<嫁給您 - 場地> 睇場記 Take 1

由於想在六月的 expo book 場, 所以希望在這之前先看場, 到時就可以立即落訂. 其實一直都希望設宴的地方可以在酒店進行 (因為我愛高樓底加水晶燈!!), 不過做完資料搜集後, 發覺酒店的價格實在太高了 (算吧啦, 我倆又不是什麼大富人家....), 而坊間的酒樓設計又愈來愈來 grand, 所以唯有調整一下心理, 說服自己擺酒樓也可以很 grand!!
不過, 我當然不會輕易罷休...在左搵右搵之下, 終於給我找到兩間岩心水又貼近 BUDGET 的酒店, 第一間是皇家太平洋, 第二間是逸東酒店. 喜歡皇家太平洋, 是因為他的薰衣草證婚場地...而逸東則是因為個場四正.
今日開始了我們第一次睇場....第一間是皇家太平洋.
皇家太平洋<黃庭廳> (max16圍, min paid: $99k)
睇完後, 有點失望.....樓底低, 新娘房無洗手間, 而最吸引到我的薰衣草證婚場地, 亦沒有想像中那麼美 (我一直都好白痴的以為那裡會有真的薰衣草, 但.....原來只是膠花...... ).
映月樓翡翠廳/ 吉祥廳 (max 15/19 圍, min paid: $80k/$95k)
離開皇家太平洋後, 我們決定移玉步到映月樓, 因為想知道那裡有沒有細場適合我們這些小戶人家. 原來它們都有擺十五圍的細場, 實在太好!! 而且它們的樓底很高, 又有水晶燈, 新娘房又大又有洗手間, 都幾合心水, 而最重要是蝸牛先生希望給賓客吃得好一點, 他覺得除非我們有能力在酒店訂最貴的酒席, (但我們沒有嘛!!) 不然的話, 酒店的中菜一定差過酒樓....還有的是這裡的阿姐好好人, 好幫手....我 like!!!

可惜...酒樓方面的租約就快到期, 出年未知能否成功續約....
御苑皇宴半島廳 (max 24 圍, min paid: $98k)
離開映月樓後見時間尚早, 所以我倆決定再移玉步去尖東的御苑皇宴看看, 酒樓位置在帝國中心, 個商場都幾舊的, 印象大打折扣. 不過, 入到裡面又覺得它的場都算幾 grand , 但我就不喜歡他一開房門就飄了一股煙味出來, 就像入了卡啦ok 房一樣...感覺不太好. 而又因為見過有賓客在飲宴後批評他的隔音不好 (當晚有 3 家人擺酒, 他就聽了3次起菜歌!!), 食物亦不好....所以, 我相信這間應該會被 foul 了.

帝苑酒店帝苑軒 (max 14/18 圍, min paid: max 圍數 x 套餐價)
御苑皇宴對面就是帝苑, heehee..我倆又走入去望望. 不過, 公關小姐黑面之餘, 又完全不理會我們, 只草草給了我們菜單和 floor plan....不過, 我們亦不怕醜, 自己在它的埸內四圍看 (不過看不到新娘房), 最後覺得它場內柱位太多了.....不過, 場地的整體感覺比皇家太平洋好.
總結
我倆最喜歡的是映月樓.....因為它有高樓底, 水晶燈, 而美心集團食物亦有保證....希望它可以續約成功啦.
VCA, CARTIER, TIFFANY
今日途經 1881 , 捉了蝸牛先生入 VCA 看婚戒....嘩...試上手後, 簡直覺得他跟我合二為一, 好舒服, 完全無 "頂住頂住" 的感覺 (如不明白 "戴得舒服" 的感覺是怎樣, 請到店舖試一試...肯定會一試難忘)....不過, 價錢就貴了一點...我相信要待我們計完 BUDGET 後, 才知有沒有可能給他們跟我倆一世 ..由於 VCA 太吸引, 之後去了 cartier 及 tiffany 試其他婚戒都已經完全看不上眼了......(而且我勁不喜歡 Cartier, 因為那裡是零 service 的!!!)

<嫁給您> Confirm 結婚日子

我們結婚了

我將會跟蝸牛先生在 2011 年 3 月 20 日 在 <逸東酒店> 翡翠廳設宴

<嫁給您 - 婚展> 香港婚宴博覽 4.2010

今天行了第一次的婚展...而今次的主要目的是希望吸收一下結婚的資訊和預算一下婚禮的開支.

