2016.11 大阪 {Day 2a} 白浜 千疊敷 / 三段璧 / とれとれ市場

2016.11.27 大阪 {Day 2} 白浜 千疊敷 / 三段璧 / とれとれ市場

一早起身望出露台, 白濛濛一片, 好大雨呀!

個心即刻灰咗一灰, 因為今日主要係戶外活動

不過都無辦法, 唯有希望食完早餐後會停雨

海舟嘅早餐係非預約形式的

只要喺特定時間去到餐廳就得

呢個安排我都幾buy, 因為去旅行要瞓到自然醒先至夠 relax 

呢度嘅早餐都幾岩我食, 因為熱盤多

我真係好怕晨早流流食咁多冷盤

其實早餐前有去貸切風呂嗰邊望下, 不過都係全full

食完早餐死心不息又走去望下

今次有位喎

難得有位唔理岩岩食完早餐都去浸

貸切風品有三個, 今次我哋浸石匠之湯

個風呂唔算好大, 不過有view

相信如果晴天會更靚

lobby 有免費梅子水供應, 浸完出去飲返杯凍冰冰嘅嘢都幾舒服

休息咗一陣打算返房

路經貸切風呂門口, 又八掛走去望下有無位

咦....又有喎

於是決定又走落去睇下

今次係梅香の湯

 都係大同小異, view 差不多, 所以我哋浸咗一陣就返房

check out 時間係十一點, 食完早餐, 浸完兩次溫泉都仲有小小時間瞓個覺

住下住下, 又覺得呢度幾舒服

check out 完雨都仲未停

喺 lobby 等咗陣, 但啲雨都係無細到

所以最後都係決定出發

下一站景點係千疊敷

由海舟行過去只係 around 十幾分鐘腳程

如果唔落雨都幾好行
兩人只用一把傘, 每人半邊身都差不多濕哂
好彩呢度有間物產商店, 即刻入去買多把傘

落雨之下嘅千疊敷完全唔覺得靚
如果唔係落雨, 都可能會走落去玩下
不過落雨就費事啦

逗留咗一陣, 之後就出發去三段璧

由千疊敷行過去, 都係大約十幾分鐘腳程

入面其實無乜嘢睇, 大約十五分鐘已經可以行完

行完岩岩好趕得切坐巴士去 とれとれ市場

依然係落緊雨

入面有乾濕貨, 無想像中咁大
撞岩有解體 SHOW
我覺得個刀手有點似變態佬

之後買咗少少刺身同海鮮去燒烤
(刺身係幾新鮮的, 不過燒烤就唔多抵)

蝦同象拔蚌我哋揀咗燒烤同刺身各一半, 呢度係半份
買嘅時候, 隻象拔蚌明明好大隻, 點知........出來得咁少

懷疑被騙, 左下兩隻螺係食唔到架, 入面好似石頭咁硬
無記錯仲要成 700 yen 一隻!!
其他海鮮亦唔覺得有咩特別, 唔怪得燒烤區剩係得香港人, 無日本人啦
(基本上好似九成都係香港人)
不過好彩我哋只係買咗好少嘢~

食完之後就坐的士去車站返大阪啦

返大阪要兩個幾鐘頭車, 岩岩又唔算食得好飽
所以決定上車前買多盒壽司醫肚
(早知喺とれとれ市場 買啦)

第二日 待續...

2016.11 大阪 {Day 1} 白濱 海舟溫泉

2016.11.26 大阪 {Day 1} 白濱 

年底壓續大旅行 - 大阪九天梳乎之旅

今次 7:50 起飛, 5 點幾要出發去機場

前一晚竟然完全瞓唔著, 眼瞓到傻

*****

原本第一日想出發去和歌山浸溫泉

不過想住嘅溫泉旅館已經滿咗

所以最後唯有改去白濱

不過白濱嘅溫泉旅館比較舊

我哋揀咗好耐先決定到住邊間

海舟 (房型: 波の抄)

http://www.hotespa.net/hotels/kaisyu/

呢間應該好多香港人都聽過

最初唔太想 book 佢係因為唔想遇見太多嘅香港人

但最後無乜選擇下都唯有揀佢

一落機, 我哋先將行李寄去大阪嘅酒店

拎完行李過哂海關之後, 出去向左走向右走都會有快遞公司

而我哋就揀咗向右走

寄件過程比想像中快

兩個 28 寸大喼運費為 JPY 3,800

唔平, 不過總好過拎住佢喺白濱周圍走

由於過程一切順利 (飛機無DELAY, 寄行李手續又簡單快捷)

