2019.02 京阪遊 {Day4} 間人溫泉

2019.02.19 {Day4} 間人溫泉

今日出發去浸溫泉

好期待, 因為今晚有得食間人蟹

每次坐長途火車前我哋都會去超市買定糧食

尋晚買唔到吐司, 今日喺大丸點都要買幾塊試吓

雖然唔係同一間, 但見佢包裝到咁靚咁高貴

我估應該好味掛

格離個男人買左成大袋, 好似送禮咁款

我就剩係買咗三片

呢間係專賣丹麥吐司嘅店

雖然味道都唔錯, 但食落其實無乜特別

之後再到下層買一直都想試嘅北極星蛋包飯

都係覺得無乜特別, 無啲人講到咁正咁好食

另外仲有呢啲, 不過感覺無上次北海道大丸買嘅咁好味

11:15 分大阪出發, 去到網野已經兩點幾

約好溫泉旅館司機來接車, 未夠鐘已經嚟咗等我哋

間人溫泉 炭平

房型: 和洋室 悠千

三點未夠已經完成 check in 可以上房

呢度有六個溫泉都係係貸切風呂, 又幾唔錯喎

以為要同人爭, 於是拿拿臨見時間尚早就即刻沖去溫泉

由於真係無人, 我哋好快巡視哂咁多個溫泉

每個都好大好靚

(好彩無 book 風呂附客室, 可以慳返啲錢)

浸咗幾個之後就返房 hea 吓同煲劇

(追緊結衣bb 嗰套無法成為野獸的我們)

今日差不多全日都落雨, 不過間中又有啲陽光出現吓
等我哋有機會欣賞吓出面個靚景
上天似乎對我哋都不薄

間房其實都算唔錯的, 張床都幾好瞓
美中不足係房入面係無得沖涼架
要沖涼就走要出去溫泉房
(好彩我哋房旁邊已經有一間溫泉房, 所以都唔算太唔方便)

hea 一陣落去大堂拎蕃薯 (第二日先發現原來仲有關東煮, 蝕咗呀)

啲蕃薯好鬼甜 

終於到晚飯時間, 係我哋期待嘅間人蟹
呢晚嘅菜式其實同蟹道樂差不多
每一道都係蟹
不過....唔知係咪蟹季已經到水尾, 今晚嘅蟹唔算鮮甜, 好普通
老老實實都幾失望, 蟹唔甜不特止, 味道仲唔算好味
(話說呢間房一晚要 138,800 yen! 完全唔值呢個價)

雖然食物麻麻, 不過服務員小姐又幾好
佢知我學緊日文, 於是佢就用慢速同我講
都幾好玩 

懷住失望嘅心情返房

點知返到上去有隻晴天公仔掛咗喺房門口

好驚喜

玩咗咁多次都係第一次遇到

返房後正值沖涼嘅煩忙時間

所以我哋都等咗陣先有位

呢晚, 我同事十二點打俾我問嘢, 真係好無奈

結果, 我等到三點見佢哋攪掂哂我先敢瞓...