Welcome to our world

2016年2月15日星期一

2016.01.02 元旦澳門漫遊 [食記]

放幾天假, 無無聊聊同蝸牛先生去了澳門一日遊

沒有行程, 旨在行下食下

今次唔會太花費, 希望試下呢邊的地道餐廳

第一站:

牛記咖啡館美食

十月初五街1號地舖

主打咖哩, 牛河

(不過我地呢兩樣都無食...哈哈

有機會一定會試下呢度的咖哩)

花雕雞撈麵
其實呢個都出名的
佢藥材味好濃, 感覺好補身
配埋麵一齊食又幾唔錯

水蟹粥

一分錢一分貨, 好似 mop 60 一碗
隻蟹好細, 唔多肉, 不過都算鮮甜

第二站: 葡撻

本來想食瑪嘉烈, 不過當日休市

之後去了新濠影匯入面的路環葡撻

第三站: 吳廷記

下環街15號地舖

主打懷舊糕餅

(附近的下環街市二樓都有幾檔小吃, 望落都幾唔錯, 不過食唔到咁多嘢, 所以無試)

冷糕

入面有沙糖, 花生醬

味道好似我地平時食的夾餅

只係冷糕塊皮係脆的

我就覺得無乜特別

紅豆餅

另一款出名的小吃

熱辣辣即煎

呢個我反而覺得幾好味, 只係嫌佢太油

第四站: 亞利咖喱屋

西灣民國大馬路4k號地下

來到澳門一定要食萄國菜

今次我地揀了呢間

{要留意} 枱面上的樽裝水係要錢的

我另外再 order 了一支澳門特有的橙味汽水

馬介休

我覺得幾好味

雖然馬介休味唔太濃

不過佢食完唔會覺得漏

萄國雞

萄國雞就普普通通

反而薯條幾好味

咖哩牛

呢個用來撈飯一流

食飽飽之後去了光影節

無乜特別, 而且超過多人

仲比我地見到有同胞抱住小孩公然隨街大解

真係超嘔心

懶醒買了十點幾的船飛

諗住就算早走都可以排後補

點知呢日超超超超多人

我地八點半去到碼頭, 排極都排唔到後補

結果都係坐返原定班船

澳門美食多, 但過來又無乜特別嘢好做

所以間唔中過來一次就夠了

2016年2月14日星期日

2015.11 {Day 6｝福岡[秋] - 再戰稻佐山夜景

完咗軍艦島後，慢慢行番去長崎駅前，再買點補給品，上稻佐山睇長崎夜景。

要去睇世界三大夜景之一嘅長崎，就要去稻佐山。由於稻佐山觀光纜車停駛數個月，所以目前要去睇夜景，首先去到長崎駅前（博多前往最快兩個鐘），再搭市內巴士去稻佐山，大概20分鐘左右，上到總站，再步行大概20分鐘，先至上到山。所以軍艦島加上長崎夜景，由於接近同一位置，所以算係PERFECT MATCH，唔嫌攰，甚至可博多即日來回，因為長崎已經冇乜其他好吸引的景點。

今次蝸牛仔大約4點30搭市內巴士，5點多啲上到稻佐山展望台。

(Day 1 嗰晚, 我地行完呢條長長的樓梯之後, 以為已經上到展望台, 點知行前少少再有條樓梯, 見到咁樣, 我地決定放棄 by 蝸牛太太 ) [Day 1 - 長崎]

(對於少運動的蝸牛太太, 嗰晚又凍, 又落雨, 要行上百級樓梯真係好辛苦 by 蝸牛太太)

嗰晚氣溫相當凍，我已經全副武裝羽絨上山，但都好凍。上到山仲係日頭，先望個日景先。

上到稻佐山展望台，一邊係長崎城市景，另一邊就係海景。日頭都係靚景的。

當開始進入黃昏，景色開始特別起來。點解？因為太陽係喺西邊落山，斷估海景方位係西面，所以黃昏開始，城市景開始進入夜晚，但係另一邊嘅海景仲係太陽落山黃昏，就好像一邊睇夜景，擰轉面就係黃昏景，好特別！我諗呢個亦係長崎夜景能夠成為世界三大夜景之一。

下面兩張相係同一時間拍攝的

城市景開始進入夜晚

另一邊嘅海景仲係太陽落山黃昏

一邊夜晚、另一邊仍然黃昏嘅長崎夜景，同香港維港相比，係兩種唔同嘅感覺，根本不能比較，兩個景，一樣十分靚。人生有幸能夠睇到世界三大夜景嘅其中兩個，長崎黃昏＋夜景，希望有機會同蝸牛太太去多次。