最後竟然可以趕到早一個鐘頭嘅火車
本來預計六點先會去到白濱, 而加未到五點就到啦, 賺咗

關西空港 >> 日根野 >> 和歌山 >> 白濱
其實機場由過去白濱無乜 so, 車程同大阪出發差不多, 而且仲要轉兩次車
但就可以慳返由機場出市區嗰程時間

兩個鐘多少少就去到白濱
今日天色麻麻

今日為咗趕車, 食完早餐就無正正經經食過嘢

(好彩預先喺香港買定一袋麵包醫肚) 

所以入溫泉酒店之前先去車站附近買少少嘢食

雖然有免費巴士/ 付費巴士去酒店

但因為中途勁多站, 所以我哋就直接坐的士過去

的士站前有料金表, 可以大約知道車費係幾多

去到酒店有人帶我哋去 check in

先喺大堂度等, 無 welcome 小點心, welcome drink 就要自己去拎

之後 check in 完無人帶我哋入房, 而且要自己拎住行李上去

住過咁多間, 咁嘅安排真係第一次

老老實實, 第一印象唔多好

房就正常, 只係細咗少少

個私人風呂都比較細

VIEW 都 OK

對住一個大海, 可惜當日天氣唔好

巡視完間房就食頭先喺車站附近買的壽司便當

望住個海休息下其實都幾舒服

呢度食飯時間分兩段, 五點半同八點
我哋咁肚餓其實好想揀五點半, 不過已經 full 左
(另一個原因想揀五點半係因為呢度十點至十一點有免費拉麵食)

食完便當, 喺房浸完溫泉都仲有耐先有飯食
無所事事就唯有瞓晏覺
(今日舟車勞頓都咪話唔攰)

終於都捱到七點半
出去貸切溫泉望下, full 哂

諗住早啲去食堂可以早啲食
點知係唔得嘅, 一樣係等到八點先可以入去

一坐低就叫我哋 order 飲品 (額外付費)
蝸牛先生揀咗清酒

前菜

呢隻剌身船好精彩
剌身好新鮮, 另外入面仲有少少熟食, 而且份量唔少
我哋覺得都幾好食

炸物

鮑魚好新鮮, 同埋都算幾大隻

茶碗蒸

 主食可以揀烏冬 or 魚生飯
我揀咗烏冬, 味道就無乜特別

蝸牛先生揀咗魚生飯, 佢話都幾好味

甜品: 普普通通

呢餐食到好飽, 已經無胃口再去食免費拉麵
返到房例排浸多次溫泉就瞓覺
不過生寶床, 呢晚又瞓得唔多好

2016.09 名古屋 {Day 6} 名古屋再見

2016.09.19 名古屋 {Day 6} 懷石料理 

今次的旅程比較短, 只玩六天

最後一日, 沒有什麼特別地方去

食完午餐就要準備去機場

在名古屋的最後一餐, 我咃揀咗去食懷石料理

吉兆

其實吉兆嘅本店喺京都

不過午餐最平都要四萬幾 yen 一位 (仲要未計稅)

但名古屋店嘅價位就親民啲

只係萬幾 yen 一位

想試又要平, 唯有喺名古屋食

溫泉酒店以外, 應該係第一次出去食懷石料理

我覺得都係一個幾好嘅體驗

由擺盤到服務, 真係有貴賓嘅感覺

不過我都係鍾意喺酒店食飽可以返房浸溫泉嗰種感覺

午餐由一碗米茶開始....

