2012.07 台北遊 - Day 4 美濃屋拉麵 (中山站) > 台北當代藝術館 > 台北市立美術館 > 台北車站 > 一品山西刀削麵之家 (永康街) Part 2

Day 4 (2012.07.28) : 美濃屋拉麵 (中山站) > 台北當代藝術館 > 台北市立美術館 > 台北車站 > 一品山西刀削麵之家 (永康街)買完護膚品, 就去服務台申請退稅 (只要 OVER NT3,000 就可以申請). 在台北, 我也是第一次辦退稅. 首先要去百貨公司的退稅 counter, 將護照, 購貨單同入台證交俾 staff, 之後佢就會將稅退返俾你, 最後仲會有一張form, 在離境前要自己交去機場的退稅 COUNTER, 呢個過程係最煩的, 因為交FORM 時要將你買的貨品俾海關望一望, 即係...一定要在寄倉前做, 而且...仲要在機場裡打開已經塞滿的行李箱, 勁煩!!! 好彩之前已經熟讀左退稅須知, 如果唔係, 我一定會在先 CHECK IN 後交FORM, 咁到時真係唔知俾乜野海關望.

有關退稅的詳細程序, 守則, 可以0係呢度搵到 <外籍旅客購物退稅須知>

離開新光三越, 就同蝸牛先生去買胡椒餅, 忽然醒起未上網攪預辨登機, 為怕遲0左無連位, 於是即刻用電話上網, 好彩仲有....攪完一輪, 蝸牛先生竟然已經一個人消滅哂成個胡椒餅, 實在太過份!!!

之後就返酒店休息, 差不多九點就坐的士去食永康牛肉麵. 唔知點解, 幾年前同司機講要去永康, 司機兜0左幾條行都未去到, 到今時今日再去, 司機都依然係狂兜..究竟當地人係咪唔會食呢間架?! 定係司機都愛在永康街兜路扼錢呢?! 最後千辛萬苦終於去到, 但永康已經打烊了, 勁失望!!! 之後行返出去想食度小月, 但佢地都話準備打烊, 唔接ORDER 了, 再去多一間出名食魚丸的, 又話收檔, 台灣人真識嘆, 大部份食店都係九點半收檔.

最後行下行下, 見到一間叫 <一品山西刀削麵之家> 的麵店, 門口掛住牛肉麵冠軍的旗, 雖然都已經係幾年前, 但估佢都應該有D 實力, 於是就入去試.

叫了蒜泥白肉
估唔到又幾香幾好味

牛肉麵
湯底好清, 牛肉麻麻....唔算難食, 不過都唔算好味. 不過, 價錢比起出名0個幾間店, 平左差不多一半, 真係一分錢一分貨

之後就返酒店, 蝸牛先生就自己在台北車站附近搵食...不過佢話都係無乜野食...最後只係食了一杯雪糕就返來.

出發前, 在香港上網訂了台中日出的鳳梨酥, 今日寄到酒店, 估唔到連紙箱的包裝都咁靚.

仲送埋紙袋

土鳳梨酥
賣點係佢的外皮有好濃的芝士味, 我覺得幾特別. 而且, 唔會好甜, 帶有一點點的酸, 我覺得好夾.

17號鳳梨酥
我無研究咩係17號鳳梨, 不過呢個鳳梨明顯好味D...但個皮就無芝士味, 係正常鳳梨酥的皮

太陽餅
上次食過一次覺得幾好味, 所以今次再買

最後一晚在台北, 要開始收拾行李返香港 lu....

2012.07 台北遊 - Day 3 上引水產 > 東區 > 龍山寺 > 台北微風廣場 > 老張牛肉麵 > 大來小館 > 師大夜市 (PART 2)

Day 3 (2012.07.27) : 上引水產 > 東區 > 龍山寺 > 台北微風廣場 > 老張牛肉麵 > 大來小館 > 師大夜市
離開 SOGO 後向龍山寺進發, 我們不是去練功, 而是為了蝸牛媽媽的 "李錦利八仙果" (地址: 台北市康定路187号). 我們坐捷運到龍山寺站, 然後在三號出口上去, AROUND 5 分鐘就到, 都幾易搵. 入到鋪頭還未開聲, 店員已經說八仙果放在收銀櫃 (駛唔駛快得咁交關?!).

