2014.03.02 {銅鑼灣} 竹壽司

我平時好少做運動

趁住放假, 相約蝸牛先生去屋企附近的 [香花徑] 散下步 

上山好多樓梯, 都幾攰

我行到上氣唔接下氣, 但蝸牛先生就面不改容

我的體能實在太差

 

天后廟道

唔知點解, 呢一度好多落葉 

 

慢慢行, 好快就落到銅鑼灣

出發前, 蝸牛先生已經決定去食壽司

 

竹壽司

銅鑼灣 開平道一號Cubus 12樓

之前次次都有 BOOK 位, 今次大安旨意 WALK IN

點知撞正今日超 FULL

去到已經兩點, 但最後都要等10 mins 先有位

 

茶碗蒸

我好鍾意食茶碗蒸

 呢度的好好食

味道好清, 食完唔會覺得好漏

 

前菜: 沙律

佢的沙律汁好味

 

前菜: 青瓜三文魚

 呢個就無乜特別

 

壽司併盤

之前坐吧檯, 壽司係續件上的

由淡味到濃味, 食完一件先到另一件

今次坐 order 檯, 壽司一碟全上

感覺無咁正宗, 同埋始終覺得師傅即製會新鮮 d

下次都係要求坐吧檯

 

海膽壽司, 拖羅小卷

 海膽超大塊, 好鮮甜, 無腥味, 十個正!!

拖羅味道就比較淡

 

大蜆麵豉湯

 湯都好飲

 

綠茶紅豆雪糕

奶味比較重

 

呢個 set 真全超飽, 物有所值

 

*****

 

食完飯, 去了工聯會交報名表

佢的麵包班真係超抵

$1,460 十堂 (會員: $1,314)

之前成日都懶懶閒好遲先報

所以無一次報到

今次預早交表, 希望成功啦~

 

 2013.12 竹壽司 重溫

周末出爐 {牛奶麵包}

用麵包機做麵包, 方便又快捷

不過做厭了方包

尋晚就用麵包機打麵團, 之後再整形

第一次用低溫發酵法

原來都幾方便

前一晚預先整好麵團, 排得靚靚

到第二朝雪櫃拎出來就見佢發得漲漲

之後放室溫約三十分鐘就拎去焗

今早在雪櫃拎出來時飽滿的樣, 好靚仔

美中不足係每個包包的體積好唔平均

下次都係要用磅

出爐!! 

金黃色, 白雪雪

外表有九十分

不過, 做唔到好鬆軟, 起絲的效果,

或者真係要試下整天然酵母

今次係跟 blogger Allie 整的

因為我無用天然酵母

所以奶的份量我改動0左小小

佢用 100ml 奶 + 50ml 水

我就用了 170ml 奶

不過我覺得味道唔夠香

搵次邪惡一點落多少少牛油再試過先~



敗 [appleTV] & [Dyson 吸塵機]

上星期一口氣添置了兩件家居用品

 

AppleTV

本身一直都係用 IPAD 來追劇的

但最近中了星星毒

覺得 IPAD 的螢幕實在太細

而且 IPAD 一定要放0係枱面睇, 唔係咁舒服

 

反正之前已經好想將 ipad 駁電視

見 AppleTV 的價錢唔算太貴

所以上星期放工即買

 

而加可以0係電視追劇啦 (仲可以坐 SOFA 睇添)

感覺好爽~

 

Dyson 吸塵機

Dyson 的吸塵機又係一直想買的

鍾意佢吸力好, 外表夠型

不過用開的未壞, 而且佢的價錢唔平

所以一直都係得個諗字

 

最近, 見到在匯豐的購物網有得買

價錢仲平出面差不多一千

好令人心動

之後去 shop 試玩 (我去了三間不同的 shop, 試了三次)

又考慮0左成個星期

最後都係忍唔住買了

 

呢款係入門牌 [Dyson DC35]

係最平的一款

雖然高 Grade 的 Function 仲正

(吸力更大, 備用時間更長, 而且多幾款吸咀)

不過, 價錢實在太貴

都係買住呢款入門級試用下先

其實 Dyson 的風扇都好正 (好慳位, 好型)

不過好彩暫時未有呢個需要....hehee..



