2023.03.18 北海道結婚周年之旅 {Day1} 重拾旅行嘅感覺 (下)

今晚食飯嘅地點喺大通站, 由於距離食飯時間仲有少少時間

所以我哋決定行落去

沿路一直行都無乜見到人, 而且仲好凍添

跟住見到 Parco 就入咗去行

不過今日未有心情購物, 所以無收獲

之後又行落地下街, 太耐無行, 心情繼續興奮, 不過今晚收獲就只有一支山椒粉

行到差唔多就去食飯

郷土料理 おが (Tabelog 3.72分)

嚟呢度最主要係想食蟹, 因為覺得一場去到北海道無理由唔食蟹

Menu 本身都幾多嘢揀, 再加埋是日推介, 真係眼都花

我哋研究咗好一陣子先可以開始叫餐

(小插曲:  見到海馬刺身我呆了, 心想海馬點做刺身啊, 忍唔住google 一下, 原來日文海馬=海獅

但其實都係有點恐怖同接受不了)

看圖識字, 一於揀第一同第二人氣 - 喜之次 (三食) 同活蟹

先有前菜兩碟, 已經忘記了係乜了

但印象中味道係唔錯的

先嚟喜之次魚片 - Shabu Shabu

用一個好清嘅湯底去灼熟啲魚片, 再加埋佢的柚子汁, 好有鮮味

之後店員會收走個湯 

再額外加入蔬菜, 粉絲同豆腐去煮, 好味到我哋連湯都飲埋

到最後就係主食

可以揀雜炊/烏冬/拉麵

因為我哋另外叫咗蟹雜炊, 所以我哋揀咗拉麵

湯底有魚同蔬菜嘅精華, 煮出嚟勁鮮甜

我哋又係連湯成碗清哂

活蟹

我哋揀咗一隻唔算好大size 嘅蟹

同香港一樣, 劏蟹前佢會先比隻活蟹我哋睇吓

覺得 ok 先會去煮

今次隻蟹就只得一食

唔花巧嘅煮法, 食佢最原始嘅味, 唔錯唔錯

釀蟹蓋

味道都好食嘅, 只係我覺得芝士太多, 有點 cover 咗蟹的味

蟹肉雜炊

本身好鍾意食雜炊, 日本湯底加上蛋花, 好岩送飯

呢個味道都幾好, 但份量都唔少, 好飽肚

怕唔夠飽, 於是又叫咗碟醋鯖魚壽司, 最後食到好飽

可能今晚太多澱粉質, 所以呢餐比相像中飽肚

食完就坐地鐵返酒店

執行李準備之後嘅三天郊區遊

** 第一天完 **

2023.03.18 北海道結婚周年之旅 {Day1} 重拾旅行嘅感覺 (上)

疫情關係, 已經三年無去過旅行, 出發前幾個月真係勁期待

由於太耐無買過機票同訂過酒店, 今次買得無咁精明

話說酒店我全部喺 Rakuten travel 度 book, 點知到步時先知道用咗一張當地人先用得嘅 coupon

攪到全程嘅酒店成本都貴咗

受過今次教訓之後, 下一次嘅旅程會學精啲

*****

終於到咗出發日子, 我哋早大約兩個鐘去到機場

check in 條隊比起疫情前係排耐咗

但都可以接受

之後入閘後就快手去平民 lounge 食返個早餐

嘩, 勁多人, 排完都已經無乜時間食

食得有少少趕, 同埋原來而加已經無得拎支裝水

食完就即刻去閘口, 好彩今次係5號閘, 唔駛行好遠

四個幾鐘之後終於到札幌, 到埗時間仲要比原定早咗大半個鐘, 好興奮!!

入境前要先 show 健康證明, 有少少混亂, 但都唔算攪得耐

過完關行李已經等緊我哋

之後就搵 JR , 幾經波折終於上到車

落車後要先去換 JR pass, 又係幾番波折先換到

之後出發去酒店啦

今次揀咗 Solaria Nishitetsu Hotel Sapporo

酒店離車站唔算遠, 行地下街的話 (向北海道廳舊本廳舍方向), 喺出口再上一層過對面就係酒店

如果有大型行李, 可以行入 Asty 45 商場, 經電梯再上地面 

間房都算大, 而且新淨

                                             另外最欣賞呢度有大浴場, 房內電視會睇到人流情況
                                                          我哋朝朝八點幾就會去浸下, 都幾爽

• 
  
  

                                                 喺房休息一陣就出去食飯, 今晚 book 咗食蟹

2019.09 東京藍帶畢業旅行 {Day 8} Sa~yo~na~ra! 遊學團完結了

  2019.09.28 東京藍帶畢業旅行 {Day 8} Sa~yo~na~ra!  遊學團完結了

話咁快三個月嘅遊學就要結束
真係好唔捨得!
喺東京嘅最後一餐 lunch, 我帶咗蝸牛先生去惠比壽花園食燒肉兼睇風景

惠比壽 Dining & Sky Top of YEBISU
呢幾個月我喺呢度都試咗幾間唔同嘅餐廳
不過我翻去再翻去都係叙々苑

呢度有兩層係餐廳
公共區有兩個位置可以睇風景, 幾靚的

叙々苑 (Tabelog: 3.37分)

