2016.03.20 結婚紀念日 {五周年}

2016.03.20 木婚紀念日

前幾年的結婚紀念日都係喺日本慶祝

不過今年蝸牛先生請唔到假

所以唯有留港慶祝

3.20 踏正十二點就食 CAKE 慶祝

好耐無買過 Paul Lafayet 的 cake, 水準好似好過 Tony Wong

{Tony Wong 好耐都無出過新款, 已經無乜驚喜}

好趕急咁整咗張卡, 希望蝸牛先生鍾意

到正日, 其實無乜慶祝活動
不外乎都係食同食...嘻嘻...

lunch 去了我愛的燒肉店: 和宴 {尖沙咀}

每次都一定要食佢碗牛肉烏冬, 因為真係好好好好味

呢碗係跟餐加的, size 比較細 (其實都算唔細)

但我決定下次一定要叫一碗 regular size 食到夠

{佢個湯底, 辣辣地, 牛肉味又濃, 真係好正, 如果我識整就好喇}

之後去0左睇戲 <夢之花嫁>

睇完都唔知做乜...無無聊聊咁
浪費咗兩個鐘

睇完戲就出發去食晚飯啦~

今次揀咗 Ritz Carlton 的 Tosca 

揀佢的原因, 唔多唔少係因為佢0既夜景

{話說之前跟同事上過 103樓飲嘢, 當下的夜景真係好靚, 於是好想同蝸牛先生去感受一次}

點知.......

當日的天氣......潮濕多霧

上到去我哋乜都睇唔到, 好可惜!! 

唯有寄望一陣的食物好味啦

{不過我已經唔多記得當晚食咗乜, 下次真係要影低份 MENU}

先上麵包, 份量都幾多, 大約有三, 四款

其中薄薄的我覺得幾好味

其它的就普普通通

迎賓小吃: 唔太記得係乜, 不過印象中味道幾好

頭盤: 頂頭的係腸仔, 呢碟味道都唔錯的 {可能係我鍾意食腸}

前菜 芝士伴蛋: 蛋加芝士, 旁邊係炸脆咗的蒜 

新穎的配搭, 但其實食落味道唔太特別

前菜: 似炸過的麵包包住帶子, 呢個幾特別, 味道亦唔錯

主菜: 食落有啲似肉醬千層麵

但要配埋上面的泡泡一齊食先會覺得特別

主菜  牛: 食落都幾鮮嫩, 不過牛味唔太重

甜品: Sorbet

質地同平時食到的有少少唔同, 入口即散, 完全無口感

味道亦唔太特出

Petits 4

唔會太甜, 都唔錯的

最後餐廳送了一小盒餅乾俾我地做結婚周年禮物

今晚無 VIEW 睇而食物味道又唔算特出, 有少少失望添~
不過, 最緊要係有蝸牛先生陪我慶祝~

之後就係送禮物時間:

我送比蝸牛先生的周年禮物

第一次擁有情侶 {夫妻} 產品

呢對錶唔貴, 但我覺得個款幾靚

佢可以隨時換錶帶, 另一組係尼龍錶帶, 斯文同 casual 都岩襯

蝸牛先生送比我的禮物

VCA 手鏈

簡簡單單都幾靚

話咁快就結婚五周年. 多謝蝸牛先生呢五年的照顧

唔知點解婚後的時間真係過得好快

每日的日子都過得好充實

雖然少咗好多私人的時間

但我都覺得幾開心

希望以後都可以一樣快樂~

2016.03.06 中環 {Lunch} @ 俺の割烹

呢日蝸牛先生話想食好少少

於是上 openrice 研究下有乜好食

望下望下見到呢間, 之前都諗過下想試

見 comment 唔錯, 於是就決定去食

無得 book 位, 不過星期日唔 full , 好多位

俺の割烹

中環蘭桂坊德己立街30-32號加州大廈6樓

呢間鋪頭0係日本有好多分店

係長龍店之一

香港係首間海外分店

lunch set around $200 to $300

不過款式唔多

只有銀鱈魚, 天婦羅, 魚生飯, 刺身

前菜: 賣相唔討好, 味道則一般

銀鱈魚併刺身 set

有蒸蛋, 漬物, 秋葵, 麵豉湯

刺身都幾新鮮, 而且都幾厚身

銀鱈魚竟然有兩塊, 都幾好食, 不過有點漏

白飯雖然唔夠日本的好食, 不過

牛肉壽喜燒

呢個味道幾好, 但就比較普通

牛亦無入口即溶的感覺 (價錢 $238 +1)

