2018.10 北海道 {Day 3} 札幌遊

2018.10.29 北海道 {Day 3} 札幌遊

住溫泉酒店我哋通常都會約 8:00 食早餐

 唔駛太早起身, 食完又可以有少少時間浸多次溫泉先 check out

日本嘅飯真係好好食

十一點 check out, 行返出路口諗住買尋日的士司機強烈推介嘅定山溪出名的饅頭

點知 sold out (定其實係未出爐?!), 無緣~

跟住就坐巴士出返札幌

未夠鐘check in, 唯有先放低行李先出去

早餐後都無食過嘢, 今餐諗住食拉麵

途經 Tokyo hands, 每次點都要入去行陣

喜來登拉麵 薄野 (tabelog 3.58分)

其實本來想食另一間的

不過店主咁岩呢段期間去咗東京比賽

最後揀咗呢間

去到都等咗一陣先可以入座

勁多蔥嘅麵豉拉麵

呢度只賣三款湯底嘅拉麵 - 麵豉, 鹽同豉油

根據觀察, 麵豉湯底似乎係最受歡迎的

但個人就覺得普普通通

食飽就開始行街

呢頭小店好似唔太多, 所以都係主打百貨公司

 行到五,六點開始攰

但因為今晚 book 咗九點食壽司

所以要繼續盪吓先

咁岩附近有幸福 Pancake, 梗係要去食吓啦

呢間又變成港人 pancake 店

不過我覺得佢真係幾好食, 鬆軟得嚟又唔會一陣風, 蛋味又夠濃

食完都仲有成兩個鐘先到晚飯時間

呢頭唔多嘢行加上好多百貨公司八點就開始 close

我哋唯有附近兜來兜去

期間我哋懷疑誤闖紅燈區

見到有好多掛滿性感女仔相嘅鋪頭

又有好多男子拉客 (就好似新宿歌舞技丁咁)

雖然唔算太滋擾, 但都係快快離開

由於今日都買咗唔少戰利品

為免大包小包咁去餐廳

於是食飯之前先將佢哋放低喺 Locker 

鮨処 有馬/ありま (Tabelog 4.14分)

壽司師傅好 cool, 唔多講嘢 (雖然我都唔多識講咁多日文)

本來都覺得個氣氛悶悶哋

不過比我哋發現其中有個外表都幾宅嘅食客

(我覺得佢似似哋少林足球嘅醬爆)

佢每食一件壽司都會有唔同嘅表情

有時一放入口會先閉眼, 然後微笑; 

有時會一入口就即刻露出滿意嘅笑容

再加上佢似醬爆嘅樣, 成個畫面真係好 funny

或者我哋期望太大

呢餐又無想像中咁好食

食完都已差十一點

要快快返酒店沖涼執行李, 準備我哋之後嘅三日兩夜郊區遊

返到酒店第一件事當然係睇夜景

雖然唔及香港嘅靚

但呢度又有另一種吸引嘅地方

2018.10 北海道 {Day 2b} 定山溪第一寶亭留

2018.10.28 北海道 {Day 2b} 定山溪第一寶亭留

check in 時的 welcome 點心

嗰兩粒係糖, 勁甜但用來送茶又岩岩好

今次間房都唔錯

至少房內溫泉係真溫泉

終於學識原來溫泉附客室係有分真泉水同普通水

而加 book 房時都會留意

如果係水就可以 book 無風呂嘅房慳返筆

房型: 展望風呂付客室（60平米以上）

房內溫泉都夠大, 開住窗通爽之餘又可以睇到風景

之前網上見人話旅館的公眾浴場好正

於是休息陣就趁食飯之前去浸吓先

<森之湯>

溫泉唔算好大, 容納唔到太多人

所以浸咗一陣都係返出去 lu

訂房時附送一杯飲品

浸完飲就岩岩好

之後返上房休息陣就去食飯啦

<松庵>

呢餐食到好飽好飽

不過原來係我自己攞嚟

book 房時訂咗個加料嘅餐

正常係無嗰盤海膽壽司的

加埋呢盤真係飽到上心口

book 房時用咗 "元気です北海道クーポン"

慳咗 20,000 yen

真係超級抵!!

2018.10 北海道 {Day 2a} 定山溪賞紅葉

2018.10.28 北海道 {Day 2a} 定山溪賞紅葉

北海道早晨~

十月去北海道就係希望可以睇到紅葉

雖然十月底係有啲遲

但都決定去定山溪碰吓運氣

搵資料時見到好多人話紅葉季節時入定山溪會勁塞車

閒閒哋可以塞成幾個鐘

有坐長途車恐懼症嘅我當然係有啲擔心

於是我哋決定早啲入去

同埋...........坐的士

呢日大約八點就出發坐車

沿途交通順, 大約 45 分鐘就到定山溪

埋單七千幾 yen

今晚會住定山溪第一寶亭留

我哋先放低行裝喺酒店, 然後再出去四圍遊

之後就向住白絲瀑布方向行

沿途有個好大好大嘅公園

雖然好葉唔多, 而且仲開始轉黃, 但都好靚

睇到我同蝸牛先都好開心好興奮

我哋仲喺度打千秋, 玩搖搖板同食早餐

喺呢個公園都逗留咗差不多成個鐘, 影咗好多好多相

之後愈行愈天陰, 差不多行到白絲瀑布嗰陣仲突然落大雨

有少少狼狽, 但都阻唔到我哋向瀑布進發  (因為附近根本無瓦遮頭!!)