呢三個月我已經嚟呢度食咗兩次
我鍾意佢價錢唔算好貴, 而且味道唔錯同埋有得睇風景

好岩打卡 (haha)

呢日我哋早咗上去, 人哋未夠鐘開鋪
於是我哋就趁呢段時間去欣賞吓風景同玩吓自拍
38樓嘅東京景色唔算太壯觀, 但都可以接受啦
免費嘅展望位置, 仲有個位俾你玩自拍. 的確唔錯
玩到差不多時候就去餐廳

雖則呢度我已經食過兩次, 但兩次都叫咗唔同 grade 嘅肉

旅程的最後一餐, 決定豪一豪佢, 揀咗JPY5,800 嘅SET

喺日本食嘢真係一分錢一分貨

今餐好明顯比上兩次好食好多

食完之後就喺呢度行咗陣
行吓麵包店, 超市, 買咗啲嘢返香港慢慢食
最後臨走仲買咗把麵包刀返去

返屋企途中, 蝸牛先生又買咗件CAKE

Rue Favart (Tabelog: 3.62分)

呢間成日都經過

店子細細入面有CAKE 有西餐供應

其實成日想試吓, 但又唔知點解最後無入過去食

件CAKE印象中味道都唔錯的

食完就喺屋企抖陣, 之後就起程返香港啦
呢度退房無乜特別
只係將條鎖匙放返喺信箱就走得

再見了, 呢間我住咗三個月嘅屋

因為已經寄咗部份嘢返香港
所以走嘅時候都唔算太狼狽, 只得三個行李箱

跟住我哋就坐的士去涩谷站再轉NEX 去機場

去到機場搵個位坐低食頭先喺超市買嘅壽司

就係咁, 三個月嘅學藝旅程就完咗

到港了~

好開心可以擁有一次咁自在的遊學經歷

兩年後睇返都覺得好滿足

好彩當時有鼓起勇氣踏出第一步

(其實而加仲成日心思思想去玩多次, haha)

 

2019.09 東京藍帶畢業旅行 {Day 7} 最後倒數

 2019.09.27 東京藍帶畢業旅行 {Day 7} 最後倒數

三個月嘅學藝生活聽日就要結束

明明呢幾個月覺得自己好克制

但到頭來發現兩大一小嘅喼都放唔哂啲嘢 (仲未計有啲嘢我忍痛無帶走)

所以今日要先去郵局一趟, 將一啲唔等洗嘅嘢寄返香港

最後寄在兩箱約 20kg 重 

為咗慳錢, 我揀咗寄船, 一個月後到港

共花費 8,400 yen

寄完行李, 返屋企整理多少少就出去食 lunch

今日無 plan 食乜

上網搵咗間喺代官山嘅炸豬扒店, 都幾高分, 於是決定去試吓

ぽん太 (Tabelog: 3.75分)

 見今日無乜行程, 於是決定由屋企 (惠比壽) 行過去

腳程大約30 mins

行到去門口先發現原來咁樣行都可以通去我學校

估唔到去到旅程嘅最後兩日先發現 (哈哈)

(然而我都係第二個月先識得點樣由屋企行返學校)

講返間豬扒店

店仔細細, 呢日唔算多客人

入面只有兩個店員, 其中一個老婆婆望落似8, 90 歲

佢手震震拎茶俾我哋時真係好想幫吓佢

 order 完我哋等咗九個字至一個鐘先有得食, 好耐

諗住都算高分, 質素應該有返咁上下

點知食落普普通通, 失望, 覺得哂咗 quota

食完我哋向返惠比壽方向行, 沿途有啲賣衫嘅小鋪好似唔錯

(哭, 點解我喺尾二嘅一日先發現)

之後我哋再去咗間甜品鋪買咗啲甜點

パティスリー イル・プルー・シュル・ラ・セーヌ (Tabelog: 3.81分)

無同啲蛋糕整大合照, 甜點嘅味道都唔錯

諗住今日去吓新地方, 諗起之前有人介紹過清澄白河呢個地方

見車程唔算太遠, 於是同蝸牛先生決定去行吓

我哋呢啲老人家都幾鍾意睇吓花賞吓草

見到呢度有個清澄庭園好似幾靚

於是過來睇吓

呢度都幾大幾靜, 有山有水, 不過花種就唔算多

如果想一個人靜靜地諗吓嘢呢度都幾舒服嘅

坐低食吓頭先買嘅小蛋糕

留學三個月, 我學識咗食呢件嘢 (canelé) 

當時係同學介紹, 跟住就一食愛上

我鍾意佢外面脆入面煙煙韌韌嘅感覺

喺日本幾乎我一見到就買

暫時覺得最好食係 Joel Robuchon

喺公園 hea 完就行返出去, 點知發現無乜嘢行

先唔講呢度人影都唔多隻, 就連鋪頭都唔多

但就好多呢D 布公仔 (明明當時只係九月尾, 又未到萬聖節)