我覺得呢度可以再來 (不過蝸牛先生就話普普通通)

或者下次會試魚生飯, 天婦羅

又或者搵次去日本試下

東京, 福崗都有 (店鋪情報)

食完, 兩條友坐船入0左馬灣

但原來入面係完全無0野玩/行的

而挪亞方舟的入場費又貴 ($168/人)

逗留唔夠一個鐘就走0左

*****

最近好忙

每晚放工買餸煮飯, 之後仲要溫書

好耐無返過學, 好耐無放咁多0野入腦, 有少少吃力

原來, 學日文真係唔簡單架!! (讀書同生仔都要襯嫩做)

上完第一堂, 第二堂就話要默書啦, 好 chur

所以而加一得閒就拎本書出來溫習

希望我捱得住唔放棄啦~

快手打埋呢篇 blog 我又要繼續溫書了~

2016.02 銅鑼灣 {Lunch} @ 竹壽司

唔知點解成日都會突然間好想食壽司

呢個 weekend 又去了我地至愛的壽司店 - 竹壽司 

不過今次之後, 發覺佢地的跌 watt 了

由於唔係第一次食

所以都認得下入面啲師傅

但呢日上到去, 竟然人面全非

照舊 order 壽司 set

前菜 (一): 沙律

我本身唔鍾意食未煮嘅菜, 但佢嘅汁令我覺得易入口咗

不過今次個汁好似唔夠之前咁好味

前菜 (二): 新鮮但普通 

蒸蛋: 都算滑同埋好味, 不過又係唔夠之前咁好食啊~

之後就係壽司

師傅叫我地唔駛點豉油

但唔知點解, 我覺得舊舊魚都係一樣味嘅?!

帶子上面加咗少少柚子汁

我同蝸牛先生都覺得個汁over 咗

魚生係新鮮的

不過真係差不多味

反而幾鍾意灸燒嗰幾款

大蜆麵豉湯

呢個湯之前好好飲, 飲到停唔到口

今次我竟然飲剩

甜品反而味道一樣

今次之後, 睇怕要再物色過另一間壽司店了

2016.01.02 元旦澳門漫遊 [食記]

放幾天假, 無無聊聊同蝸牛先生去了澳門一日遊

沒有行程, 旨在行下食下

今次唔會太花費, 希望試下呢邊的地道餐廳

第一站:

牛記咖啡館美食

十月初五街1號地舖

主打咖哩, 牛河

(不過我地呢兩樣都無食...哈哈

有機會一定會試下呢度的咖哩)

花雕雞撈麵
其實呢個都出名的
佢藥材味好濃, 感覺好補身
配埋麵一齊食又幾唔錯

水蟹粥

一分錢一分貨, 好似 mop 60 一碗
隻蟹好細, 唔多肉, 不過都算鮮甜 

第二站: 葡撻

本來想食瑪嘉烈, 不過當日休市

之後去了新濠影匯入面的路環葡撻

第三站: 吳廷記

下環街15號地舖

主打懷舊糕餅

(附近的下環街市二樓都有幾檔小吃, 望落都幾唔錯, 不過食唔到咁多嘢, 所以無試)