去到六點鬆啲，天色已全黑，長崎夜景反而變得冇咁有特色，與此同時又有一大批學生上展望台睇夜景，變得非常熱鬧，應該話係太過熱鬧，所以寧願落山趕七點鬆啲班車番博多。

番到博多了！原本想去食壽司遇到嘅客人叔叔介紹嘅拉麵，不過藥院大通太遠了，自己又太攰，於是去博多車站附近、酒店隔離嘅一間出名居酒屋食嘢，呢間？？同海風土唔同，冇咁歡迎外國客，MENU都係全日文，於是亂咁叫幾個嘢食。

魚生，呢個好似寫係三種唔知乜肉刺身，係該店名菜，點埋個好特別嘅汁，都幾特別，味道不俗，至少未試過呢種味道，難忘。

蝦，幾好食。

炸雞，正常地好味。

幾個菜未有好驚喜嘅感覺，但都不俗。

然後未算飽，臨尾最後一擊，再食埋個「一雙」拉麵再番酒店，記得上次覺得好好食，今次，唔知係咪失色咗，定係叫咗第二款拉麵，味道相比第一日落機嘅拉麵舖略遜色，當然都不錯啦。

於是滿足地返酒店，準備執書包番香港了。

2016年1月29日星期五

2016 旅遊大計 (首爾, 大阪)

新一年的旅遊計劃又已經有了大概的草圖

四月 - 首爾

我同蝸牛先生都未去過泡菜國

揀佢純粹係想轉轉新的旅遊景點

而且佢同日本一樣都係短機程, 岩我

之前係咁捕住 HK Express 的平機票

但0個 d 平到喊的機票當然輪唔到我
最後加埋酒店都要三千蚊鬆D 一個人

貪心的我覺得唔算特別超值 (又覺得加多少少已經可以唔駛坐廉航)
所以遲遲未有動手

尋日 lunch 無聊, 去0左 Wing on travel 個 website 格價

咦~ 坐國泰, 4D3N package 只係三千蚊

而且航班時間都算 ok (07:55 飛, 回程係 13:55)

不過包0個間酒店就差少少

於是我又再搵

搵下搵下, 又比我搵到一間新酒店同埋新航班時間

最後兩人埋單 $65xx

即係每人只係比原本多付二百蚊
(雖然下個月BOOK 可以免收百幾蚊的燃油附加費, 但為免夜長夢多, 所以都係BOOK 了)

呢個PACKAGE, 無論航班時間, 酒店都好合心意
訂完之後好興奮
出發日期: 23/4/2016 TO 26/4/2016
航班: 去程 9:20 回程 20:15 (國泰)
酒店: Loisir Hotel Seoul Myeongdong (http://www.loisir-md.com/)

今次四天的行程應該只會 HEA 遊

主力會係食
第一次計劃泡菜國行程
我諗都要花少少時間研究下

之後就到下半年

十一月 - 大阪
今次用飛行里數換機票
本來想聖誕出發
但佳節的機位難求
所以最後改了十一月

冬天出發是為了可以浸溫泉

出發日期: 26/11/2016 TO 04/12/2016
酒店: 未訂

初步構思會去和歌山, 白濱
其它就乜都未諗

等我溫習完首爾, 之後就會開始溫大阪
旅行, 令人生充滿住期待...哈哈

2016年1月17日星期日

2015.11 {Day 6｝福岡[秋] -失而復得的軍艦島遊 (蝸牛先生番外篇)

御船山樂園酒店冇嘢再值得留戀，所以大清早就起身執嘢，執好哂7點45分出去食早餐，味道相比晚餐正常多了，但都唔係好食，半句鐘拿拿臨食哂，即閃，係為了趕車。

原本打算尾二呢日番去博多慢活一天，夜晚食吓屋台。不過，之前一日行天神、博多已行到冇嘢好行，於是即興上演復仇記，返去旅程第一日失敗收場嘅長崎，挑戰軍艦島同長崎夜景。

記憶中大約8點9（好似係）由武雄溫泉出發，經過一個叫肥前山口駅（個名咁襯我個小肚腩），等幾個字，就轉車搭去長崎駅。

喺肥前山口駅，非常寧靜，不忘拍吓街景。

冇記錯大約11點左右去到長崎駅，然後將物品放喺LOCKER，再出發去覓食。首先搭去一個叫「大波止」嘅電車站，行幾步就發現軍艦島遊嘅碼頭會合處，跟住還有時間，喺碼頭附近逛逛再搵嘢食，清閒放吓空。