諗住入去呢間地標嘆返杯咖啡, 點知推撞岩裝修唔開, 可惜~

見無乜嘢行, 所以都決定離開走人

之後我哋去咗日本橋站行高島屋

行吓行吓又覺攰, 搵咗間餐廳坐低休息

夜晚約咗朋友一齊食蟹

(店名後補)

喺日本食蟹, 我依然係覺得蟹道樂係最抵同最好味的

呢餐我覺得麻麻哋

蝸牛先生同朋友都覺得唔飽, 於是決定落池袋食無敵家

我食唔落所以就決定自己返屋企先

我一早都預計到無敵家唔會係蝸牛先生杯茶

最後如我所料, 佢返來都話麻麻哋 (但佢哋嗰晚都排咗成半個鐘以上)

今晚係東京嘅最後一晚, 真係有啲唔捨得

2019.09 東京藍帶畢業旅行 {Day 6} 終於食到人氣PANCAKE

2019.09.26 東京藍帶畢業旅行 {Day 6} 終於食到人氣PANCAKE

喺東京三個月都無食到一餐令人感動嘅壽司

事實上咁耐只係去過兩次壽司店

原因係我腸胃太敏感, 平時要返學嘅日子我唔敢去食

課程終於都完咗, 又趁蝸牛先生過嚟

所以點都要食一餐壽司

book 咗十二點, 我哋早咗幾個字到, 點知未開門

喺門口企到夠鐘先入到去

すし佐竹 (Tabelog: 3.99分)

喺東京要食一間高質壽司店都唔平

我哋呢SET 要12,000 yen/人

魚生都新鮮嘅, 不過唔算特別有驚喜

印象最深反而係收尾嘅魚生飯同魚飯

呢兩碗都好好食

食完壽司就去有樂町行街

呢度係近年我比較鍾意 shopping 嘅地方

商場賣嘅嘢夠齊但又無新宿咁多人

沿途見到間吐司店

而加東京好興呢類吐司店

我都好想喺香港開返間

蝸牛先生買哂想要買嘅嘢後

我提意不如去淺草間紅鶴食 waffle

因為我上次食過覺得好好食

雖然個心想食 pancake, 但咁晏先去應該無機會 

點知, 去到竟然仲有 pancake!!!  超開心!!! 我感覺自己發緊夢

因為呢度啲 pancake 係每日限量供應, 上網見啲人好早來排隊

(我上次嚟到就賣哂, 所以要食waffle)

紅鶴 (Tabelog: 3.55分)

先拎整理劵, 比訂金 (應該只係 for 外國人)

仲寫明如果遲到會無得食兼唔會退返訂金

我哋其實都要等一個鐘後先有得食

不過呢度近廚具街, 對我嚟講要消磨一個鐘好易

好緊張, 就快有得食

傳說中嘅 pancake

我覺得我哋揀錯咗, 呢款醬汁太多, 好似cover 咗 pancake 嘅蛋味

不過其實都好味嘅

如果有機會要再嚟試吓其它味

我叫咗杯茶消消滯

蝸牛先生就叫咗鮮果汁, 杯果汁超足料, 飲完會好飽 (因為我上次試過)

我哋係最後一場客, 離開時已經無哂人

行返出車站, 影咗呢張相, 我覺得幾靚

之後我哋去咗銀座行 Lumine, 行到差不多就出發去食 dinner

la Brianza (Tabelog: 4.13分)

每次去日本都會食西餐

今次專登揀一間唔太高格調但又高分嘅餐廳

希望可以輕鬆咁食 (因為唔想又專登帶衫去換)

餐廳喺六本木, 佢嘅地點有 D 難搵

餐巾摺得好靚, 上面仲有粒小吃, 好攪笑

我哋揀咗 6,600 yen 嘅 set

4 個 courses :前菜, 意粉, main course, 甜品喺 menu 入面仕揀

蝸牛先生飲紅酒, 我就飲EARL GREY

(飲品另計)

呢兩粒波波好食, 不過我唔記得係乜

生蠔係蝸牛先生嘅, 佢話好食

signature dish, 真係超好食, 上面全部都係松露, 好香

呢個 Carbonara 個汁同平時嘅有啲唔同, 唔係白汁 feel, 芝士味較濃

呢個海鮮意粉超好食, 可惜幾啖就食完

麵包脆脆哋都幾好食

魚, 雖然係炸但又唔覺得油, 幾好味

蝸牛先生嘅牛, 佢揀咗要加錢嘅和牛

不過我覺得普通

奶凍好食

同奶凍比較, 呢個 Tiramisu 比較遜色

呢餐我同蝸牛先生都好滿意

一來唔算貴, 二來味道都幾好

食飽就坐車返屋企

沿途見到東京鐵塔, 好療愈嘅景色