2019年10月12日星期六

2019.07 東京小旅行精華遊 Day5 一個月後再見

2019.07.15 東京小旅行精華遊 Day5 一個月後再見

今日蝸牛先生就坐飛機返香港了, 好唔捨得佢~
喺東京嘅最後一餐 LUNCH 揀咗我鍾意食嘅烏冬

うどん山長 (Tabelog: 3.58分)
呢間烏冬店喺呢度都幾出名, 一到 LUNCH 時間就會排長龍
不過我哋十二點前就去到, 所以就唔駛排

由於餐牌全日文, 唔多識睇
於是求其揀咗SET (有飯又有烏冬)
烏冬份量都唔細的, 基本上食完呢碗麵已經好飽
而碗飯其實都幾好食, 但真係太飽喇, 只可以食幾啖就停口


蝸牛先生點的係沾麵, 我的係冷麵
烏冬爽口彈牙, 我覺得幾好食
所以之後我一個人都有再嚟食

食飽之後蝸牛先生就陪我睇吓附近有咩食店
等我之後一個人都可以去食吓

差不多時間就同蝸牛先生一齊去機場
見佢入閘就有種失落嘅感覺, 跟住又忍唔住喊
不過喊完就即刻趕車去成田附近個酒酒井OUTLET (haha)

行咗一個鐘鬆啲就走 lu, 因為唔想太夜返去
返到去惠比壽車站突然又好掛住蝸牛先生
因為呢幾日都有佢陪我喺車站一齊行返屋企
今晚突然又變返一個人, 有種孤伶伶嘅感覺
跟住又忍唔住喊...
而加諗返都覺得自己幾攪笑

今晚之後要等一個月先再見到蝸牛先生 (哭)

2019年10月11日星期五

2019.07 東京小旅行精華遊 Day4 失望的鰻魚飯

2019.07.14 失望的鰻魚飯 

之前孤獨的美食家介紹過一間好食的鰻魚飯店
呢日我哋就專登走過去試
去到見唔到有人龍仲諗住唔駛排隊
點知原來係要先登記
登記完就可以離開, 到差不多時間就再返去睇吓到未

未有得食就先喺附近買咗件窩夫頂住先
呢頭無乜鋪頭可以行, 所以呢個幾鐘都幾難捱

我哋中間有返過去睇, 但行咗兩轉先差不多到我哋
最後我哋都等咗個幾鐘先有得食

鋪頭喺赤羽入面一條叫 OK橫丁嘅地方
呢度似乎都幾多嘢食

川榮 (Tabelog 3.76分)
等咗個幾鐘嘅鰻魚飯又唔算驚為天人
不過今日學識咗鰻魚飯加山椒粉原來係好好食的
(呢次之後, 我每次食鰻魚飯都要加山椒粉)

見到劇中主角另加雞脾, 我哋又叫隻試吓
但原來只係滷水雞脾, 無乜特別

食完有少少失望
無諗過等咁耐但原來唔算特別好味

之後就去新宿行街
行到咁上下就買件 CAKE 返屋企休息

ノワ・ドゥ・ブール 新宿伊勢丹店 (noix de beurre)  Tabelog: 3.77分)
見到呢間蛋糕店好多人排隊
於是我哋又買兩件返屋企試吓
味道都幾 OK的, 不過又無想再食嘅感覺

我哋休閒到差不多九點先出去食飯

最後一晚蝸牛先生想食燒肉
不過我哋行咗好多間都無位又或已經過咗 last order 時間
搵咗好耐終於比我哋搵到呢間有位嘅燒肉店

呢度清一色食牛
我哋揀咗兩碟唔同級數嘅牛
雖然味道都正常, 但我哋覺得第一晚嗰間燒肉店好食啲


第二日蝸牛先生就要返香港了, 剩低我一個人喺東京孤身作戰
好唔捨得佢~

2019年8月25日星期日

2019.07 東京小旅行精華遊 (Day3)

2019.07.13 橫濱花火大會

今日同蝸牛先生去花火大會, 好期待

出發之前先叮返熱自家製嘅麵包做早餐
仲專登買咗舊靚牛油一齊食
(日本呢邊啲牛油真係好多花款, 而且價錢唔算太貴, 一定要趁而加無返夠本)

