2012.07 台北遊 - Day 2 十分 > 遠企購物中心 > 太和殿 > 市政府新光三越 > 電台大樓 (PART 1)

Day 2 (2012.07.26) : 十分 > 遠企購物中心 > 太和殿 > 市政府新光三超越 > 電台大樓
一早起身見太陽伯伯好似行開0左, 而天又不算太暗, 於是決定今日郊遊去.
我們先到車站買車飛出發去瑞芳, 打算坐十二點鐘的班次, 怕攰的我當然想買"對號座" 啦, 但可惜下一班車沒有相連的座位, 要等到一點幾那班才有, 但一點又太遲了, 唉, 無計!! 反正無位坐, 而拍優悠咭的車費比買單程車飛的價錢平 (NT 4x vs. NT 7x), 所以我們無買飛就離開了車站, 先去食早餐.
無目的地在地下街行, 最後來到了台北車站K區地下街, 誠品站前店一帶有幾間食店, 我們最後揀了一間日式的餐廳.

蝸牛先生的吉列咖哩餐. 味道不過不失, 不難吃但也沒有太大的驚喜.

這是我的豚肉飯. 有少少燒燶了的氣味, 但我又覺得幾有風味, 我LIKE.

之後我們就出發去瑞芳!! 上到車我們有位就坐, 但其間有兩次俾買了對號座的人趕起身, 所以最後還是企到落車. 下車後先在月台買出發去十分的車飛, 我們買了瑞芳至菁桐一日任坐的票 (NT 52), 見還有時間剩就在車站的客務中心走走. 由於剛才下車還未拍優悠咭, 於是即刻返去月台拍咭 (就如撘輕鐵一樣, 下車時要在月台拍咭出閘).

由瑞芳到十分的車程不用三十分鐘, 好快. 下車時正下著雨, 感覺有點掃興, 但一場來到, 唯有照行. 我們沿途一直走, 好快就到了放天燈的地方, 不過我們不想下著雨放, 於是決定先去十分瀑布, 回程再作決定.

雖然路上間中會有往瀑布的指示牌, 但指示不太清晰, 而沿途的路亦太荒蕪, 所以當時一邊行一邊擔心行錯路, 唯有見人就問, 最後行了差不多三十分鐘, 終於到達. 要睇瀑布除了要行路之外, 仲要俾入場費 (NT 80), 雖然覺得不太值, 但一場來到, 這少少錢還是會花的.

第一眼覺得, 眼前的瀑布幾震撼. 不過, 望真D, 其實又不太特別..(總覺得它有點人工化, 不太天然). 而呢個所謂的 "十分山水瀑布遊樂園", 入面除了瀑布外, 還有餵小動的地方以及小食店, 在這裡可花的時間不多, 所以 NT80 值不值, 真是見仁見智.

離開瀑布時, 雨開始停, YEAH!!! 一如所願, 終於可以在停雨下放天燈. 最後我們揀了比較多人的 "阿媽的天燈" (很好服務的一家店, 感覺很開心), 雖然不知所寫的願望會不會實現, 但過程都幾開心.

距離下班車開出的時間還有半個鐘, 於是我們去了一間 cafe 店休息.

如果每日都可以咁休閒咁同蝸牛先生嘆住咖啡食件餅咁, 你話幾好呢....

之後夠鐘就坐車回台北了. 臨時決定今晚吃麻辣鍋, 於是即刻打電話 BOOK 位, 想去 <鼎王> 不過已FULL, 最後決定揀名氣同樣大的 <太和殿>.

出返市區才六點多, 見未夠鐘食飯, 於是趁空擋去了遠企購物中心, 為的係去睇 issey miyake baobao, 可惜原來在台灣買的價錢比日本代購還要貴.....唉, 都係疊埋心水下次自己去日本買 . 睇完就坐的士出發去 "太和殿".

(DAY 2 待續.....)