這次婚展在九展內舉行, 場館比較細, 好快就可以行完. 出發前, 好多朋友跟我說, 婚展的 sales 都很瘋狂, 不過我倆又沒有這種感覺, 起碼我們坐低後發覺沒有興趣而轉身走, 都沒有人強行向我們硬銷.
今日看了一些影 pre-wedding 的資料, 其實大部份收費都大同小異, 我們看了幾間不同的公司的相簿, 看到最後差點想瞓..hahaha....現在有心水的公司共有兩間, 打算再做多一點資料搜集才作決定.
之後又取了一些酒席的資料, 不過, 今日參展的單位不多....收到的大部份菜單我已在網上看過. 唯有等遲些 CONFIRM 了圍數和 budget 後再找吧.
今次是我第一次行婚展, 而且還要跟蝸牛先生一起行...感覺都幾新鮮. 不過, 可能因為他還未提親, 所以我的投入度未去到一百....希望在下一個婚展時我們會有新的進展 ....

下一站.....星加坡

蝸牛先生今早終於起程出發去墾丁了...我們要四天後才可再見!! miss u, miss u!!
就在他出發無耐, 我又已經為他安排好六月的旅程了 ...真的愈來愈喜歡在國泰假期買 package, 效率簡直超高, 只需按幾個鍵, 就可以輕輕鬆鬆攪定機票和酒店, 確實是慳了不少時間.
其實上星期還在考慮究竟去吉隆坡還是星加坡好, 本來都已經決定揀吉隆坡, 但早兩天他卻跟我說, 看到旅遊書的吉隆坡, 有點不開胃 (因為他覺得那裡的食物, 景點都不吸引)...既然是這樣, 那唯有揀星加坡.
我們買的 PACKAGE:
都會行 - 新加坡熾熱優惠套票
日期: 16.6.2010 TO 19.6.2010
酒店: Fairmont Singapore (官網間房似乎都幾令)

價錢: 連機場稅, 燃油, 保險, 兩人共 $8,590..不算最平, 但因為平酒店的PACKAGE 已 full, 唯有揀貴少少的 5 星, 不過, 其實這個價錢屬於可接受程度 (雖然這個價錢可以去我最喜愛的東京, 而且滿足感會多好多好多...但我一定要衝出東京!!!)
好!! 要開始計劃我們今年的星加坡之旅.....

2009溫馨浪漫台北牛一遊 (第四天)

最後一日0既行程係台北車站, 西門丁一帶.
Check out 完就出發去台北車站搵食. 無乜心水食咩, 經過一間快餐店就入去試, 諗住試0下地道啲0既0野食. 味道唔差, 但就唔夠熱. 食完見到 <<福州胡椒餅>> 0係附近, 於是又買一件, 佢就話覺得好食, 我就覺得有噂失望, 因為我以為係佢係一件好重胡椒0既餅, 點知一啲胡椒味都無. 食完又0係附近行一陣, 之後就落西門丁.

落西門丁0既目的主要係買手信. 但由於今日係最後一日0既關係, 我地身上所剩0既錢無多, 所以除0左手信, 我0地唔可以再買其他0野. 不過, 中途睇中件衫, 好彩佢有得簽咭, 咁又俾我買到心頭好..呵呵, 但佢就慘啲, 佢睇中件 T SHIRT, 但0個度無得簽咭, 唯有嘆句..無緣啦!!
之後就係買鴨舌, 鳳梨酥…但由於我0地身上0既錢實在太少, 去到 <<港記>> 買鳳梨酥時, 唯有用港幣結數. 之後我0地每想駛錢都就住就住, 行到攰想入鋪頭坐低飲杯0野都唔夠錢, 原來身上無錢係咁慘0既一件事!!!
今日撞岩可愛教主0係度開簽名會,難得見到教主, 當然要格硬製造張合照啦…嘻嘻..就係佢有佢0係台上, 我0地有我0地0係台下自己影..哈哈!! 本來都想即場買碟然後上去搵佢簽個名, 但原來今日只係預訂, 要唔知幾多號先至有碟拎..算啦, 慳返!!
最後見仲有餘錢, 就去0左 <<牛店>> 食我0地最後0既一碗牛肉麵 (我真係超愛台式牛肉麵!!), 呢碗麵結束0左我0地0係台北0既旅程.
去到機場 check in 完, 就去 <<維格>> 買多盒鳳梨酥就上機. 佢啲鳳梨酥真係好好味, 連唔鍾意鳳梨酥0既我, 都覺得幾好食, 實在太犀利!!
原來晚機返0既國泰機, 夜晚都剩係得三文治, 實在太過份!!! 人0地華航/港龍/長榮 都會有個炒麵 OR 魯肉飯啦, 國泰貴過人竟然剩係得個包, 好離譜!!!
四天三夜的行程, 今日結束了!! 雖然我都係鍾意去日本多一啲, 但其實, 有佢陪的話, 去邊都無所謂呢...呵呵呵...
期待下一次同佢0既旅程..但下一站會係..?????