好彩行到瀑布又忽然細咗雨

我哋可以影返幾張到此一遊嘅相

之後沿途行返出去, 又開始無乜雨, 真好~

路經免費足浴場, 見無乜人於是又去體驗吓

浸完休息夠又繼續行程

點知蝸牛先生忽然話肚痛

(明明今早無乜食過嘢, 我懷疑岩岩浴足場踩過石春路觸動到某條大腸神經)

於是拿拿臨去搵廁所

行入觀光協會, 點知係無嘅

好彩見到不遠處有酒店

於是急急腳行過去

最後行到去定山溪萬世閣酒店, 順利搵到廁所

解決完後, 蝸牛先生又回復生猛繼續行程

我哋向二見吊橋進發

瘋狂影相後, 又到食飯時間

呢頭餐廳好似唔係好多

最後我哋入咗呢間清重鐵板燒

門口寫住推獎店, 應該唔會差掛

一推門入去, 入面無人, 而且有少少簡陋

伏味濃!  但已經唔好意思撇退

我哋分別揀咗一碗豚肉飯同牛肉飯

豚肉飯味道尚可, 但唔知點解飯嘅溫度只係微暖

而蝸牛先生的牛肉飯的味道就好"SO"

白白浪費咗一餐嘅 quota

一場來到定山溪, 就算紅葉已經滿開咗都想上豐平峽行個轉

出發前以為剩係自駕或巴士先可以去到

而巴士亦唔係全年都有

咁岩我哋呢段時間巴士已經無開

諗住放棄

點知頭先喺觀光協會比我哋發現佢哋有代 call 的士服務

由觀光協會坐的士去豐平峽停車場車資大約千幾YEN

落車之後要再轉電動巴士

雖然無乜紅葉, 但都比想像中靚

我哋又喺度影咗大量嘅相, 都幾好玩

相信呢度紅葉滿開會幾靚

雖然今次無緣, 但都幾好玩

走嘅時候去返售票處叫職員幫我哋 call 的士去酒店

 三點幾鬆啲就 check in 啦~

(續)

2018.10 北海道 {Day 1} 出發

2018.10.27 北海道 {Day 1} 出發

對上一次去北海道已經係 2014 年嘅事

當時係 5 月, 無花無紅葉, 其實都有少少悶悶

今次決定十月出發, 希望可以睇到紅葉

半年前就開始訂機票

當時見到一張直航的機票要成六, 七千蚊

為慳錢, 唯有買要轉機的, 但都要五千幾

一個月後再睇, 直航機票竟然變到四千幾一張

我計返, 就算我 cancel 機票要罰錢 (一張手續費 $900!!!), 都只係比我原本貴百幾蚊

但就可以一程飛過去

所以最後都係 cancel 再 book

出發前一個月, 北海道發生大地震

都有少少擔心

不過最後都係如期出發

喺機上睇咗 <黃金花>, 又幾好睇 

今次班機坐得唔係幾舒服

因為格離行個男人要湊b, 佢全程揹住個 b 企起身左搖右搖 

而佢個 pet 就喺我塊面側邊搖來搖去, 極騷擾!!

捱過四個幾鐘的機程終於到達北海道

今次過關出奇地快

但行李就等咗差不多半個鐘先有

之後就坐火車出札幌

今次揀咗車站上蓋的 JR Hotel Nikko Sapporo

地理位置真係超正超方便

當然價錢都唔平啦

不過因為岩岩發生完地震, 北海道政府為咗振興旅遊業, 於是向旅客派出訂房 coupon

而我幾過多番努力, 最後搶到近十萬 YEN  的 coupon  (偷笑)

房望出去嘅 view 超正

真係連去JR Tower 的時間都可以慳返

今次間望向南

欣賞完夜景, 拿拿臨落去叫酒店幫我哋打電話去餐廳 confirm 呢幾日嘅 booking

之後就去大丸買少少嘢食醫肚

book 咗九點食燒肉, 所以都唔敢食咁飽

休息陣就出去 Stellar place 行吓

差不多夠鐘就撘車去食飯

我地先坐地鐵去大通站, 之後打算再坐電鐵去東本願寺前駅

去到車站等咗陣發現下班車要成三, 四個字

望吓地圖其實唔係去遠, 於是決定行過去

焼肉 グルマンズいとう (tabelog 3.81分)

之前膽粗粗自己打電話過來訂位

當時明明留哂名, 但唔知點解去到佢話無我個 booking

(好沮喪, 我嘅日文真係仲未到家)

交涉完一輪, 最後佢都比我哋坐低食, 不過限時一個鐘

燒肉食一個鐘確係有點趕

不過難唔到我哋

坐低先研究一輪個 MENU (因為全日文)

最後 order 咗五碟加一碗飯

(其實四碟都夠食了)

食到超飽

肉味都幾濃, 味道唔錯, 值得再 encore

食完之後就行返去坐地鐵返酒店

第一日咁就完了