離開李錦利, 之後再去對面的黑橋牌, 雖然香港都有得賣, 但價錢差不多貴一倍, 反正又唔重, 就買了一 PACK 返去.

下一站是台北徹風廣場的 HANDS台隆手創館. 前天睇中一個小小的食物磅, 不過想去 AFTERNONN TEA 比較一下, 所以無買. 最後還是覺得呢個比較好, 所以今日決定將佢帶返香港.

拆返港幣要二百幾, 其實有點敗家, 不過想買好耐了, 而且真係有用嘛.......

之後就返酒店休息, 到晚飯時間再出去
今晚的目標是我日想夜想的牛肉麵

其實我幾鍾意食永康, 不過都想試試第二間
最後揀了都有點名氣的 "老張牛肉麵"

由於蝸牛先生麻麻地牛肉麵
為免浪費 QUOTA, 所以我們只叫了一碗大的蕃茄牛肉麵 share 食其實睇幅相都可以見到麵質頗淋, 失望呀!!!!
不過湯底就OK



另外又點了炸排骨
不過, 唔 LIKE 佢的炸粉, 我覺得唔好味



離開老張即刻跑入附近的 "大來小館"
呢間鋪頭的魯肉飯係網上勁推的
一場來到就即管試試

入到去我倆好似不太受歡迎 (當時好似 AROUND 九點半, 人地已經準備打烊, 但好彩仲趕得切 LAST ORDER)
坐低好快咁叫了一碗小的魯肉飯可能期望太大, 我同蝸牛先生都好失望
呢碗飯完全唔岩我倆的口味
其實我仲覺得有點臭!!!!


另外又要了一碟沙茶醬炒牛肉竟然比出名的魯肉飯還要好食
好驚喜!!



我相信呢度的小菜應該幾好味, 不吃魯肉飯的朋友都可以0黎呢度一試.

連續橫掃了兩間鋪頭後, 我倆再向師大夜市 進發 (而加睇返都覺得有點CRAZY)
其實狂的是蝸牛先生, 因為我腸胃超敏感, 所以不吃街邊小吃的

蝸牛先生先買了一塊泰式燒雞
本來我都想試少少...
但轉眼間已經俾佢消滅0左...好快!
不過佢話味道一般

再之後佢又買了一塊手抓餅
同樣地...好快就食哂

食飽後就返酒店
今日真係超級攰!!!

旅程來到了第三天
開始有點不捨得
好想每日都可以無憂無慮咁周圍去周圍食
但可惜我不是千金小姐, 也不是少奶奶
旅程完了, 還是要返香港捱騾仔...

2012.07 台北遊 - Day 4 美濃屋拉麵 (中山站) > 台北當代藝術館 > 台北市立美術館 > 台北車站 > 一品山西刀削麵之家 (永康街) Part 1

Day 4 (2012.07.28) : 美濃屋拉麵 (中山站) > 台北當代藝術館 > 台北市立美術館 > 台北車站 > 一品山西刀削麵之家 (永康街)一早起身跟蝸牛先生去吃地道的台灣日式拉麵, 呢間拉麵店係睇 NOW 一個旅遊節目介紹的.

美濃屋拉麵
地址: 台北市長安東路一段22-18號, 營業時間：11：30～17：00、17：30～22：00（完食為止), 公休日：一
捷運中山站, 步行五至十分鐘 or 台北轉運站坐的士, 車費 NT 80
拉麵的款式不多, 無記錯的話, 呢度只賣叉燒 OR 粟米拉麵 ; 而湯底就只有醬油味和味噌. 另外, 再有一些日式小吃.
拜訪當日, 全店只有一個"萬能" 店員, 她負責點菜, 上菜, 入廚, 收錢, 收枱....不過, 佢無因為忙而招呼不周, 反而態度幾親切. 客人點菜時會先問客人的喜好, 如湯底要淡味 or 濃味, 埋單時又會問, 岩唔岩口味........佢的工作態度真係好值得學習.