2009溫馨浪漫台北牛一遊 (第三天)

11:00 邊田庄 >>> 12:00台北市動物園 >>> 18:00 忠考敦化站 >> 19:00 南京北路
今日主要行程係去動物園. 出發前先去食個 brunch, 用餐地點係 <<邊田庄>>. 揀呢間0既主要係要想食小籠包 (唔去鼎泰豐, 因為香港都有, 而且上一次遊台時食過, 又唔覺有乜特別), 而且睇過好多 blog, 全部評語都話呢間0野好好好好食, 所以就決定一試.
餐廳0係中山國中站, 但因為唔近捷運站, 所以我0地就直接0係酒店坐的士去, 車費才 NT20. 一坐低, 店員會先奉上一杯 “洛神烏梅茶” (個味似利賓立仔仔..HAHA), 都幾特別. 我0地點0左一客小籠包, 一碟油條牛肉同一窩海鮮豆腐. 小籠包水準真係唔錯, 皮薄又多汁, 另外個豆腐煲都唔錯, 反而油條牛肉就普通0左啲. 食完飯打算行去捷運站, 點知唔知方向, 0係餐廳出面猶疑0左一陣, 店員竟然出0黎問我0地係咪唔識路, 之後就指示我0地應該點行…嘩…服務勁好, 香港邊會有??!

十二點多啲就去到動物園, 因為今日係星期六, 所以都幾多人. 呢度動物真係超多, 連熊貓都比香港0既安安, 佳佳活潑, 不過, 最令我0地大開眼界0既係…見到大笨象小便. 原來…係好澎湃加震撼架!!! 好大聲, 仲要係一條水柱咁出….犀利!!!!! 我0地用0左三, 四個鐘就行完個公園.

離開公園後就去0左 SOGO 0個邊行街. 但可能太攰, 去到 SOGO 都無乜心機行, 之後行0左一陣啲細街後, 再行返去 sogo 0個邊, 見到佢出面有位坐, 兩個就咁0係0個度坐左成粒鐘. 休息完畢後, 決定落返似原宿0個條街再戰 (即忠孝敦化站), 可惜大家都無收獲. 之後諗住去蔡依林都去0既 <<橋頭>> 打邊爐, 點知, 勁 FULL, 店員叫我0地 9 點先再去 (當時 7 點都未夠!!), 於是唯有改地方, 去佢同事介紹0既 <<鼎王麻辣>>, 點知去到, 又係一條人龍…拎完飛, 店員話大約等 1.5個鐘…(灰), 但因為今個旅程未食麻辣鍋, 所以我0地都決定等. 呢度附近完全無0野行, 我0地又有少少肚餓, 於是亂行睇0下有無0野食…行0左好耐都無, 最後見到條行仔裡面有間麵鋪, 最後就入0左去叫0左一碗牛肉麵 SHARE. 雖然間鋪好簡陋, 但碗麵又唔差, 最重要係食完我無肚痛嘛!!! 食完就返去再等….一個鐘後終於入到去. 呢度個窩底有兩邊, 一邊係麻辣 (但其實又唔係好麻辣), 一邊係酸菜湯底. 麻辣0個邊裡面放0左啲豬紅同豆腐, 豬紅超好食, 而且仲要係不斷添加, 勁正!!! 食完, 店員問我0地打唔打包, 原來呢度啲人興打包個湯底返屋企再打…又幾抵喎.

今晚係最後一晚, 但唔知點解又無一種好唔捨得0既感覺. 上次0係日本0既最後一晚, 我同佢都好唔捨得...唔捨得0既唔係日本, 而係..唔捨得呢幾日一齊生活0既日子...hoohoo..可能今次我0地都了解到以後大把日子一齊生活, 所以唔駛唔捨得呢...