2012.07 台北遊 - Day 1 機場 > 酒店 > 台北微風廣場 (一兆堂)

Day 1 (2012.07.25) : 機場 > 酒店 > 台北微風廣場 (一兆堂)

出發前兩天打大風又狂風大暴雨, 都有少少擔心出門當天會狼狽, 但好彩出發時只是毛毛細雨. 跟蝸牛先生晨早七點半出門口, 八點多去到機場, 第一次見到機場係咁多人, 排了半小時都未到, 差不多九點地勤在旁邊問有無人去台北, 因為,要趕入閘的關係, 所以我倆可以打尖去寄行李. 寄完行李只得十五分鐘趕去閘口, 好彩閘口不遠, 步行過去就可以.

原定起飛時間是十點, 但因為之前有太多航班 delay 的關係, 所以我地班機都被迫延遲. 最初顯示十一點可以登機, 但一等再等最後十二點幾先上到機. 原本以為好黑仔, 點知…在臨上機前交 boarding pass 的一刻, 空姐說我們可以 upgrade 去 business class, yeah, 心情即刻好返好多. 不過, 上到機都依然要等, 但好彩我們坐的是 business class, 不斷有飲品同雜誌供應, 空姐仲不斷說不好意思讓我們久等, 而且座位闊, 坐都坐得舒服d, 所以心情無乜點受影響.
差不多一點, 終於等到起飛, 但起飛無耐就遇到強勁氣流, 成架機突然下墜, 當時好多人尖叫, 我都以為自己會死, 真係好驚, 好彩只係虛驚一場. 驚完後就派飛機餐, 好興奮, 因為原本坐 econ 只得一個麵包, 但 B. Class 就唔同, 會有生果, 主菜. 我們揀了點心併盤, 不過今次的就不算太好食.

落到機就忙唱錢同買電話咭, 最初打算買"台灣大哥大" 的電話咭, 但實在太多人, 所以最後放棄轉買隔離的 "遠傳". 我用了 NT300 買了一張可以三日無限上網 + around 十幾分鐘通話時間的電話咭, 而蝸牛先生則用 NT 600 買了一張五天上網 + 唔記得幾多分鐘通話時間的電話咭. 買完電話咭就去買車飛出市區.
我們買的是國光客運 (NT 125), 人龍超長, 最後差不多五點多才出到市區, 好攰!

check in 後, 蝸牛先生就趕去南港展覽廳睇佢的 Radiohead concert. 而我就一個人在附近行了一圈, 買了我愛的繼光雞, 好味!!


之後就匯合同樣是今日來台的家姐一起吃飯, 因為大家都無乜 idea, 加上岩岩到步有點攰, 所以最後決定在酒店附近的微風廣場食火鍋.
一兆堂 @ 台北微風廣場

四人海鮮餐 (@ TWD 500/人), 可揀一人一鍋 OR 幾人一鍋.我地揀了一人一鍋, 分別試了四款湯底 (蕃茄, 味噌, 昆布, 咖哩), 個人覺得蕃茄最好味, 至於食物質素就不過不失, 不算太特別.







呢個餐好豐富, 食物放滿整張枱, 最後還有 movenpick 雪糕同紅豆沙, 超飽!!!

食完飯逛了一陣就各自回酒店, 而我就去了誠品, 買了一本最近網上好多人談論的 <深夜食堂>, 但睇完我又覺得本漫畫麻麻.

之後就等蝸牛先生返來…結束了第一天的旅程.

2012.07 台北遊 - 酒店篇

每次去旅行前我都會花好多時間搵心水酒店
對我來講, 酒店一定要乾淨同交通方便

今次遊台, 其實無乜心水 (亦懶搵)
最後揀了家姐住過的住宅式酒店

Master Inn 大師會館


位置: 在台北車站對面, 台北轉運站同 Q-square 旁.
酒店有多條地下街連接, 完全唔怕風吹雨打, 好方便. 而且撘捷運 / 火車 / 高鐵/ 巴士都好方便.
在位置方面真係贏哂, 無得輸!!!!