結果去了吃西餐，吃意粉，味道不俗，價錢1000YEN都唔使。

當中發生一段小插曲，話說叫咗個茄汁意粉，點知小蝸牛論論盡䀆，唔小心將汁整錯件衫度，弊啦，我喺東京ISETAN買件G DRAGON衫滴到茄汁！MOLA MOLA！於是用紙巾係咁抹，都仲有少少迹，算啦。都係收拾心情去軍艦島。

想去軍艦島，其實唔容易的，喺長崎駅附近，有多間船公司提供軍艦島遊服務，大多數上午9點第一班船，下午1、2點第二班船，最好事前上網預約，小蝸牛係之前一日預約的，預約時只剩14個位。雖然有網友曾經話即場先買飛都得，但而家去軍艦島嘅人越來越多，所以都建議預早一兩日網上訂位。

另一點要注意嘅係，要登陸軍艦島，天氣條件一定要配合。首先，不能落雨；其次，每秒風速不能超過5公里，即每小時18公里，如果兩項條件不能達成，遊軍艦島嘅旅客就唔可以上岸，甚至整個船程取消，所以事前必須緊盯網上天氣報告，萬一天氣唔好亦可以迅速更改行程。

好了，呢一日風和日麗，應該順利。

軍艦島行程，有好多當地學生一齊JOIN埋，全船大約200人左右，船程約兩個半鐘！

旅程首先花半小時去到軍艦島附近，然後上岸參觀不足一個鐘，就會上船，然後圍繞軍艦島遊一個圈，好讓遊客影相影個夠，跟住就回程，需時大概兩個半鐘。

兩個半鐘，講緊係呢間公司咋，如果其他公司，隻船可能會去一個叫「伊王島港」嘅地方去接啲學生參觀，換言之船程會再長咗，變咗要三個鐘。

1點出發，點半去到軍艦島啦，跟住有一位識講英文的導遊伯伯帶路參觀，遊客絕不能周圍走，活動範圍只係好少，只能近觀幾幢樓的外圍，其他地方不能去，都好過冇。

軍艦島好多人都識，如果喜歡廢墟嘅人，必定非常喜歡，事實上，蝸牛仔都覺得不枉此行，唔講咁多，去相！

先嚟島上拍照！

再嚟船上拍島！

大約下午3時30分，軍艦島旅程結束啦，今次大成功！希望下次有機會同蝸牛太太一齊去。

完咗軍艦島後，慢慢行番去長崎駅前，再買點補給品，上稻佐山睇長崎夜景。 (待續.....)

2016年1月16日星期六

2016.01 我們都愛吃

又到一年一度食塔斯車厘子的時候
今年價格好似有 D 回落
呢盒 $360 就已經可以買到
雖然 SIZE 唔算好大, 不過都好甜好多汁

車厘子唔只好味, 其實仲好有益:
中醫認為車厘子性溫味甘酸，具有益脾養胃、滋養肝腎、止瀉、祛風濕的功效，可治四肢不仁、咽炎、身體虛弱、風濕腰腿疼痛、凍瘡等症。可防治缺鐵性貧血、有健腦益智功效。車厘子蘊含豐富的維生素 A 及鐵質，有助促進人體免疫力的提升，同時參與血液的製造，促進血液循環

兩個人食唔到咁大盒
拎0左一半返娘家一齊分享

上星期六, 終於去0左 Uncle tetsus shop 買佢的芝士蛋糕
第一次在大阪食完已經好鍾意
之後去到台北再買
跟住就無再食過喇
一聽到佢話會0係香港開店
真係開心到爆炸

我好怕排隊
本來無打算咁快去買
但上星期路過, 見到人龍唔長 (around 十多人)
於是又試下排
點知一排就排0左成個鐘先買到
不過, 真係好好食, 遲d 一定要再買

好鬆軟, 好濃的芝士味

呢間沾麵店, 又係一齊都想試

三田製麵所
銅鑼灣登龍街1號金朝陽中心2期 Midtown 地下D號舖

之前又係長龍到癲
上星期六見人少少就排下
我同蝸牛先生 order 0左一個所謂的套餐 (有麵, 有小食, 有飲品)
呢個 "套餐" 係要加錢先會多一份小食的
而汽水就唔駛加, 不過其他特飲, 什至熱茶就要加錢