講返碗麵, 其實我覺得同日本東京食開的味道好唔同, 東京的湯底比較濃味, 但呢度的比較淡. 老實說我是有點失望的, 因為跟我想像中實在差很多. 不過呢度賣的是博多喜多方風味, 可能真的同東京風不同.

雖然客人不算很多很多, 但食0左半個鐘, 一直都有客人入來, 當中還有日本人.....所以, 可能只是不合我口味而已.



呢日的天氣超熱, 完全唔想行出室外, 所以最後我地決定去附近的藝術館感受一下當地的藝術氣息.

台北當代藝術館
場館做緊電影主題, 入面撘有好多拍戲用的布景, 另外又放有一些歷史介紹, 劇本展品等等俾人參觀, 都幾得意.

行完之後, 又到食 tea 時間.....
我們揀了在藝術館旁的西餐廳

蝸牛先生點了一客類似卡邦尼意粉的東西
估唔到又幾好味

而我, 就揀了綠茶雪糕鬆餅
我 expect 佢會係....綠茶雪糕 + 鬆餅
但原來佢係 vanilla 雪糕 + 綠茶味的鬆餅, 今日又一次失望!!!

綠茶味的鬆餅有點怪怪的, 我唔 like
而且質地太淋

食完之後出發去圓山站的台北市立美術館
哈哈, 無錯又係去美術館...

由圓山站行去美術館, 沿途無遮無擋, 都幾哂
不過, 呢度的展品實在太藝術
我實在唔識欣賞, 覺得有點悶
不過蝸牛先生就幾有興趣

離開美術館, 之後向台北車站的新光三越進發
估唔到....我會0係呢度嚴重出血

出發前搵0左一D 去台灣必買的護膚品資料
其中有一個日本牌子 ALBION 的化妝水好似幾好 (功效似SKII 的神仙水)
於是諗住去 COUNTER 望下
點知就失守...

最後買了一支健康化妝水N (化妝水), 一支活潤滲透乳 (乳液), 同一支活潤新肌調理液 (去角質用), 埋單NT 7xxx !!!! 折回港幣差不多 $19xx, 好 crazy!!!
另外, 買滿 NT1,500 會送一塊MASK, 做會員又送兩塊, 所以最後我有八塊!!!! 從未試過會送咁多塊MASK!



其實我覺得最 crazy 是....
我之前無聽過呢個牌子
只係臨出發前睇過一d 資料
亦無朋友曾經試用過
但我最後竟然用0左咁多錢去買....

不過, 仲未試用, 未知效果點
希望佢好用啦!!

(Day 4...待續)

2012.07 台北遊 - Day 3 上引水產 > 東區 > 龍山寺 > 台北微風廣場 > 老張牛肉麵 > 大來小館 > 師大夜市 (PART 1)

Day 3 (2012.07.27) : 上引水產 > 東區 > 龍山寺 > 台北微風廣場 > 老張牛肉麵 > 大來小館 > 師大夜市之前睇雜誌介紹呢個台灣的築地
見幾有特色於是又同蝸牛先生去試



我地由酒店 (即台北轉運站) 直接坐的士過去, 車費是 NT150
(已包括司機唔識路, 狂兜幾個圈)
想慳少少的話, 雜誌教可以先坐捷運到中山站, 再轉的士

網上D 人話呢度超FULL
食一餐要排成個幾兩個鐘
於是我同蝸牛先生就早D 去, 希望唔駛排咁耐

開十點半, 我地差不十一點去到
我同蝸牛先生先行一圈
立食區好似 FULL FULL 地, 不過露天的 BBQ 區就無人 (當日天氣 3X 度!!)
蝸牛先生提議先去立食區
一去到就有位.....太開心!!
由於都想去 BBQ 區
所以我地0係呢度只ORDER 了一個SET
不過我覺得分量都幾多, 兩個人食真係差不多 (特別係一大早)

前菜: 入面有少少魚生, 我覺得都幾好味

魚生併盤: 無想像中咁新鮮, 我覺得似係從雪櫃拎出來解凍的魚生, 完全無0係築地食到0個種咁新鮮, 不過海膽就幾好, 無腥味

海鮮味噌湯: 好好飲, 不過嫌唔夠熱, 入面有好多料架!!