而唔好處係地下街較易迷路, 我覺得條條路一樣, 好難認呀!!!! (但可能係我問題, 我一向無乜方向感).
不過後尾發現, 只要跟住台北轉運站 or Q-SQUARE (京站時尚廣場) 的指示牌行就OK (地下街Y3 出口)

服務/設施:
接待處同酒店大樓屬於兩座唔同的 BUILDING, 感覺怪怪的, 而且想搵職員幫手都唔係咁方便.
另一樣唔方便的係要轉 LIFT, 每次上房要先撘 LIFT 上5 樓, 然後再轉另一架 LIFT 先可以上到去.
而每次撘 LIFT 都要拍一拍一條電子 KEY, 否則部 LIFT 會無反應, 但 KEY 就只得一條, 如果兩人分開返酒店會好煩 (因為職員話佢唔會有多條 KEY, 試過有一晚蝸牛先生睇完 SHOW 回來, 個STAFF 話無KEY, 叫佢自己由五樓行上十三樓, 好彩撞到保安員幫手開 LIFT 先至唔駛行)

職員唔算 HELPFUL, 我覺得成班人要再培訓.

房:
唔算太大亦不算太細, 但都 OK 乾淨, 幾有 "家" 的感覺. 而房內亦有免費 WIFI 提供


有煮食爐


最喜歡廁所有呢個恆溫裝置
每次0係酒店沖完涼抹身都會覺得好凍
有0左佢就唔怕凍



由於係住宅式酒店的關係
入面有小露台同洗衣機



價錢:
因為我是連機票買的, 所以唔知獨立訂房會係幾錢一晚, 而AGODA 的參考價係七百幾一晚.
我覺得....單從地點來講, 佢位於台北車站而又咁新淨, 七百幾蚊係絕對超值的 (殘殘舊舊的天成都差不多呢個價)

雖然整體上都算滿意
但基於上述的缺點, 下次我又未必會住返呢間

2012.07 台北遊 - 開場白

呢篇開場白其實出發前已經寫完一大半
不過一直未埋尾, 所以到成個旅程完哂先POST 到

由我第一次去台北開始
就已經對呢個地方無乜好感
但基於佢在地理位置上有優勢 (一個鐘頭機, 消費又唔多, 可能只係比去澳門貴少少)
所以呢幾年不知不覺地已經去了三次
今次將會是第四次
估唔到, 台北竟然係我繼東京之後, 去過最多次數的國家!!!!!
人生....實在有太多的意想不到~

今次之所以會去
其實是蝸牛先生要去睇 電台司令的演唱會
佢預計第一日到步後會立即去會場排隊霸位
不過呢d 搖滾樂隊就都唔太岩我
所以佢去睇演員會時, 就會係我自由活動的時間
哈哈, 諗起都覺得刺激同興奮!!


********
出發日期: 25 JUL 2012, 10:00 (CX405)
回程日期: 29 JUL 2012, 16:15 (CX450)
下塌酒店: Master Inn (據聞呢間係非法的日租酒店, 不過家姐住過後極力推介, 我又即管試下)

*********
暫時未有一個好 CONFIRM 的行程, 但想食的餐館都已經大約想好
去台灣, 除了食和食之外...我就真的想不到有其他活動了

如果天氣OK 的話 (不下雨, 不勁熱)
今趟旅程也想去郊外遊遊, 如菁桐, 十份之類 (去幾次都無去過呢 D 地方..)
不過最近新聞說, 台北天氣超熱
所以, 也要看看到時的情況再決定

去台北, 就是有這一種好處...
不用花太多的時間去 PLAN 行程
好岩我呢一種怕煩的 HEA 人...hehee...

婚禮 - 商戶評價 (當日攝影: Contrast Studio)

店鋪: Constrast Studio
評分: (十粒滿分)

哈哈, 估唔到結婚一年零一個月仲有得寫婚後評價
呢篇咁遲唔係因為懶
而係...一直都未揀相印相簿 (不過相的 SOFT COPY 就一早拎0左, 只係相太多, 唔願揀...hehee...)
新年前終於的起心肝攪埋佢, 上星期終於有得拎

相簿:
揀完相, around 兩至三個月有得拎, 而且相簿比我想像中整得靚, 有驚喜!!!

其實我早在十二月時已經 EMAIL 揀好的相俾佢地, 但一直未有人覆我. 之後一月忍唔住打去 FOLLOW, 最後要SEND 多次先有人幫我跟進!! 而其實之前都 SEND 過幾次EMAIL 俾佢地, 但就唔係次次都有人覆...

VIDEO:
video 就只得一隻少於一個鐘的 CD....比我想像中少...

