地去了觀塘區

蝸牛先生帶我去了一間上海老鋪

0係 openrice 有成 186個 like 架, 真係唔簡單

上海榮華川菜館

觀塘崇仁街15號地下

地鐵站行過去大約七, 八分鐘

原來佢同大孖醬油同一條街, 入伙後我一定會過來入貨

話明係老鋪, 裝修一定欠奉

可能我地當日坐近下欄位

感覺都幾污糟, 同埋有陣味

老老實實, 我就真係食得唔係幾自在

點了二人餐

有湯, 有小菜, 有甜品, 都幾豐富

酸辣湯

比想像中辣, 味道都唔錯

回鍋肉

 呢碟反而普普通通, 不過勝在唔太油

小籠包

呢個係另點的, 三十幾蚊有六隻, 勁抵!!

(上 facebook like 佢地個 pages 仲加送兩隻)

味道 ok 的, 不過嫌佢皮太厚同埋無乜肉汁

八寶茶

呢杯茶好飲, 甜度適中, 而且入面的材料好似好有益咁

豆沙鍋餅

一上枱見到咁黑, 心諗: 一定唔多好食

點之, 有驚喜喎

以為佢炸到咁黑, 一定好油

但食落又唔覺油

而且豆沙又唔會太甜, 好味!!

雖然係老鋪, 不過佢管理都幾現代化

有流程圖比員工, 教佢地點去招呼客人, 教佢地點安排坐位

我地又同疑似老板娘的人傾計

佢話呢d 都係屋企的細路幫手做

希望佢地讀書可以學致用, 幫到手之餘, 仲可以比機會佢地實踐

呢類的家族老鋪0係香港已經買少見少

而加0係新市鎮見到的全部都係連鎖式的食店

想食好0野真係要落返舊區先搵到

＿

食完就同蝸牛先生去 Mega box

等0左好耐都無 shuttle, 唯有撘的士

到走0既時候, 又係一大條龍

呢個商場實在太唔方便

如無必要真係唔會再來

2014.10.04 {灣仔} Lunch @ 神虎拉麵

今日要去灣仔睇裝修材料

出發前先醫肚

蝸牛先生就帶0左我去食拉麵

神虎拉麵

灣仔 廈門街 23 號

店鋪位置就在新樓盤喜匯附近, 唔難搵

鋪位細細, 一貫日式拉麵店的風格

拉麵種類有五款

而除0左拉麵以外, 仲有餃子, 沾麵, 飯

有三種不同的配菜任食

芽菜

辣辣地, 幾好味

神虎拉麵 @ $83

湯底: 好香濃的豬骨湯底, 唔會太油, 我覺得好好飲, 而且飲完唔會好口渴

玉子: 有少少酒香, 蛋是半熟的, 好味!!!

黑虎 @ $73

湯底: 賣點係黑蒜味的豬骨湯底, 我覺得比神虎湯底更香更好飲

基本上麵的材料同神虎一樣, 只係佢無蛋

(我強烈建議要另加一隻半熟蛋, 因為隻蛋實在太好味)

對女仔0黎講, 我覺得 size 岩岩好

食完唔會覺得太漏太滯

我覺得呢間可以再來

*****

今日另一個任務係返新屋收貨

岩岩 order 完個麵就收到運輸的電話

好彩叫0左佢一個鐘頭前打來

如果唔係都唔知點算

今日又再 K.O 多一樣

要揀的已經揀得七七八八

電器都買哂

唔知下個月的今日, 會唔會已經0係新屋呢?

2014.09.15 {尖沙咀} Lunch @ Le Soleil

趁住周未, 一於要同蝸牛先生衝出將軍澳搵食

今日揀0左想試好耐的 Le Soleil

Le Soleil

尖沙咀麼地道 69 號帝苑酒店 3 樓

下午茶 tea set

$348 + 1 (2 人份)

荔枝蘋果茶

好清新, 唔算太甜...但嫌無乜茶味

越南咖啡

 蝸牛先生話好飲喎

魚露

主角出場喇

頂層:前菜 (鵝肝三文治, 軟殼蟹米紙卷)

中層: 甜點 (椰汁糕, 藍莓芝士蛋糕, 拿破倫, 馬卡龍)