壽司併盤: 好味, 但其實又唔算太特別, 呢D 貨式其實香港都食到

燒魚: 都好味, 但又不是太特別

食完呢個餐其實都幾飽
未有空間即刻去BBQ 區
於是四周圍行下, 但呢度其實唔係好大, 好快行完
佢分濕貨區, 乾貨區, 立食區 (立食區都分幾PART, 每 PART 食0既0野都唔同)
乾貨區有少少似去0左 CC SUPER or SOGO
而濕貨區就有少少似街市, 不過乾淨無味

另外, 佢有一個區係賣小吃同飯盒的
價錢都幾抵
客人又可以0係呢度買海鮮叫佢地代煮

行完其實都仍然 FULL FULL 地
但一場來到, 又好想試埋BBQ (而其實當初我係被佢的BBQ 吸引而來的)
最後, 都係決定入去試試

坐低 ORDER 完飲品後
服務生就會帶我地出去揀食物
食物主要是海鮮和肉類



揀完之後, 服務生會放呢個爐上枱
據聞上面係燒熱了的石春, 食物燒好後就會放上去 KEEP WARM
(不過, 有烏蠅多次飛上石春上.....所以我好懷疑佢係咪根本唔熱的)

冬菇釀蝦肉: 冬菇下面是啖啖的蝦肉, 我覺得都幾好味

澳洲和牛: 我覺得唔似和牛, 不過一分錢一分貨, 呢塊扒個價錢唔係好貴, 無和牛感覺係應該的

蟹腳, 扇貝: 我覺得蟹腳好好味, 好甜, 扇貝都好嫩....

呢度無想像中咁好味
不過未來過又一試無妨
食物唔差的, 只是沒有太突出的地方
而露天 BBQ 區其實真係幾熱
雖然佢間中會噴冷氣
但唔多FEEL 到

兩邊夾埋吃了差不多一千蚊港幣
而加睇返又覺得唔算貴
因為都幾多野食

食完之後跟蝸牛先生在附近街市行了一圈
不過天氣實在太熱
行0左一陣就無行
急急腳坐返的士出東區行街

去到東區已差不多兩點
不過, 好多鋪頭都未開 (我諗只得兩, 三成鋪頭係開左的)
有少少失望添
再加上真係好熱
熱到無乜心機行
所以最後無收獲

中途又去了CAFE SHOP 休息



休息一陣就向 SOGO 進發
去 AFTERNOON TEA 睇家品
不過真係無收獲

(Day 3 待續...)

2012.07 台北遊 - Day 2 十分 > 遠企購物中心 > 太和殿 > 市政府新光三越 > 電台大樓 (PART 2)

Day 2 (2012.07.26) : 十分 > 遠企購物中心 > 太和殿 > 市政府新光三超越 > 電台大樓
好鍾意台灣的麻辣鍋, 因為它們不是一味的死辣
另一原因是煲內的鴨血, 鴨血吸了湯的味道, 超好味!!! 而且台灣人還很大方, 鴨血和豆腐是無限添加的!!
我們點了麻辣鴛鴦, 麻辣那邊湯底有我最愛的鴨血

而加睇返相都好想食.......好掛住 d 鴨血同個湯底



由於不太餓, 再加上有無限量鴨血供應, 所以我們只叫了四個餸, 包括: 台灣黃牛片, 手工製肉丸, 象拔蚌, 金菇

見差不多每枱都點烏梅汁, 所以我地又跟.
味道有點似香港的酸梅汁, 都幾OK

最後埋單 NT1,600, 我覺得價錢合理 (本來要NT 17xx 的, 但不知為什麼埋單時, 佢忽然說收平d 我地)
蝸牛先生覺得呢度比鼎王好味 (因為鼎王賣的是酸菜鍋, 他不 LIKE 酸菜)
反而我就覺得兩邊差不多, 兩邊我都鍾意
不過太和殿的湯底略為咸了一點點, 但屬可接受程度
另外, 它的有網上訂位服務, 我覺得都幾方便, 可以慳返打長途電話訂位的錢

雖然只點了四個餸, 但我跟蝸牛先生都食得超飽超滿足

離開太和殿, 我們向著市政府方向行
忽然想起傳聞市政府的新光三越 (A4 館, B2) 都有 <江記華隆> 豬肉紙
於是又走過去睇
好開心呢個唔係傳聞, 最後買了幾包回去
超好味!!