2009溫馨浪漫台北牛一遊 (第二天)

浪漫溫馨第二天 – 是日行程包括浪漫睇日落及溫馨乘坐摩天輪
10:00 圓山大飯店 >>> 12:00 淡水 >>> 15:00 情人橋 >>> 18:00 士林夜市 >> 19:30 美麗華百樂園購物中心 >>> 21:00 永康牛肉麵
今日起身時有點餓, 所以出發前先落酒店餐廳食少少0野打打底, 本身呢度0既早餐勁多選擇, 但因為我0地0係收擋前十五分鐘先落去, 所以去到都所剩無多. 不過, 反正我0地都只係食少少, 又無咩所謂.
今日我0地0既行程係沿住淡水線咁玩. 第一站係 <<圓山大飯店>>, 本來旅遊書指示話可以坐捷運到圓山站, 之後再轉接駁巴上去. 但因為我0地唔多覺眼個接駁車站0係邊, 於是懶得搵之下, 又走0左去撘的士. 呢度係一間有啲歷史故事背景0既飯店, 裡面都幾古色古香. 我0地都0係度留0左不少倩影. 不過今日0黎呢度0既主因唔係參觀, 而係食!! 飯店裡面, 有間叫 <<圓苑>> 0既中菜廳比較出名, 裡面有振店之寶 – 紅豆鬆糕, 一場0黎到, 當然要試, 之後再叫多個 玉翠燒賣 同 蟹王小籠包. 個鬆糕都幾特別, 反而其餘兩樣又麻麻0地.

食完0野又影一陣相, 我0地就出發去淡水.
去到淡水, 我0地沿住淡水老街一直行一直行, 差不多兩點鐘就已經行完. 但由於今次0既目的係去情人橋睇日落, 所以唯有搵間 coffee shop 坐下消磨下時間先, 休息0左差不多一粒鐘就坐船去漁人碼頭. Heehee, 不過呢隻船裡面好細好迫, 坐0左上去, 好有一種要去偷渡0既 feel. 船程差不多成十分鐘, 原來都幾遠…落0左船又周圍影0下相, 又去0左食淡水出名0既魚丸. 行0下行0下, 終於等到差不多日落…兩個就坐0係橋上談談心…嘻..都幾浪漫…
離開情人橋, 我0地就出發去下一個景點 – 美麗華百貨. 不過, 一出車站, 佢提議先去市林夜市兜個轉. 今次我0地主要試0左啲比較出名0既小食, 豪大大雞扒 (唔好食的, 粉厚到死!!), 蚵煎 (個味道都可以, 但質地好似好得意), 炭燒七里香 (即係雞 pat pat, 上次去食覺得好好食, 但今次食又覺得唔好食, 仲要個質地怪怪0地), 臭豆腐 (食完個口覺得好臭)..掃完一輪就出發坐接駁巴士上美麗華.

去到美麗華, 第一時間就去搵幸福摩天輪. 今次係我0地第二次坐摩天輪, 不過我覺得上次0係大阪0既景靚啲. 坐完後就去行書店, final 竟然係佢買到書而唔係我. 離開美麗華前我0地商議今晚晚飯地點, 佢話去 <<邊田庄>>, 因為比較順路, 雖然我都好想試 <<邊田庄>>, 但今晚個心去0左牛肉麵0個度, 而佢又好醒目咁睇穿我心意, 所以最後就去0左 <<永康牛肉麵>>. 由於唔駛留肚, 所以我0地各自一人叫0左一碗, 呢度0既牛肉麵真係好正, 麵質同湯底一流, 係我全程最喜愛食物0既 NO.1.

食完飯, 我0地又坐的士返酒店..
今晚臨瞓前, 佢為我開0左一場演唱會…heehee…因為平時佢習慣每晚都唱一首歌俾我聽, 而我每晚都會俾分, 今晚佢就唱0左幾首比較高分0既歌, 仲有新歌添!! 開完演唱會就瞓覺 lu…

2009溫馨浪漫台北牛一遊 (第一天)

日期: 2009-12-10 至 2009-12-13
航班: 國泰
住宿: 六福皇宮 (南京東路站)

9:20 香港機場 >>> 10:55 台北桃園機場 >>> 14:00酒店 >>> 15:00 忠孝敦化 (君悅排骨) >>> 敦化南路行街 >>> 17:30 市政府站 >> 18:30 101 大樓 (85/F隨意鳥 晚飯) >>> 21:00 台電大樓站

一早 6:30 出門口到機場同佢匯合, check in完畢就去 Burger King 食早餐, 醫完肚就登機.
一鐘頭多啲就到達桃園機場, 到步後先去辦落地簽證, 過程五分鐘都唔駛, 所以真係唔駛0係香港攪的!! 過關時, 職員好健談, 同我吹完水, 又祝佢生日快樂!! 哈, 好攪笑! 出機場後就坐長榮巴士去酒店, 落車時俾司機老點0左個反方向, 最後要問人先去到, 激死!!
酒店係五星,都幾靚0架..係上網費貴啲 (要成 HKD14/mins),搶錢!!