底層: 咸點 (庶蝦, 春卷)

由於太肚餓 , 所以我0地先食底層的咸點

庶蝦同春卷都幾好味, 但就好似無乜越南的風味

之後食頂層的前菜 (鵝肝三文治, 軟殼蟹米紙卷)

鵝肝超級 so, 我唔like, 而且塊多士唔脆

軟殼蟹米紙卷反而幾好味

甜點 (椰汁糕, 藍莓芝士蛋糕, 拿破倫, 馬卡龍)

甜品一向係帝苑的強項

藍莓芝士蛋糕同拿破倫都好食, 唔會太甜, 亦唔會好漏

反而馬卡龍就真係太甜

而椰汁糕的質地就太淋, 唔夠煙韌

第一次食呢款 fusion high tea

越南咸點 + 西式甜點

我同蝸牛先生就唔太鍾意

而且在酒店食越南菜, 硬係覺得唔夠風味

不過未食過試一次又無妨

2014.09.09 {將軍澳} Lunch @ La Piazza

最近太多人話我發福不少

所以我要下定決心, 食少 d 同做運動

趁住假期, 一早就起身去游水

游完返來超肚餓, 但為兔功虧一簣, 所以只係食0左個生果頂肚

之後等0左大約兩個鐘就出發去食 lunch

今日同蝸牛先生出去"探險"

我地去0左 坑口站的 坑口村 搵食

由地鐵站行過去大約十幾分鐘, 唔算遠, 但就好熱

行到入村我已經超肚餓, 所以都無乜心機慢慢揀

最後揀0左呢間

La Piazza Restaurant

將軍澳坑口村24號地下 

鋪位仔仔, 亦都因為無訂位而要坐室外

omg!!! 已經行到身水身汗, 仲要坐室外?!

如果唔係我實在太肚餓, 我一定會去第二間食

但...鬼叫我呢一刻超肚餓咩....

如我所料, 呢餐係滴住汗咁食

Set lunch: $92 +1

set 的款式好少, 得三款

蝸牛先生揀了前菜, 我就揀了餐湯

前菜: 雞肉沙律

餐湯

南瓜湯味道都唔錯

不過大熱天時飲係一個挑戰

蒜蓉包

無乜特別, 唔夠蒜香, 又唔夠脆

海鮮意大利飯

海鮮只有魷魚同青口

味道都唔錯的

西冷扒

一入口有好大陣濃味, 而且塊扒無乜味, 好麻麻

好彩都唔算太山長水遠過來

如果唔係一定好失望

加上個 set 都 over $100, 所以我覺得佢價錢同質素唔成正比

今次又搵食失敗~

2014.09.08 中秋節大餐

2014 中秋節

4:30 放工

一心諗住買銀鱈魚, 所以去0左 cc super 買餸

點知去到樣樣都想食

買下買下, 竟然最後係無買到銀鱈魚的, 哈哈

而且埋單仲好貴添....OMG!!!

前菜一: 焗蠔

買0左四隻, 我食熟的, 蝸牛先生就食生的

其實焗都唔錯丫.....

只係簡單加點乾蔥, 蒜, 黑椒同芝士就可以拎去焗

買0左呢隻 CHEESE

用來焗蠔或加0係意粉度食, 味道又唔錯喎

下次要 ENCORE

前菜二: 刺身

本來想食海膽的

但見到 D 刺身又好似好吸引

最後都係買0左三 PACK 細細地的

帶子超鮮甜, 好正!!!

主菜:香草黑椒大蝦意粉

本來無乜特別, 不過加0左芝士後, 味道即刻 upgrade 哂

本來想買 cake 的, 不過我而加要控制自己食量, 所以都係無買

真係好羨慕 d 人食極都唔肥

我呢 d 一食得多就會發漲, 上天實在太唔公平 

夜晚, 同蝸牛先生出0左去附近散步

我0地跟住人潮去0左將軍澳海賓公園

估唔到呢邊都幾有氣氛

好多一家大細出來玩燈籠, 食生果, 月餅賞月, 都幾熱鬧

今年中秋雖然過得好平淡, 但都幾開心丫~

2014.09.06 {沙田} Lunch @ La terrazza bar & grill

呢日返大埔{娘家}做節

下晝順便入沙田 HomeSquare 行下

行之前先醫肚

揀0左大會堂旁邊的西餐廳

La terrazza bar & grill

沙田源禾路1號沙田大會堂天台花園

我同蝸牛先生都係第一次來

SET LUNCH 價錢尚可 (around $78 to $98 + 1)