蝸牛先生有朋友在台灣出 SHOW
於是今晚專登去捧場
原本說十點半開始, 但最後發現要成十二點先開始
所以我坐了一陣就先回酒店

今日的行程好充實, 好開心

2012.07 台北遊 - Day 2 十分 > 遠企購物中心 > 太和殿 > 市政府新光三越 > 電台大樓 (PART 1)

Day 2 (2012.07.26) : 十分 > 遠企購物中心 > 太和殿 > 市政府新光三超越 > 電台大樓
一早起身見太陽伯伯好似行開0左, 而天又不算太暗, 於是決定今日郊遊去.
我們先到車站買車飛出發去瑞芳, 打算坐十二點鐘的班次, 怕攰的我當然想買"對號座" 啦, 但可惜下一班車沒有相連的座位, 要等到一點幾那班才有, 但一點又太遲了, 唉, 無計!! 反正無位坐, 而拍優悠咭的車費比買單程車飛的價錢平 (NT 4x vs. NT 7x), 所以我們無買飛就離開了車站, 先去食早餐.
無目的地在地下街行, 最後來到了台北車站K區地下街, 誠品站前店一帶有幾間食店, 我們最後揀了一間日式的餐廳.

蝸牛先生的吉列咖哩餐. 味道不過不失, 不難吃但也沒有太大的驚喜.

這是我的豚肉飯. 有少少燒燶了的氣味, 但我又覺得幾有風味, 我LIKE.

之後我們就出發去瑞芳!! 上到車我們有位就坐, 但其間有兩次俾買了對號座的人趕起身, 所以最後還是企到落車. 下車後先在月台買出發去十分的車飛, 我們買了瑞芳至菁桐一日任坐的票 (NT 52), 見還有時間剩就在車站的客務中心走走. 由於剛才下車還未拍優悠咭, 於是即刻返去月台拍咭 (就如撘輕鐵一樣, 下車時要在月台拍咭出閘).

由瑞芳到十分的車程不用三十分鐘, 好快. 下車時正下著雨, 感覺有點掃興, 但一場來到, 唯有照行. 我們沿途一直走, 好快就到了放天燈的地方, 不過我們不想下著雨放, 於是決定先去十分瀑布, 回程再作決定.

雖然路上間中會有往瀑布的指示牌, 但指示不太清晰, 而沿途的路亦太荒蕪, 所以當時一邊行一邊擔心行錯路, 唯有見人就問, 最後行了差不多三十分鐘, 終於到達. 要睇瀑布除了要行路之外, 仲要俾入場費 (NT 80), 雖然覺得不太值, 但一場來到, 這少少錢還是會花的.

第一眼覺得, 眼前的瀑布幾震撼. 不過, 望真D, 其實又不太特別..(總覺得它有點人工化, 不太天然). 而呢個所謂的 "十分山水瀑布遊樂園", 入面除了瀑布外, 還有餵小動的地方以及小食店, 在這裡可花的時間不多, 所以 NT80 值不值, 真是見仁見智.

離開瀑布時, 雨開始停, YEAH!!! 一如所願, 終於可以在停雨下放天燈. 最後我們揀了比較多人的 "阿媽的天燈" (很好服務的一家店, 感覺很開心), 雖然不知所寫的願望會不會實現, 但過程都幾開心.

距離下班車開出的時間還有半個鐘, 於是我們去了一間 cafe 店休息.

如果每日都可以咁休閒咁同蝸牛先生嘆住咖啡食件餅咁, 你話幾好呢....