0係酒店休息過後, 就出發去我0地0既第一站 ---- <<君悅排骨>> 食排骨麵, 但因為要留肚, 所以我0地兩個人只叫了一個排骨麵加一個炸豆腐. 排骨味道都算 ok, 但又無我想像中咁好食.

食完後, 就隨意0係附近行街, 我0地覺得呢區有啲似日本0既原宿, 佢好快就0係度買0左兩件衫, 而我都唔執輸買0左一件. 行行0下見 <<度小月>> 0係附近, 於是又走入去食. Heehee..又係兩人 order 一碗麵 (其實碗麵勁細的, 我諗 5 啖就可以食哂, 但出奇地, 職員又無白眼我0地0既行為, 好彩). 個麵都幾好食, 雖然都有啲想試其他菜食, 但因為 book 0左 六點半食晚飯, 所以唔可以食太多. (前幾日睇報紙, 竟然話 <<度小月>> 0既麵含過量0既雙氧水, 好彩我0地只叫0左一碗!!!)

今日係佢生日, 是夜晚餐我特別為佢安排去台北 101 裡面0既 <<隨意鳥觀景餐廳>>慶祝, 一早0係香港時預訂0左窗口位同生日蛋糕. 雖然個生日蛋糕唔算好靚, 但可以俾到一個驚喜佢已經好足夠. 呢度0既0野食雖然唔係特別一流, 但有景又有情調, 而價錢又唔太貴 (最平0既套餐只係 四百多港幣一個人), 我覺得都可以一試.

今晚0既飯後安排係落 台電大樓 站睇 band show, 場 show 2030 開始,可惜我0地去到已經差不多 2130, 只剩返一隊 band 表演, 大約睇0左一個鐘就散 band. 因為呢區有個 <<師大夜市>>, 於是兩個又去0左行夜市, 嘩…勁多人. 跟住,見到好 HIT 0既 <<許記生煎包>>, 叫0左佢試, 但佢話一啲都唔特別. 不過, 我0地0既夜市旅程先岩岩開始, 我條腸竟然扭計, 係咁抽住抽住痛, 本來佢話不如返酒店, 但我唔想掃興, 就死頂話可以繼續行…但愈行愈痛, 個人企唔直咁濟, 而我又不自覺咁捉得佢好實, 所以,佢就話唔行坐的士同我返酒店…本來以為會好貴, (因為台電大樓站同南京東路站都有好多個站), 但最後落車都只係 NT200, 即五十蚊港幣, 都算抵!! 就係因為見咁抵, 我0地呢幾日都成日飛的!!! 而我條腸0係上的士無耐就無咩事, 佢真玩0野. 但見佢咁緊張我, 抽一陣又無妨…heehee…
返到酒店梳洗, 差不多十二點就瞓覺 lu, 一日0既旅程就咁結束.

2009 台北四天之旅 <準備篇>

計劃十二月頭同佢去台北一趟, 所以最近我一有時間就上網格價同搵酒店. 台灣啲酒店好多都好大6 feel, 再唔係就似時鐘, 靚啲0既就好貴, 我搵0左好耐先搵到幾間係岩心水0既. 本身 target 0左兩間, 一間係 台北花園 另一間係 台北美侖, 兩間都好新, 而且網上評語都唔錯, 打算十月頭去買 PACKAGE, 點知今日俾我見到 國泰假期 有 六福皇宮 個 PACKAGE 喎, 計落價錢又唔貴 (4D3N 坐國泰早去晚返住五星, 包稅仲要包埋旅遊保險才 $3,139, 真係好筍!!) 呢間酒店上次住過, 勁大勁靚, 行去捷運又唔遠..之前已經好想 BOOK 返佢, 但見到佢要成千五六蚊一晚之後就無再諗 , 估唔到今日竟然俾我發現到呢個超筍價, 真係勁開心!!!
下面兩張相來自官網, 間房真係又靚又大呀!!!!

