2016.04 {Day 3} 餓底遊韓國: 梨大/弘大/鷺梁津海鮮

2016.04.25

出名的 ISAAC 多士就在酒店附近

諗住食早餐前去買件 SHARE

點知十點幾落到去, 條人龍已經好長

最後我哋都係放棄咗

坐的士去梨大的孔陵一只雞

四個人點了兩只雞

肉質無想像中咁嫩滑

不過啖湯就幾好飲

最後加埋個麵條就岩岩好

阿嫂話陳玉華一只雞好味啲

下次有機會都要試吓

之後行落新村站坐地鐵落弘大

點知行到去個站好似荒廢咗咁

最後唯有坐返的士落去

弘大站比我想像中好 SHOP

啲衫好似岩我多啲

最後我同蝸牛先生都有收獲

途經  ISAAC

(就在弘大對面)

呢間有位坐, 而且無乜人

啲人講到咁好食

我哋當然唔執輸走入去買兩件來試

甜甜哋, 但嫌個包拱得唔夠脆

 好食但又未去到驚為天人咁好味

呢兩日都好哂, 下午直頭有三十度咁熱

呢間賣西班牙油炸鬼的, 我覺得都幾好味

行完弘大, 時間尚早

今晚本來計劃食豬手, 但個肚仲未有空間

於是臨時改行程, 坐的士去鷺梁津食海鮮

鷺梁津海鮮

同一般的海鮮市場無分別

不過都叫做乾淨, 唔會有難聞的氣味 (可能係因為我鼻塞聞唔到)

基本上每檔賣的種類都差不多

 生八爪魚

呢個似乎係必食

上枱時仲係郁吓郁吓

魚

用來做刺身同煲湯

其實都幾大條

刺身

清蒸鮑魚/大螄蚶

香港未見過咁大隻螄蚶

蝸牛先生話細隻的好味 D

魚湯

刺身後的魚骨用來煲湯

愈滾愈鮮甜

長腳蟹

蟹唔算好大, 不過就幾多肉

而且都幾鮮甜

沿路行去地鐵站

好有舊公屋 FEEL

見到新大樓已經起好, 我估呢邊隨時搬過去

下站係首爾站樂天超市/ OUTLET

個 OUTLET 就唔多岩買

超市都其實無乜特別

但點都要買少少返來做手信

返到酒店就要執行李啦

之後蝸牛先生同大哥大嫂又去夜宵

夜宵: 雪濃湯

由於我太需要休息的關係

所以我無跟佢哋出去食

叫咗蝸牛先生外帶返來

個外賣包裝好靚

同埋個湯都真係好正!  清得來但又有好濃的牛味

剩係呢碗湯都值得我下次再來韓國

話咁快就已經係最後一晚

韓國比我想像中好玩, 好食

2016.04 {Day 2} 餓底遊韓國: 建大貨櫃百貨/新沙洞

2016.04.24

尋晚瞓得超差 (其實好似無瞓過)

鼻水倒流令我成晚都好似"浸" 親咁, 瞓唔到

蝸牛先生仲未起身

我就一個落樓下諗住唱錢同埋買份 ISAAC 三文治做早餐

點知今日 ISAAC 無開

朝早的明洞, 無乜人

因為要食藥, 在地鐵站買咗袋奶王小蛋糕醫肚

都幾好味, 唔會太甜

之後就出發去 建大入口 站

呢個貨櫃百貨上年先開

仲以為好多嘢行, 但原來得好少鋪頭

個幾鐘已經可以行哂

今日 LUNCH 去咗一間食芝士排骨的餐廳

詹姆士芝士排骨

好多台灣 blogger 推介, 但無想像中咁好味

排骨似平時美式餐廳食到的 RIBS

芝士就似芝心批入面的芝士

反而後加的炒飯幾好味

食完就去貨櫃百貨

行完無收獲就唯有食

呢件 CAKE 唔平, 好似成六, 七十蚊件

但就超大件, at least 要兩個人先可以 K.O. 到

我哋四個人都有少少難度

因為蛋糕超甜

之後就坐的士去新沙洞

據聞呢度係日本表參道

所以出發前好期待

不過可能今日天氣太熱, 再加上病

我無乜心機行

最後買唔到衫, 只係買咗一副眼鏡

Line shop 真係好靚好得意

行到五, 六點就再食我哋的第二餐

元祖醬油蟹

呢間係杜如風介紹的

主角: 醬油蟹

雖然我都好想試, 但我腸胃唔好

我怕我病上加病, 所以最終都係無試

而蝸牛先生竟然話同香港食到的一樣!!!!!