2014.02 周末記

2014.02.22 Sat

起身就出上環換領特區護照

之後就等蝸牛先生過來吃 LUNCH

趁呢個空檔去了永安

先在化妝部敗了一盒烟脂

之後去了家居及廚部

嘻嘻...估唔到又有收穫

 

呢個杯之前在 DayDay Cook 見到已經好鍾意

不過 online 買要0係公司收貨, 又唔太想

好開心尋日比我0係永安見到

諗都無諗即刻買0左

以後沖茶就唔駛用茶袋啦, 方便好多

 

之後我地去0左九記食牛腩

人龍好長, 但好彩只係等了 around 15 分鐘

伊麵煮得太淋, 我唔太 like

湯底我都覺得麻麻

不過蝸牛先生就好鍾意

我始終都係鍾意大埔的群記清湯腩

 

之後又去了泰昌

買了蛋撻, 沙翁

沙翁好味, 好鬆軟

 

悠閒在中環四處亂逛

開心又寫意

 

*****

2014.02.23

最近, 迷上外星人

見到太空館有一個 [我們都是外星人] 的節目

於是今日約了蝸牛先生出去睇

 

先在大戶屋醫肚

鍾意呢度, 價錢唔太貴, 但食物質素幾好

跟蝸牛先生一人一個定食

 

吉列豬扒定食



 

汁煮雞扒定食

 

食完飯就大安旨意去太空館買飛

點知.........full house!!!

真係估唔到咁受歡迎

唉, 唯有下次買定飛先再來過

 

無特別節目

就同蝸牛先生拍拖行去星光大道

吹下海風, 散散步

最後返屋企睇埋第十九集 [來自星星的你]

就快大結局...有種莫名的失落感

 

兩日的周末, 輕輕鬆鬆就過了

 

2014.02 雜記 {附黑椒牛仔骨食譜}

呢兩個月未停過病

新年前感冒

年初三晚飯後突然肚痛

跟住前幾日就又嘔又發燒

 

成個星期都食得清淡

每次病, 都掛住阿媽煲的瘦肉米粉

以前覺得唔好味

但而加覺得病0左仲要自己煮好慘...

掛住的, 除0左味道, 仲有0個一份關懷

 

希望病埋今個月就唔好再病

 

*****

上個weekend

蝸牛先生下廚

 

weekend 的主打: 蒸魚

 

豆椒雞

 用了雪藏雞扒

蝸牛先生話覺得無雞味

佢對食材要求愈來愈高了

*****

黑椒牛仔骨

最近愛整呢味牛仔骨

唔難整而且好味

仲可以一早買定放雪櫃, OT 買唔到餸返屋企都有得煮

 

牛仔骨 300g

醃料:

生抽 1 湯

蠔油, 粟粉 各 1 茶

糖 1/2 茶

黑椒適量

 

醃好加洋蔥落鑊炒就 ok

 

*****

上星期返大埔娘家

順便又去了大埔街市

最後買了多款香料同泰國藍象咖哩 

 

其中一包香料係卥水包

卥水包的材料我大概見到有花椒, 八角, 桂皮, 果皮等等

尋晚用了半包來炆豬肉

 

 卥水豬肉

今晚買了腩肉

雖然好唔健康, 不過有少少肥肉真係好味D

其實我係第一次整卥水

除了卥水包, 就只加了生抽, 老抽, 糖同水

都幾易煮

今晚仲發現原來將蛋黃整爛再加汁撈飯都幾正

 

今晚個汁唔捨得倒

因為想試下用來整卥水雞翼

2014.02.14 - 情人節晚餐

情人節晚餐 @ HOME

 

因為要返工的關係

所以準備的晚餐唔可以太複雜

 

前一晚開始預備

焗了餐包

但由於時間關係, 未等佢完全發酵就拎去焗

最後焗出來的包包唔夠鬆軟

 

加了 Blue poppy seed (藍花罂粟)

估唔到效果幾好

 

Blue poppy seed

話說有日想買芥末籽

點知一時手快, 無留意架上的名稱同貨物不符

之後返屋企先發現買錯了

唔識 blue poppy seed 係乜

要上網 check 先知佢可以用來整麵包

好彩加了後包包都幾好味

今次真係錯有錯著

 

蘑菇湯

13 號晚預先煲了魚湯

第二日就用來煮湯

不過, 硬係覺得味道爭 D, 唔知點解呢

 

焗蠔

放工去了 Citysuper 買蠔

無乜研究, 隨意揀了以下兩款:

1) 法國芬廸加生蠔 Fine de Claire

2) 法國Prat Ar Coum特級蠔

 

誤打誤撞, 今次呢兩款都好好味, 好鮮甜

 

簡簡單單只係加了洋蔥, 牛油, 芝士

 

芥末煎焗豬扒

前一晚在凍肉公司買的

 百二, 三蚊兩塊

雖然平過 Citysuper

不過, 我覺得肉質麻麻

 

煎西冷扒

都係凍肉鋪貨

但都差不多要百三, 四蚊塊

其實有點貴, 不過未試過又想試下

結果, 我同蝸牛先生都唔太 like

 

Cake by Zoe cafe

一件荔枝味, 一件是芒果味

都係覺得 Tony Wong 好味 d

 

其實情人節只係比個藉口可以食得好少少

本來想 set 得靚 d, 攪得有氣氛 d

但蝸牛先生太夜放工

等到我又餓又眼瞓

所以煮好就急不及待要開餐了

 

希望以後的情人節我們二人都可以繼續開心幸福!!