因為我怕佢會 FULL (其實都可能唔會, 因為台灣太多酒店同太多航班, 但我個人愛穩陣, 想快啲 confirm 哂所有0野), 所以問完佢意見之後就立即上網 book 埋.
第一次0係 國泰假期 買 package , 原來都幾方便. 填少少個人資料就已經攪掂, 跟住佢仲好快 send 埋張 E Ticket 過0黎, 成個過程 5 分鐘都唔駛. (不過佢酒店0既選擇唔多, 而且較冷門).
CONFIRM 0左酒店同機位後, 跟住下一步就可以計劃0下行程喇... 心情開始興奮添!!!

2009 大阪東京七天之旅 <後記>

一向都很懶寫旅行遊記, 今次的起心肝寫足七天, 是因為我希望可以記低我倆一起所經歷過的事 (人老了, 記性會愈來愈差...特別是我本身記性不好的人..過多幾年真係會咩都忘得一乾二淨).
今次旅程過也算過得順利, 多謝他在這七天的照顧

2009 大阪東京七天之旅 <第七天 090718>

<第七天> 新宿 ð 機場
今日是旅程的最後一天...我們決定留在新宿作最後一激. 是日用餐選址亦是在高島屋, 我們揀了一間專吃鰻魚的餐廳 赤坂ふきぬき 作為在新宿的最後一餐. 店員遞上一份全日文的 menu 俾我0地, 雖然我0地不太明白, 但相信只是幾種不同級數的鰻魚定食吧. 我們揀了最貴的 "特上" 鰻魚定食 (成 4,700 yen, 計返港幣三百幾蚊一個, 好貴!!!). 我0地先點一份試試, 打算唔夠飽的話就返去前晚間炸豬扒店再食多餐.

個定食其實都幾大份 (裡面超多鰻魚), 加上鰻魚食得太多會覺得 "好漏", 所以我0地兩個人share 一份都覺得好飽了, 食完之後個肚都無空位再去食炸豬扒了.

走的時候, 見到好多日本人都係叫我0地呢一set, 而且仲要係一人一set (日本人真有錢同大食!!), 一個人邊有可能食哂呢個定食呢..
食完飯之後就爭取時間去shopping, 由於之前無行到 LUMINE, 於是就向各座 LUMINE 進發. 行完 LUMINE 再行多次 MYLORD, 最後都係決定去買返前幾日睇中0個件Mercibeaucoup外套, 不過買另一隻色. 由於之前其實我無乜點買衫, 所以最後一激我揀得特別落力, 好彩, 都好有收獲. 行到差不多兩點半就返酒店 pack 0野, 之後就坐 NEX 出機場, 結束今次的旅程.
去到機場四點多啲, 開始有少少肚餓, 我0地就0係機場食埋最後一餐壽司餐作結.

東京再見喇..我好快會再0黎探你......等我呀!!!!

2009 大阪東京七天之旅 <第六天 090717>

<第六天> 新宿 ð 代官山
今日向代官山進發. 因為代官山鋪頭好晏先會開門, 所以今日奉旨瞓晏啲. 十二點先出門去食飯, 揀了高島屋上面的"中村屋" 食日式西餐. 我點的咖哩蛋炒飯定食水準比較好, 而蝸牛先生點的咖哩雞就略嫌普通了一點.

食飽飽之後就坐電車去代官山. 代官山是個人口密度較低0既地方, 感覺比較優閒同舒服. 這區鋪頭所賣的東西比較特別, 而價錢亦相對較高...不過今日我又沒有收獲, 但蝸牛先生又有收獲.
行完代官山才四點多, 見時間尚早就決定落中目黑兜個圈, 但去到我0地搵極都搵唔到書講0既鋪頭喎, 跟住就放棄坐返車返新宿行百貨公司. 行到差不多時間就去食飯.
其實今早已經諗定夜晚去酒店附近0個間居酒屋食串燒, 但我0地去到已經無位, 跟住再搵第二間, 第三間...結果都 full, 我諗日本人星期五晚多數會出街食飯的, 所以度度都無位. 無辦法啦, 唯有返酒店放低啲0野, 休息一陣等夜少少先出去...
一個鐘後再去返第一間望望, 店員示意我0地等等, 無耐就入得去坐. 好0野, 終於有得食. 打開 menu, 係全日文的..而且無乜圖, 我0地唯有靠估...點了些豬串燒, 豚肉鍋 (不過個鍋就比想像中細, 得幾塊豬肉同一堆菜咋) 豚肉飯..(點解我0地咩都係豬?? 因為呢間0野係一間專門食豬0既鋪頭, 除0左豬就無其他肉).
我0地亂打亂撞咁 order 0既0野又幾高水準, 唯一錯誤係叫0左一串豬肝, 我0地兩個都唔食的.