佢地拍 video 的攝影師是 freelance 的. 因為我當日的攝影師竟然同我其中一個姊妹 wedding day 的攝影師一樣!!! 但我地係分別 join 了兩間不同的攝影公司~

相:
相就有 4 隻CD, 不過影得麻麻地, 有好多都似偷拍照. 不過, 佢地 facebook post 出來的相就堅靚, 跟我的有好大的出入, 我估係攝影師不同吧!! 其實第一次睇相, 我同蝸牛先生都覺得影得唔靚, 只係之後睇睇下先覺得順眼D.

婚後 AROUND 3 個月有 SOFT COPY 拎, 不過, 第一次拎0個隻CD, 佢 COVER 印錯0左我個名!!!! 太大意呢.....

服務:由始至終都唔覺佢地有 service. big day 前開會係我一星期前主動打去約的, 而big day 前一日佢地亦無人confirm 我時間.....
不過 big day 當日尚算合作愉快....只係....略嫌佢0地有少少 hea.....由於我BIG DAY 當日太忙, 無時間出去望 下 RECEIPTION 的 DECORATION, 以為攝影師點都會影兩張, 點知乜都無, 好失望呀!!

總結:感想寫完, 大家想唔想揀呢間公司就自己決定吧~
可能, 只係我遇著的攝影師唔好...(又要UP 多次, 我睇佢的 PREWEDDING PHOTO 真係覺得好鬼靚, 可能佢地唔岩影BIG DAY PHOTO 吧)
不過揀得佢地, 就要有心理準備樣樣自己跟得緊 D (其實都幾無癮, 俾0左錢, 但事事要自己 follow~)

2012 東京小旅行 Highlight

四日三夜的東京小旅行終於結束了
如我所料, 只得四天實在太趕
所以今次純購物, 沒有觀光,
每日都同時間競賽, 行到腳跛...
詳細的遊記就不寫了
因為每天都是 SHOPPING, SHOPPING AND SHOPPING
所以我只 HIGHLIGHT 一些比較特別的就算了

先講講今次住的酒店
我們住在池袋區 的 THE B IKEBUKURO
酒店跟 JR 站很近, AROUND 3-4 MINS 腳程, 位置算方便
前往方法: 池袋東口上地面後, 向左面行, 之後舉頭會見到 BIC CAMERA 招牌, 向住呢個方向一直行就OK
因為出口只得樓梯, 所以建議如果有大型行李者, 可經 PARCO 的扶手電梯上地面

池袋雖然不及新宿方便, 但都幾多0野行的, 而且肯定比新宿少人, 行得舒服D
~ SUNSHINE CITY 距離只有十分鐘路程 (商場入面有 NENET, 靴下屋, 315 YEN SHOP, Earth music and ecology 等等等等)
~ 百貨公司, 如PARCO, 西武, LOFT
~ TOKYO HANDS
~ 藥房
~ 行遠少少有一間廿四小時的超市
~ 廿四小時激安店
~ 無敵家拉麵, 一蘭拉面

酒店房有 FREE INTERNET, 但要自備 TRAVEL ROUTER
房間算清潔, 但就極細, 入房後真係嚇了一跳
一眼望哂, 超誇張!!
而且 CHECK OUT 時間是早上十一點, 我覺得太早了



今次又去了新開的 木更津OUTLET
原本對 OUTLET 無乜好感, 皆因差不多每次都空手而回
不過, 呢個 OUTLET 都幾值得一去
雖然唔算特別平, 但入面的鋪頭有齊新舊貨, 所以買得好開心

如果在羽田機場直接過去只要半個鐘就可以
可惜, 我不是在羽田下機
而由新宿坐直通巴士過去, 車程約一個鐘 (要注意每日只有兩班車開出, 出發前記得睇時間表)
如果撘鐵路的話, 就要多出一倍的時間
唯一缺點係車費太貴, 一程要 1,400 yen, 來回已經幾百蚊

另外又去了 Skytree
不過, 時間關係加上落大雨...我們只行了商場
有機會一定要再去

今次在網上租了 BMOBILE 的上網咭
$220/ 4 天, 都算貴...
我租的已經是快咭, 但網頁依然 LOAD 得勁慢
但 WHATAPP 就OK (只是在鐵路入面好多時候都收唔到)
下次應該唔會再租佢