冷糕

入面有沙糖, 花生醬

味道好似我地平時食的夾餅

只係冷糕塊皮係脆的

我就覺得無乜特別

紅豆餅

另一款出名的小吃

熱辣辣即煎

呢個我反而覺得幾好味, 只係嫌佢太油

第四站: 亞利咖喱屋

西灣民國大馬路4k號地下

來到澳門一定要食萄國菜

今次我地揀了呢間

{要留意} 枱面上的樽裝水係要錢的

我另外再 order 了一支澳門特有的橙味汽水

馬介休

我覺得幾好味

雖然馬介休味唔太濃

不過佢食完唔會覺得漏

萄國雞

萄國雞就普普通通

反而薯條幾好味

咖哩牛

呢個用來撈飯一流

食飽飽之後去了光影節

無乜特別, 而且超過多人

仲比我地見到有同胞抱住小孩公然隨街大解

真係超嘔心

懶醒買了十點幾的船飛

諗住就算早走都可以排後補

點知呢日超超超超多人

我地八點半去到碼頭, 排極都排唔到後補

結果都係坐返原定班船

澳門美食多, 但過來又無乜特別嘢好做

所以間唔中過來一次就夠了

2015.11 {Day 6｝福岡[秋] - 再戰稻佐山夜景

完咗軍艦島後，慢慢行番去長崎駅前，再買點補給品，上稻佐山睇長崎夜景。

要去睇世界三大夜景之一嘅長崎，就要去稻佐山。由於稻佐山觀光纜車停駛數個月，所以目前要去睇夜景，首先去到長崎駅前（博多前往最快兩個鐘），再搭市內巴士去稻佐山，大概20分鐘左右，上到總站，再步行大概20分鐘，先至上到山。所以軍艦島加上長崎夜景，由於接近同一位置，所以算係PERFECT MATCH，唔嫌攰，甚至可博多即日來回，因為長崎已經冇乜其他好吸引的景點。

今次蝸牛仔大約4點30搭市內巴士，5點多啲上到稻佐山展望台。

(Day 1 嗰晚, 我地行完呢條長長的樓梯之後, 以為已經上到展望台, 點知行前少少再有條樓梯, 見到咁樣, 我地決定放棄   by 蝸牛太太 )  [Day 1 - 長崎] 

(對於少運動的蝸牛太太, 嗰晚又凍, 又落雨, 要行上百級樓梯真係好辛苦  by 蝸牛太太)

嗰晚氣溫相當凍，我已經全副武裝羽絨上山，但都好凍。上到山仲係日頭，先望個日景先。

上到稻佐山展望台，一邊係長崎城市景，另一邊就係海景。日頭都係靚景的。

當開始進入黃昏，景色開始特別起來。點解？因為太陽係喺西邊落山，斷估海景方位係西面，所以黃昏開始，城市景開始進入夜晚，但係另一邊嘅海景仲係太陽落山黃昏，就好像一邊睇夜景，擰轉面就係黃昏景，好特別！我諗呢個亦係長崎夜景能夠成為世界三大夜景之一。

下面兩張相係同一時間拍攝的

城市景開始進入夜晚

另一邊嘅海景仲係太陽落山黃昏

一邊夜晚、另一邊仍然黃昏嘅長崎夜景，同香港維港相比，係兩種唔同嘅感覺，根本不能比較，兩個景，一樣十分靚。人生有幸能夠睇到世界三大夜景嘅其中兩個，長崎黃昏＋夜景，希望有機會同蝸牛太太去多次。

去到六點鬆啲，天色已全黑，長崎夜景反而變得冇咁有特色，與此同時又有一大批學生上展望台睇夜景，變得非常熱鬧，應該話係太過熱鬧，所以寧願落山趕七點鬆啲班車番博多。

番到博多了 ！原本想去食壽司遇到嘅客人叔叔介紹嘅拉麵，不過藥院大通太遠了，自己又太攰，於是去博多車站附近、酒店隔離嘅一間出名居酒屋食嘢，呢間？？同海風土唔同，冇咁歡迎外國客，MENU都係全日文，於是亂咁叫幾個嘢食。

魚生，呢個好似寫係三種唔知乜肉刺身，係該店名菜，點埋個好特別嘅汁，都幾特別，味道不俗，至少未試過呢種味道，難忘。

蝦，幾好食。

炸雞，正常地好味。

幾個菜未有好驚喜嘅感覺，但都不俗。

然後未算飽，臨尾最後一擊，再食埋個「一雙」拉麵再番酒店，記得上次覺得好好食，今次，唔知係咪失色咗，定係叫咗第二款拉麵，味道相比第一日落機嘅拉麵舖略遜色，當然都不錯啦。

於是滿足地返酒店，準備執書包番香港了。