呢間鋪頭叫豚道樂 (唔知佢同蟹道樂有無關係架呢??!), 佢0既0野食其實都幾 ok, 如果佢可以加個英文 menu 就更好喇!!
食完呢餐後就返酒店執行李, 因為今晚會係今個旅程0既最後一晚了...嗚嗚..有點不捨.......哇..........

2009 大阪東京七天之旅 <第五天 090716> 完

<第五天> 築地 ð 涉谷 ð 原宿
離開築地才十時多, 本來計劃先落原宿再落涉谷, 但因為原宿的鋪頭比較遲開鋪, 所以就先去涉谷0既百貨公司巡視. 行到差不多兩點, 去了味之時計台食拉麵. 呢間店賣的是札幌/北海道風味拉麵, 麵裡面會有一塊牛油, 0係香港食過類似的, 覺得味道幾好, 加上有朋友大力推介, 所以就去0左試. 我點了味噌湯叉燒拉麵, 佢就點了正油味帶子&叉燒拉麵 (其實食完都唔知咩叫正油, 但佢個湯底比我的味道重一點同好飲一點).

吃了幾口, 覺得無乜特別, umm...似乎香港 888 拉麵比佢還要好吃. 有點失望添...
食完拉麵就向原宿進發. 原宿我無乜心水鋪頭, 最想去的是 KIDDY LAND , 因為可以搜購我最心愛的芝麻街精品, 不過今次裡面無乜新貨, 大部份上年已經見過 lu, 結果空手已回.
原宿是蝸牛先生的購物天地, 有他喜愛的 PAUL SMITH , 仲有一堆我唔識的牌子. 行了大半日, 開始感到腰酸背痛, 於是到了一間咖啡店小休一會, 點了一杯士多啤梨飲品, 可惜佢貨不對版, 明明圖晝入面啲 CREAM 好高好靚, 但手上0個杯0既 CREAM 係溶的.

( 其實當時心裡有點不明白, 日本人明明鍾意包裝, 無理由會整出一杯咁肉酸0既0野, 唔通佢扼我係遊客唔識0野??!) 飲完之後再行多一陣就返新宿食飯.
今次我0地又懶醒, 諗起酒店旁邊有個私鐵站出口 (其實懶醒0個個係我, 話佢聽有出口), 於是我0地就決定唔坐JR, 改塔私鐵返新宿. 點知....又奶0野....酒店旁邊0既出口只 FOR 乘塔大江戶線...我0地由原宿返新宿, 跟本唔會坐到0個條線......於是, 我0地0係地底行0左好耐, 希望可以搵到出口轉去大江戶線...但行0左好耐都搵唔到, 最後決定放棄, 就0係個最近0既小田急出口上返去就算. (一場0黎到唔好蝕, 0係小田急兜返轉先, 之後又落超市買0左兩個桃).....最後我0地要再經多幾個商場...千山萬水先可以返到酒店!!! 簡直攰到極點!!!! (不過可以記住, 其實轉都營新宿線返去都方便的, 下次再去要醒目啲).
返酒店小休一粒鐘後再戰 MYLORD, 睇中 Mercibeaucoup 一件外套, 想買藍色, 但無新喎....心諗件衫咁貴, 無理由要 display 0架, 於是掙扎一輪後決定放棄佢. 行0左 4 層後覺得條腰超痛 (唔好奇怪點解我係腰痛而唔係腳痛, 係因為我曾經有腰患, 所以最快唔舒服0既會係腰), 見無乜心機, 都係決定去食飯先, 下次繼續行埋其他樓層.
今晚我0地去高島屋名代とんかつ「かつくら」 食炸豬扒. 呢間鋪頭網上啲人熱推, 而我之前幾次又無去過, 所以今次一定要試 (同埋其實我又超愛食炸豬扒呢). 我0地去到其實都已經是九點鐘, 但鋪頭出面仍然有好多人排隊, 不過好彩, 等0左十五分鐘到就有位. 我0地點了一客極上炸豬扒, 一客炸蝦 同一件蟹肉忌廉卷.