跟住就出發去橫濱食 LUNCH


我哋叫咗個SET LUNCH
我覺得意粉幾好食
不過呢度上菜有啲慢, 我哋食左差不多兩個幾鐘

意粉佢專登幫我哋分成兩碟, 等我哋可以SHARE 食
好貼心



出發前有做功課, 發現原來日本人喺花火大會係興預先放低張墊霸位的
於是我哋又有樣學樣
放低咗張墊同把遮仲有支神掍就走咗去
(之後返轉頭我哋爭啲搵唔返自己個位, 同埋把遮又吹咗去隔嚟, 哈哈)
下次再去要準備得再充足啲

霸好位之後仲有大把時間 (好似先 4 點幾, 距離 7 點半嘅火蕊大會仲有幾個鐘)
不過落緊雨, 時間又好尷尬唔去得遠
最後唯有行返出中華街
成條中華街差不多都有賣小籠包, 生煎包
不過我哋唔肚餓加上興趣不大就無試啦

途中坐低食返杯雪糕休息

坐夠之後哋返返去公園度坐
等左個幾鐘花火會先開始

落咗成日雨, 地墊都已經濕哂
我同蝸牛先生預先喺便利店買咗一整套連褲嘅雨褸
兩個著到成個傳染患者咁, 超好笑
(周圍無一個日本人好似我哋咁誇張)

煙花放咗大約半個鐘
我覺我都幾好睇, 位置無遮無掩
放煙花嘅時候雨開始細, 簡直係天公造美


散場時先發現原來超級多人, 我哋都花咗一啲時間先可以離開公園
之後就坐火車返惠比壽食拉麵

つなぎ (Tabelog: 3.68分)
同蝸牛先生都點咗味噌拉麵, 湯底唔錯, 都幾好味的



2019年7月15日星期一

2019.07 東京小旅行精華遊 (Day 1&2)


2019.07.11 蝸牛先生駕到!

連續四日都唔駛上堂, 於是安排蝸牛先生過來探我
佢落機當晚我要返學, 約咗喺惠比壽 (我住嘅地方) 等
好開心, 放學就可以見到佢啦

第一餐揀咗食燒肉
walk in 去咗間 Tabelog 高分燒肉店, 不過上到去佢話無位
見落緊雨, 就索性先將個喼推返屋企先再出去搵食
由於都成十點, 唔想周圍搵
所以喺屋企附近搵食就算數
行過街口見到間燒肉店, 蝸牛先生就話不如入去試吓
估唔到都幾好味

コーラ 恵比寿店 (Tabelog 3.58分)
 肉嘅份量唔多, 少人食又幾好
不過肉嘅選擇其實都唔係好多
加上我哋夜去, 有啲已經 sold out
牛舌, 雞同牛味道都唔錯
不過炒飯就淋得滯



返屋企蝸牛先生食咗幾啖岩岩今晚整嘅麵包
佢話覺得好食
(我自己就麻麻哋, 因為啲包日日都係無餡嘅)

2019.07.12 銀座, 有樂町
第二日 lunch 我哋 book 咗食壽司

銀座 鮨 み富 (Tabelog 3.67分)
lunch menu 有3個等級, 我哋揀咗中間級數嘅餐 (8,000yen/位)
每人有十件壽司
味道其實都ok 嘅, 不過就未去到好好食嘅地步
加上師傅又木無表情, 令氣氛唔多開心
壽司一件接一件咁上, 唔夠一個鍾就食完

離開之後我哋去咗有樂町行 Lumine 同 0101
我同蝸牛先生都有收獲
行完之後就去咗中目黑食 Pancake

FLIPPER'S 中目黒店 (Tabelog 3.09分)
五點去到, 唔駛排隊, 直入
叫咗個期間限定 pancake
蜜瓜係幾甜嘅
不過 pancake 質地唔多掂
影咗兩張相後, 佢已經 lum 咗
1,600 yen + tax, 食完好似無食咁
有少少失望