今次又發現, 如果用銀聯咭簽賬
某些百貨如 0101 會有5%優惠
加埋退稅, 足足平了 10%!! 都慳唔少

另外, PRACO 入面 唔係間間鋪頭有得退稅
買之前記得問清楚

今次買了唔算太多, 不過 YEN 貴, 所以感覺上用了很多

雖然剩低蝸牛先生一人在香港
但我都無忘記佢架
我買頸巾時也不忘算他一份
還另外買了每人一對手襪
今個冬天, 應該很 WARM 吧~

回到大婚日: 2011.03.20 我們結婚了

2011.03.20: 大日子
晨早五點幾起身刷牙洗面, 之後為就煮個公仔麵打打底 (我好怕今日無飽飯食!!) 化好妝後就開始影花絮....
第一個感動位: 攝影師的指定 POSE - 媽媽為女兒著褂
當拉鏈拉上來的一刻, 不知為什麼忽然覺得好感動, 好想喊, 不過當時我忍住了....
第二個感動位: 接新娘
之後大約九點開始接新娘. 第一個 GAMES 是要蝸牛先生寫出娶我的原因, 寫完後再搵家坊簽名, 到入屋時就要將原因大聲讀出來. 最初的原因都是無聊和行貨的 , 但到最後一個我聽到後覺得好感動, 仲忍唔住滴了幾滴眼淚呢........ 0個句就是:

我想以後都同佢過!!

玩完 GAMES 就到奉茶俾長輩和收禮物時間 , 之後由哥哥負責揸主花車送我倆過男家. 而 LUNCH 時間就留在男家吃飯, 不過在吃飯時忽然覺得有點肚痛, 所以我都不敢吃太多, 累我之後覺得好肚餓 (好彩我早有準備, 一早叫伴娘為我帶了雪芳蛋糕, 如果唔係, 實餓到手軟腳軟).

之後就返女家進行回門儀式. 我們一行十多人踏進電梯, 或者是太重了吧, 電梯去到 4 樓時忽然急墜, 頓時尖叫聲四起, 我當時心想: 死啦, 我唔想著住褂等消防員救, 亦都唔想著住褂0係部 LIFT 爬出去, 今次一定見報, 好樣衰喎!!!! 而當時蝸牛先生就心想: 死啦, 今次實 OVERRUN, 無得去影相. 好彩, 最後架 LIFT 忽然間又落返地下, 於是全部人急急腳走出去撘第二架!! 總算有驚無險....

回門後就同兄弟姊妹一齊出發去海濱公園影相. 因為今早天陰陰, 還擔心會下雨, 好彩最後都可以順利出發. 影完相就直接去酒店, 休息一陣就開始轉妝換衫.

六點半證婚, 證婚前見到枱面有炒麵和串燒, 怕夜晚無啖好食, 於是九秒九秒先將它們消滅, 填飽個肚先 .

證婚時, 沒有想像中咁感動...也沒有想哭的感覺. 當時的我, 只是在意婚紗正在下滑中 (我估應該好多張相都會見到當時我係勁望住自己心口的). 證婚完就要轉妝換衫出來迎賓.

跟客人影相到差不多的時候, 又要返入去轉妝換婚紗準備進場 (不斷換衫其實都幾攰!!).

我們的進場形式是: 蝸牛先生在入面唱歌, 唱到一半就出來拖我入去. 在出面等的時候, 忽然覺得緊張....不過呢個感覺好快又消失了 ...

之後成晚就不斷換衫轉妝, 攪到都無乜 MOOD 出去同人影相閒聊 (其實都無時間).

雖然中間出現了一段小插曲 (蝸牛先生準備了三首歌想唱, 但 FINAL 只唱到兩首), 而我其中一個造型都因為趕時間而整得麻麻地.......但當日總算順利完成.