餐包

印有餐廳名字, 都幾特別

味道都 ok

蘑菇湯

set lunch 唔包餐湯的

好似加 $20

不過呢個湯幾好飲

大蝦長通粉

呢碟我覺得都幾好味

但如果蝦可以再爽d 就更加好

牛肉漢堡

超大個, 塊漢堡味道幾好, 但唔夠 juicy

唔知係咪因為同蝸牛先生 share 來食, 所以唔覺好漏, 幾好

最近搬0左去將軍澳暫住

屋苑附近全部都係連鎖餐廳, 感覺好 dry

難得放假離開呢區, 真係要搵 d 好少少0既0野食下

其實當初都有諗過下買將軍澳 (貪佢新, 居住環境好似好d)

不過怕難"搵食", 所以最後都係無諗

我同蝸牛先生都鍾意食

若果長住呢區, 我相信會有生不如死的感覺, 哈哈

2014.08 自家打邊爐

好耐好耐無寫過煮食 BLOG

一來忙於籌備新屋, 一開電腦就掛住搵裝修資料

二來唔係幾習慣暫住屋的廚房

呢度可用的煲唔多, 好唔方便

所以就算煮, 都只可以煮一D 簡單的菜色

好彩0個陣有帶埋光波爐過來

如果唔係都唔知點算

上星期在灣仔睇完裝備材料

同蝸牛先生行0左落鵝頸橋行市

本來係打算煮飯的

買下買下最後都係決定打邊爐

第一次買龍躉, 無想像中咁貴, 一小碟 $80, 用來打邊爐好正 (我覺得我會上癮)

牛頸脊又係打邊爐必備的, 今次買0左 $50

花蛤, 食就唔覺好鮮甜, 不過用來滾就好好飲

水餃, 占仔記出品, 估唔到又幾好食

湯底都係邊爐的靈魂

由於我好鍾意一邊打邊爐一邊飲湯, 所以我習慣自己煲湯底

(感覺無咁邪惡, 仲有一種健康的感覺, 哈哈)

蕃茄薯仔粟米花蛤湯

買0左五, 六個大蕃茄

再加上花蛤的鮮味, 呢個湯真係超好飲

今次仲買到超甜栗, 簡直食到唔停口

最後, 加多個烏冬......食到反肚

2014.05 - 北海道遊 {Day 11} - 北海道再見

終於都來到最後一日

(十一日的旅程真係唔簡單, 日玩夜玩其實都幾攰)

在北海道的最後一餐, 我地決定食壽司

(亦為我未食到一餐感動的壽司而報仇)

揀了大丸樓上的壽司善

十一點已經要排隊, 好彩只係排一陣

跟蝸牛先生同樣點了壽司 SET

雖然都好味, 但又未去到"叮"一聲咁好食

貪吃的蝸牛先生再額外加了一客拖羅壽司

之後就抓緊時間血拼 @Stellar place

最後都有少少收獲

蝸牛先生在北果樓 COUNTER 買了一個 泡芙

係時候離開了

預早少少時間去機場買手信

機場有好多鋪頭, 不過我地時間唔多, 所以都行唔哂

期間, 又買得太忘形....忘形到連銀包都跌埋 (雖然入面只得 YEN 無証件)

好彩有個好心的日本人執返比我.....實在太大意

北海道, 再見了~

難吃的 CX 飛機餐

今次的收獲都唔算少

對鞋好靚, 不過我買細0左一個 SIZE

有日用0左來炒飯, 哂0左...因為太碎食唔出

果醬, 無乜特別

廚房用品

北海道比我想像中好玩, 風景好靚

今次旅程最滿意係住到鶴雅 鄙の座

雖然買衫的地方唔太多

不過又比我買到好多廚房用品, 都幾開心

有機會都想同蝸牛先生再來