食完之後喺中目黑附近行吓
不過唔係好多嘢行又加上落雨
所以行咗陣就返屋企

返屋企前先去Muji 買飯煲
4,900 yen 唔算太貴, 用3 個月都好, 唔駛日日都食麵

返屋企途中蝸牛先生話要買餃子返去食
無意中發現咗間長龍餃子店
不過呢日太多人, 無緣

喺屋企休息吓夜晚再出去食飯
今晚都係喺返惠比壽食
本來想食shabushabu
不過無book 位又係無得食
最後揀咗食烏冬

初代 (Tabelog 3.71分)


呢個蛋卷好好食, 蝸牛先生話係佢成世人食過最好味嘅蛋卷, 好誇張!

奶油咖哩烏冬係呢度嘅名物
味道係好, 烏冬係煙韌, 但唔算好特別

再叫咗個鴨 Soba, 我覺得佢個湯有少少味精

呢間食完伙有少少失望嘅, 唔係唔好食, 只係唔算好特別

食完飯同蝸牛先生行超市
佢幫我買定啲日用品, 等我之後唔駛拎得咁辛苦
蝸牛先生真係好貼心, 好錫我~


2019年6月26日星期三

2019.02 京阪遊 {Day6} 京都寺廟遊加美食團 (飄亭, 三嶋亭)

 2019.02.20 京阪遊 {Day6} 京都寺廟遊加美食團 (飄亭, 三嶋亭)

平時訂房通常都唔會加早餐
今次 book 房時見佢個早餐好似幾精緻, 所以就 book 埋
8:15 早餐時間, 其實太早又唔係幾食得落
至於味道就普普通通


食飽返到房再瞓多陣
蝸牛先生就自己玩清酒浴
之後十一點就 check out
下一站去食懷石料理
(如果 book 房前知道會去食懷石料理, 就唔會 book 早餐 lu)

酒店附近環境都幾清優

我哋坐巴士去餐廳
見未夠鐘就去附近的平安寺, 南禪寺行吓
同埋希望行多啲等陣間有胃口再食

飄亭 (Tabelog 4.31分)
蝸牛先生好耐之前已經想試呢間
不過我就好怕食懷石料理
(因為太豐富, 好怕食唔哂唔知點算, 好有壓力)

今次比蝸牛先生發現原來佢哋有個比午餐份量仲要細嘅輕午餐
於是就刻 book 位
(本來搵白金秘書幫手 BOOK, 點知對方話一定要酒店 BOOK 先接受) 

呢個餐其實係早餐同午餐嘅混合體
所以會有粥, 有蛋
至於味道都唔錯嘅, 但就唔算係好特別
(個白子茶碗蒸好正)
如果今早無食早餐應該會開胃啲









粥嘅份量都幾大, 我哋食唔哂, 有啲可惜

食飽之後就去行吓附近嘅寺廟

今早無意中比我搵到間白兔神社喺附近
一於入去打吓卡先

入面好多白兔擺設, 但面積都幾細, 好快就行完



今日主力都係行寺廟, 行夠就返出市中心

中途有人又要買雪糕食

之後諗住坐巴士出市中心, 點知等咗好耐都無車
最後唯有坐的士

未夠鐘食晚飯, 就去錦市場行吓
雖然呢度好多嘢食, 但就唔敢買, 怕食咗無胃口食晚飯
諗住去買一間好出名嘅 柚子味噌  (八百三)
點知行到過去先發現佢今日休息, 可惜~

之後再坐地鐵去烏丸站行街, 行到夠鐘食飯就閃


三嶋亭 (Tabelog 3.94)
呢間都算係一間高分sukiyaki 店
所以食之前都好期待

坐低時忽然發現手上嘅結婚戎子唔見咗
個人即刻好唔冷靜
左搵右搵都搵唔到, 好想喊
蝸牛先生就慢慢咁幫我搵, 最後喺褸袋搵返佢
(到而加我都唔明點解會無啦啦甩咗)

牛肉望落個樣都靚嘅

不過食落就普普通通, 老實講有啲失望





食完呢餐就坐車返大阪