回到未嫁時: 2011.03.19 婚前一日

前幾日拎返隻 "早拍晚播" 出0黎睇, 先醒起原來我無寫過大婚當日的心情係點的, 趁而加仲有少少記憶, 一於回到未嫁時~
2011年3 月 19日: 婚禮前一日
心情: 混混噩噩, 還未有緊張的感覺
下晝同蝸牛先生去拎衫, 拎花球, 而哥哥就做司機負責接送. 當日的拎衫過程都尚算順利, 沒有想象中辛苦, 幾個鐘就攪掂哂.
夜晚我所有的家姐哥哥都回家跟我吃單身的最後一餐, 好熱鬧!!! 食完飯就開始佈置屋企 (其實只是貼上 "囍字貼" 和執拾一下雜物而已), 到十點鐘左右就上頭了, 當時的我仍然是沒有什麼特別的感覺, 只想早一點上床瞓個靚覺.
婚前一晚, 其實唔多唔少都有點不捨得. 婚後搬得離娘家遠, 不會時常都回去, 跟屋企人見面的時間都會少了. 而這個家, 這張床....又跟我相處了幾廿年, 好唔捨得呢. 又因為我倆的新居地方不大, 所以好多東西都沒有帶過去....(我好多芝麻街精品都要被迫留在娘家 ).
十一點多就上床, 但輾轉反側, 花了個幾鐘才可以入睡, 不過成晚就不斷醒, 到第二朝起身時好似無瞓過一樣...
婚前一日, 就這樣平平淡淡的過去了...

2011 台北 + 台中 4天遊 (Day 3 - 下)

2011.05.09 Day 3
(上) 中山站 --> 國立美術館 --> 市政府站 --> 忠孝敦化站 (Milkhouse)
(下) 忠孝敦化站 (橋頭麻辣鴛鴦火鍋) --> 西門町

去台灣一定要試地道的麻辣火鍋, 見好多本旅遊書都推介 <橋頭>, 於是就決定今次一定要去試.

橋頭麻辣鴛鴦火鍋地點:台北市敦化南路一段157號2樓

鴛鴦鍋 @ 橋頭麻辣鴛鴦火鍋
一邊是麻辣, 一邊是皮蛋香菜清湯
好神奇的麻辣鍋, 我已經不是吃得很辣的人, 但竟然完全吃不到有麻和辣的感覺, 只吃到有點點的苦味, 超級唔 like!! 而清湯那邊又太淡, 都係上一次的 <鼎王> 比較好味一點.

霜降牛肉 @ 橋頭麻辣鴛鴦火鍋
折返 HKD 都要百幾蚊一碟, 不過質素麻麻, 無乜牛味, 早知食平牛算啦.

老油條 @ 橋頭麻辣鴛鴦火鍋
好多人話老油條是麻辣鍋的好拍擋, 因為油條可以吸湯, 所以吃起來特別好吃. 不過我就覺得這條油條麻麻地好食.

冰豆腐 @ 橋頭麻辣鴛鴦火鍋
普普通通, 無乜特別.

手打墨魚丸 @ 橋頭麻辣鴛鴦火鍋
麻麻地....

象拔蚌 @ 橋頭麻辣鴛鴦火鍋
意想不到的大碟, 最後我倆食剩一半

最後埋單差不多要五百多港幣, 高消費低享受, 搵笨!!

今晚是旅程的最後一晚, 而因為明天三點鐘機, 所以要襯今晚去買吃的手信.

下一站: 西門町

今趟旅程除了吃的和看的(書), 我倆什麼也沒有買, 途經 ABC Mart 就順便入去看看 (也同時幻想自己在日本), 最後跟蝸牛先生買了一對情侶(夫妻?!)鞋

之後就去港人手信熱點, 港記, 老天祿, 黑橋牌...掃完一輪就回酒店去.

2011 台北 + 台中 4天遊 (Day 3 - 上)

2011.05.09 Day 3
(上) 中山站 --> 國立美術館 --> 市政府站 --> 忠孝敦化站 (Milkhouse)
(下) 忠孝敦化站 (橋頭麻辣鴛鴦火鍋) --> 西門町
話說, 之前去新加波無去食當地的名物 <阿坤咖央多士>, 本來都不覺得可惜, 但之後聽到好多人都話勁正, 令我覺得有少少遺憾. 出發去台灣前, 發現原來在台灣都有<阿坤>, 於是就決定今個旅程一定要去試.
按旅遊書 (長空出版社, 即封面閃令令那一本) 指示去了中山站, 我倆在烈日下找了大半個鐘都找不到, 太可惡!! (後來蝸牛先生說, 難怪在阿坤的 web site 裡沒有顯示, 可能早已關門大吉!!) 最後唯有放棄, 隨便在附近找吃....