 

 

2014.02.08 {灣仔} Tea Buffet @ GRAND HYATT

 

今日即興跟蝸牛先生去吃 tea buffet

沒有心水餐廳

但我就想揀價錢抵味道好, 而又要有位的, 難度分簡直有十分

最後左揀右揀, 終於揀了君悅酒店的 GRAND CAFE

 

 

每位 $308 +1, 其實有點貴

不過聽聞質素唔錯

於是都決定一試

 

可能價錢唔平

所以就算今日係星期六都完全唔 FULL

(我覺得十枱客都無)

 

食物方面, 有頭盤, 熱盤, 甜品同生果

不過熱盤的種類唔多

只有蝦餃, 沙爹牛串燒, 鵝肝包, 乾燒伊麵, 釀雞亦, 熱狗, 迷你漢堡包 (牛肉)

而冷盤有沙律菜, 煙三文魚, 火腿, 迷你漢堡包 (火腿)

反而種類最多係甜品

有多款蛋糕, 雪糕, WAFFLE

而生果好多都係原隻上, 有蘋果, 梨, 桔等等 (不過唔甜的)

 

我覺得呢個似甜品 BUFFET 多過 TEA BUFFET

雖然食物的種類唔多

但整體的味道都幾好

蝸牛先生就幾鍾意

我就嫌熱盤太少

 

蝸牛先生今日最愛係鵝肝包

我就最愛迷你漢堡, 檸檬批同火腿

 

縱使呢度味道水準唔錯

但始終價錢太貴

我同蝸牛先生都覺得應該唔會再來

 

 食完後慢慢由灣仔行落銅鑼灣

沿途又睇下衫同波鞋

最後再經天后, 炮台山行返北角屋企

幾百蚊的 tea buffet, 就係咁消化了......

 

 

 

 

 

 

 

 

 

 

 

2014.02.07 - 咖哩雞

咖哩雞飯

呢個係屬於蝸牛先生的愛心飯盒

 

前幾晚, 蝸牛先生話想食咖哩雞飯

於是, 第二晚就即刻去買雞

 

街市無雞賣, 去了 Citysuper

點知一出銅鑼灣就樂而忘返, 返到屋企已經八點

拿拿臨用鹽粷, 胡椒, 蒜醃雞

只係醃了半個鐘, 好彩都夠味 

 

牛舌

我本身好鍾意食牛舌

不過今晚的有陣怪味

最後只係食了三塊就掉了, 好浪費

 

炒露筍

堅持每餐都要有菜

 

咖哩烏冬

食剩的咖哩第二晚用來煮烏冬, 好正!!

 

每次見到蝸牛先生食得開心我都會好有滿足感

 

*****

年初三, 兩人在家打邊爐

新正頭, 街市好多檔口都無開

所以呢晚的邊爐唔係好豐富咋

 

蝸牛先生整了一個特濃番茄鍋, 好味!!

 

今年我打算出去上下烹飪班

整麵包, 煮飯兩樣我都想學

希望可以從中學下 d 技巧

好想廚藝可以有進步~

 

{2014 馬年} 自家開年 BRUNCH x 赤口燒肉

馬年第一餐入廚

年初二 自家 Brunch

簡簡單單只有蛋, 煙三文魚, 牛角包, 香腸

但已經覺得好滿足, 好好味

 

仲有蝸牛先生愛的芝士

原來可以買呢一類的芝士在家品嚐, 係蝸牛先生兒時的夢想 (太誇張了吧)

至於我就受不了這種芝士的味道, 覺得佢散發住一股垃圾味 

 

年初三 外食 lunch

揀了我倆都喜歡的

 

和宴

尖沙咀廣東道100號彩星集團大廈12樓

前菜一: 雖然粟米唔算好甜, 但配埋個汁一齊食又幾好味

 

前菜二: 唔及韓國餐廳好味 

餐湯: 呢個普通, 無乜特別

 

辣味牛肉烏冬

最愛呢碗烏冬, 每次來都要點

湯底超好味, 飲完唔會好口渴, 而且牛肉夠淋

 

和牛

雖然唔係特級和牛

但牛味重, 脂肪夠, 好味!

 

黑豚

我覺得肥膏多0左少少

不過幾好味

食完呢餐我同蝸牛先生都好滿足!!

 

****
 

以前細個好鍾意新年 (有新衫著又有利事逗)

但人大0左反而好怕新年 (好忙, 好攰) 

 

新一年, 希望可以病少 D
希望可以做到真正的無憂無慮, 開開心心