豬扒超好味, 反而蝦我0地就覺得不及香港的 とん吉 咁有驚喜. 不過 OVERALL 0黎講, 呢一餐係超超超好味.
食完豬扒返酒店又品嚐我至愛0既桃, 雖然個桃無0個日0係大丸買0既咁靚, 但都好好味!!

2009 大阪東京七天之旅 <第五天 090716> 待續..

<第五天 酒店 ð 築地>
今早打算去築地食壽司. 但由於我十分不願意放假都要倒屎咁早起身, 所以我0地成八點鐘先出門口.
早上日本的電車是特別多人的 (係仲迫過香港0既地鐵), 0係車箱裡面我兩腳都唔著地, 仲要俾成堆男人迫住, 感覺超難受!! 由新宿站一直迫到 "六本木" , "麻布十番" 等呢啲商業區車站先可以叫做舒服一點 (但其實都仲好係迫)...唉..一早咁迫法, 其實都已經無乜胃口...
去到築地行0左一圈, 無乜 idea 食邊間 (因為想試新0野, 唔想食返之前0個啲), 見到有間叫 "壽司清" 0既鋪頭, 我就記得網上好多人話好, 於是就入去試試...坐隔離的是幾位香港年輕男女, 女的不斷話好正呀好正呀...攪到我都開始有點期望...跟住, 我0地隨意點了些壽司, 吃了第一件, 感覺怪怪的 (因為完全無味), 再吃..都係同樣感覺....當時心諗, 係咪太早, 我味蕾仲未有反應呢?! 於是再多叫幾款...但好可惜都係覺得超難食. 我靜靜地問友人覺得怎樣, 原來佢都覺得唔好食呢....

可憐0既友人一心來到築地打算食新鮮魚生, 點知去了黑店, 有點不憤, 於是佢提議去返佢上次去0個一間再食過.
友人一坐低就指住魚缸條魚同師傅講 "SASHIMI", 隔一陣後, 一條 "生 OUT OUT" 0既魚就放0係我0地面前, 當時我覺得好殘忍, 因為魚魚仲彈緊..但友人狂話好好食, 0係好奇心驅使之下, 我都咬了半片...咦....又真係幾好食喎. 不過可惜丫, 一大早我唔敢食太多生0野, 所以我無0係呢間食到0野..而加諗返, 好似有點後悔呢.

食完後就0係築地市場行0左一陣, 又買0左啲元貝...之後就向下一個目的地進發..
<待續>

2009 大阪東京七天之旅 待續

<第三天> 神戶三宮 ð 六甲山牧場 ð 神戶 ð 梅田
酒店 ð神戶三宮
今日去神戶食 LUNCH, 出發前先落樓下大丸超市買點小吃打打底, 我0地每個 counter 都買一件, 咁就可以試幾間唔同0既炸物..之後再買多兩個水蜜桃 (日本水蜜桃係我至愛, 我愛佢又甜又多汁). 跟住行行下又俾我無意中發現 "自由軒" 個 COUNTER 喎, 於是我0地就決定0係聽日離開大阪前落0黎試.放低桃桃返房, 之後就坐 JR 落神戶三宮, 只需大約 30 分鐘車程就可以到達. 出車站見到有個 旅遊客戶服務 counter, 我0地就入去拎0左啲 Map, 順便又問問 staff 我0地想去0個間牛餐廳應該向邊個方向行.
一路沿途都無瓦遮頭, 又熱又哂, 好彩地鐵口有扇派 (結果呢把扇陪0左我成個日本旅程), 行0左十五分鐘終於搵到間牛餐廳.
呢間牛餐廳(Steak Ayoama)係我0係人0地啲 blog 搵到0既, blog 主仲 post 埋師傅整牛0既 movie 上去, 成個過程都好吸引, 於是我0地就決定試呢間而放棄好多人推介0既 Mouryia 同 Steakland.
入到餐廳有個好友善0既婆婆招呼我0地, 因為佢識少少英文, 所以同佢溝通完全無問題. 我0地點0左第一同第二貴0既牛套餐0黎試 (我已經唔記得係乜牛打乜牛), 食完頭盤同個湯之後, 師傅就開始0係我0地面前表演佢煎牛技術喇...雖然食完之後我唔係太講得出兩者有咩分別, 但貴啲0既牛肉質係比較淋同多汁...同行友人對於呢餐有極高0既評價, 大家都覺得今餐無揀錯呢.

食完牛肉飽飽後, 我0地就進發上"六甲山牧場"......
之後待續...