中山站的小街, 有點日本 feel

最後, 在街尾找到旅遊書另一推介:

福大蒸餃館地點: 台北市中山區中山北路一段140巷11號 (中山捷運站 - 南西三越舊館旁後方巷子內)
蒸餃真的幾好, 不過環境同伙計的態度唔多掂

蒸餃 @ 福大蒸餃館
這是山東風味的蒸餃, 皮薄又多汁, 今次旅遊書終於無介紹錯

酸辣湯 @ 福大蒸餃館
見好多人都叫一碗, 於是我們又照跟, 但我就覺得太重胡椒味 (定味精?!)

除了想去 <阿坤> 外, 其實在中山站蝸牛先生還想去一間 cake shop 的. 點知..........旅遊書上的 cake shop 已變身成為婚紗鋪, 攪到蝸牛先生好失望. 不過, 好彩他想吃的 cake shop 不只一間, 最後改去 - Afternoon Tea.

Afternoon Tea地點: 台北市南京西路14號2F (新光三越台北南西二館)

好鍾意 Afternoon Tea 的家品, 不過可惜價錢唔靚 (再加上蝸牛先生一句 "呢d碗日本城 $10 都有一隻 ), 令我無哂購買意欲.

撞正 lunch 時間, 所以都要等一陣位.

櫻花櫻桃生起司蛋糕 @ Afternoon Tea
蛋糕清清地都幾好味, 不過就不太特別

洋甘菊蘋果茶 @ Afternoon Tea
普普通通

食完就出發去 <國立台灣科學博物館> 睇 "日本 3D 藝術畫展". 其實之前已 PLAN 好去輕井澤睇的, 可惜最後去唔成, 估唔到台北最近又做緊, 於是就決定去睇下.

展館比想像中多人, 要影相就要先排隊, 好彩台灣人都算守秩序, 唔多覺有打尖的情況出現 (如果在香港的話, 肯定會勁多人打尖!!), 我們在入面清磨了大約兩個鐘就離開了.

其實當時肉眼睇並不覺得太立體, 不過影相後睇返就會覺得好立體, 好神奇!!!

下一站去市政府捷運站, 那裡有蝸牛先生想看的結他. 因為已經開始肚餓, 於是就沿途找吃, 最後揀了一間地道小店.

炸雞排飯 @ 市政府站地道小店
雖然環境麻麻, 不過味道幾好, 一個飯還可以跟 3 款菜和例湯, 好抵食而且有驚喜!!

食完就陪蝸牛先生去看結他, 之後就再去下兩站 <米哥烘焙坊> 和 <查理布朗>.

雞蛋布丁 @ 查理布朗烘焙店
地點: 新光三越A4館 B2
上次去台北時已經想買, 不過 FINAL 搵唔到, 好彩今次好快就搵到, 雖然無想像中咁好食, 但其實味道都唔錯的, 而且好滑.

入面有說明書講解製作過程

之後再去 <米哥烘焙坊> 找我想吃的 "半熟乳酪布丁蛋糕", 但原來市政府分店沒有賣這個, 好失望啊!~ 之後店員告訴我們在 忠孝復興站的分店有賣, 於是我們又即刻趕去那裡.

MILKHOUSE (米哥烘焙坊)
地點: 台北市大安區忠孝東路四段130號 (忠考敦化站, 地下街12號出口, 一出即見)

半熟乳酪布丁蛋糕 @ MILKHOUSE (米哥烘焙坊)
難以形容的好食, 真係要極力推介俾朋友!! 食完一件後, 決定明天再來入貨, 帶返香港做手信 (不過, 它實在太易溶喇...所以基本上唔可以拎出街, 怕會變壞, 最後唯有我跟蝸牛先生慢慢食)

之後就坐的士返酒店放低雞蛋布丁, 再出發去 <橋頭> 打邊爐.

(待續)