之後夠鐘就坐車回台北了. 臨時決定今晚吃麻辣鍋, 於是即刻打電話 BOOK 位, 想去 <鼎王> 不過已FULL, 最後決定揀名氣同樣大的 <太和殿>.

出返市區才六點多, 見未夠鐘食飯, 於是趁空擋去了遠企購物中心, 為的係去睇 issey miyake baobao, 可惜原來在台灣買的價錢比日本代購還要貴.....唉, 都係疊埋心水下次自己去日本買 . 睇完就坐的士出發去 "太和殿".

(DAY 2 待續.....)

2012.07 台北遊 - Day 1 機場 > 酒店 > 台北微風廣場 (一兆堂)

Day 1 (2012.07.25) : 機場 > 酒店 > 台北微風廣場 (一兆堂)

出發前兩天打大風又狂風大暴雨, 都有少少擔心出門當天會狼狽, 但好彩出發時只是毛毛細雨. 跟蝸牛先生晨早七點半出門口, 八點多去到機場, 第一次見到機場係咁多人, 排了半小時都未到, 差不多九點地勤在旁邊問有無人去台北, 因為,要趕入閘的關係, 所以我倆可以打尖去寄行李. 寄完行李只得十五分鐘趕去閘口, 好彩閘口不遠, 步行過去就可以.

原定起飛時間是十點, 但因為之前有太多航班 delay 的關係, 所以我地班機都被迫延遲. 最初顯示十一點可以登機, 但一等再等最後十二點幾先上到機. 原本以為好黑仔, 點知…在臨上機前交 boarding pass 的一刻, 空姐說我們可以 upgrade 去 business class, yeah, 心情即刻好返好多. 不過, 上到機都依然要等, 但好彩我們坐的是 business class, 不斷有飲品同雜誌供應, 空姐仲不斷說不好意思讓我們久等, 而且座位闊, 坐都坐得舒服d, 所以心情無乜點受影響.
差不多一點, 終於等到起飛, 但起飛無耐就遇到強勁氣流, 成架機突然下墜, 當時好多人尖叫, 我都以為自己會死, 真係好驚, 好彩只係虛驚一場. 驚完後就派飛機餐, 好興奮, 因為原本坐 econ 只得一個麵包, 但 B. Class 就唔同, 會有生果, 主菜. 我們揀了點心併盤, 不過今次的就不算太好食.

落到機就忙唱錢同買電話咭, 最初打算買"台灣大哥大" 的電話咭, 但實在太多人, 所以最後放棄轉買隔離的 "遠傳". 我用了 NT300 買了一張可以三日無限上網 + around 十幾分鐘通話時間的電話咭, 而蝸牛先生則用 NT 600 買了一張五天上網 + 唔記得幾多分鐘通話時間的電話咭. 買完電話咭就去買車飛出市區.
我們買的是國光客運 (NT 125), 人龍超長, 最後差不多五點多才出到市區, 好攰!

check in 後, 蝸牛先生就趕去南港展覽廳睇佢的 Radiohead concert. 而我就一個人在附近行了一圈, 買了我愛的繼光雞, 好味!!


之後就匯合同樣是今日來台的家姐一起吃飯, 因為大家都無乜 idea, 加上岩岩到步有點攰, 所以最後決定在酒店附近的微風廣場食火鍋.
一兆堂 @ 台北微風廣場

四人海鮮餐 (@ TWD 500/人), 可揀一人一鍋 OR 幾人一鍋.我地揀了一人一鍋, 分別試了四款湯底 (蕃茄, 味噌, 昆布, 咖哩), 個人覺得蕃茄最好味, 至於食物質素就不過不失, 不算太特別.







呢個餐好豐富, 食物放滿整張枱, 最後還有 movenpick 雪糕同紅豆沙, 超飽!!!

食完飯逛了一陣就各自回酒店, 而我就去了誠品, 買了一本最近網上好多人談論的 <深夜食堂>, 但睇完我又覺得本漫畫麻麻.

之後就等蝸牛先生返來…結束了第一天的旅程.