雖然已經唔多記得食嘅係乜, 但我記得味道唔錯

而且每一味都 present 得好靚, 好吸引

呢碗魚湯好飲

最估唔到係佢竟然將頭先食剩嗰一條魚骨起肉拎返去再炸

好脆, 而且幾好味

食飽之後就出去望下街景

我估夜晚上來應該幾靚

跟住去高島屋買少少嘢食上機食

之後就返酒店拎行李去機場 lu

名古屋機場有好多食店同埋商鋪
食又好, 買又好, 好岩上機前最後一激
其中有檔賣嘅蝦片好好味, 做手信一流
(就係呢張相最左邊橙黃色招牌嗰間)

喺機場併完, 呢個旅程就完咗喇~

我們的 "自家製" 飛機餐

因為唔想食機上嘅飛機餐

所以我哋臨上機前喺機場買咗便當上機食

左邊係矢場嘅豬扒三文治, 右邊係喺高島屋樓下買的

原本打算機上開大餐, 點知蝸牛先生突然唔舒服, 無胃口

真係可惜~

我都幾鍾意食炸豬扒三文治

成個旅程都未食過名古屋名物, 鰻魚飯

上機前點都要買返盒

不過最後都係帶咗返屋企先食

可能放得太耐, 返到去鰻魚已經唔脆 lu

不過味道還可以

名古屋 再見~

名古屋主要都係睇景多

shopping 真係唔多岩

我估應該唔會咁快再來

第一次唔駛一袋二袋咁坐火車去機場

****

名古屋之後, 就係十一月尾大阪之旅

睇嚟呢度會變咗遊日 blog

2016.09 名古屋 {Day 5} 名古屋市區遊

2016.09.18 名古屋 {Day 5} 名古屋市區遊

來到尾二嘅第二日, 終於返返去市區SHOPPING

名古屋可以 SHOPPING 嘅地方唔多

主要集中在榮駅, 矢場町駅, 而且都係以百貨公司為主

去到榮駅行咗一陣先去食飯

但為了避開用餐人潮, 餐廳一開門我哋就過去

是日目標係名古屋好出名的豬扒店

矢場豬扒 LACHIC 店

坐低一陣就已經 FULL 哂

同蝸牛先生各自點咗唔同部位嘅豬扒SHARE 食

味噌汁上枱時先淋上, 包保唔會令豬扒浸到過淋

個汁用來送飯其實好開胃, 不過食到中途已經開始覺得漏

對我來講, 味噌汁味道有點偏咸

我相信名古屋人係食得比較濃味的

蝸牛先生的鐵板豬扒

淋汁時啲汁彈到周圍污糟哂, 好尷尬

兩份豬扒嘅部位唔同, 一份比較瘦, 另一份比較肥

肥啲就當然好味香口啲

食飽之後就出發SHOPPING 喇

不過名古屋真係唔係好好SHOP

鋪頭選擇唔多, 而且好多貨都剩係得返LAST ONE

行到咁上下要休息

上網搵到間食PANCAKE 嘅 CAFE

一於又去試下

Light cafe

名古屋市中区栄3-27-27 3F

門口好靚, 好relax

不過要行三層樓梯先可以到達

同服務員溝通咗一輪先落到單

蝸牛先生揀咗 3D 熱朱古力

我就叫咗壺茶

其實一心想食厚厚的梳乎里 PANCAKE

不過呢度只得呢款, 味道不過不失

食完之後又再 SHOP 過

是夜大雨, 好狼狽

行到啲鋪頭關門就去食飯

原本今晚我哋打算去松板屋食鰻魚飯

點知撘咗一架壞嘅 LIFT

架 LIFT 上到十幾樓突然唔郁, 門又唔開

停咗一陣, LIFT 入面嘅人大家你眼望我眼

跟住好彩佢又突然落返地下開門

出返去之後已經無心情再喺呢幢 building 食飯

最後都係去返中午食 lunch 嗰座大廈 - Lachic

呢度都有間出名嘅鰻魚飯 - 備長, 不過超多人

最後揀咗燒肉

一升びん

呢度主力食松板牛

用嘅係炭爐

我哋叫咗肉雜錦, 我記得唔太貴, 但肉質同埋牛味都好正

不過燒嘅時候超級大煙

另外又加咗一碗靜岡冷麵

味道正常但麵質太硬

呢餐誤打誤撞又幾好食

食完之後就返酒店喇

臨返酒店前喺酒店樓下藥妝店作最後一擊

呢度又大間又無乜人, 都幾好行

最後一晚要執行李喇

今次買得唔多嘢, 好快執完