章魚湯

大大隻生的章魚喺我哋面前放落滾湯入面

見住佢臨死掙扎

忽然閃過問自己, 我係味應該食素?

鮟鱇魚

好大碟, 不過其中有好多都係骨同埋好 "un" 的位置

試過就算

蒸蟹

唔食得生蟹的我, 唯有食熟的

雖然膏唔多, 但尚算鮮甜

食飽飽又再返明洞行街

今日我要轉戰樂天百貨

出發前做咗資料搜集, 喺韓國買 Celine 係平過香港的

一直都鍾意 Celine Trio

最後見佢平二千幾蚊, 猶豫咗一陣就決定要帶佢返屋企

不過喺免稅店買完係唔可以即刻帶佢走的

要先比錢, 之後離境時在機場拎

明洞商店街有好多小食鋪頭

餓底團經過都有買少少來試

行完街返酒店休息咗陣又出去食過

不過原來好多餐廳都收十點幾十一點的

最後路經一間叫 <大家> 的鋪頭就比員工 sell 咗入去

食後感: 貴, 極度唔抵食, 似扼遊客 feel

燒牛, 豬

 望色水, 其實唔多靚

不過味道又正常

五花腩

部隊鍋, 貴, 但料唔多

呢日都幾病吓

唔夠瞓再加上鼻水長流

真係掃興~

2016.04 {Day 1} 餓底遊韓國: 明洞/馬場洞

2016.04.23

由於 PAKCAGE 太抵的關係

(4D3N $3xx 坐國泰住明洞)

阿哥阿嫂都話要一齊 JOIN

所以本來的二人遊, 最後變成四人遊

出發前兩天, 我竟然感冒+微燒, 可惡!!

起飛的朝早仲要肚痾, 攪錯!!

國泰的飛機餐真係愈來愈唔掂

粥 + 乳酪, 我真係見到都肚痛

三個鐘多少少就到韓國, 又幾快

不過過關就超多人, 大約排咗半個鐘多 D 先出到去

一出機場就有機場巴士, 好方便 [6015/6001 號車]

第一次去, 唔知邊度買飛

但原來上車比錢就 OK

$14,000 won 一個人, 即港紙成九十幾蚊, 都幾貴

不過就真係幾方便同埋舒服

根據網上資料. 佢話明洞係尾站

於是我哋大安旨意無襟鐘, 點知架巴士過咗明洞都唔唔停

於是拿拿臨襟返鐘

遲咗一個站落, 要行大約七, 八分鐘先去到酒店

我哋今次住明洞的 Loisir Hotel

地鐵站 5, 6 號出口一上來就係, 都幾方便

酒店門口亦係機場巴士站

check out 完後就匯合大哥大嫂 (佢哋早我哋一班機)

之後出發去第一站 - 馬場洞 (肉類市場)

由明洞坐地鐵過去, 大約半個鐘

之後在 2 號出口, 一直行到油站, 路口轉左, 一直行到盡頭就係

其實想去杜如風介紹嗰間的

不過好似收咗

如果再去的話, 我會揀日頭去, 因為黃昏好多鋪頭都已經收咗

最後憑感覺揀咗呢間

無記錯呢 pack $70,000 won (記住要講價)

之後店員就帶我哋去餐廳

餐廳會提供泡菜等小食

雖然有少部份黑咗, 但整體都算靚

不過剩食牛就覺得有少少單調

最好買埋其他肉上來一齊燒就正

 食完後, 我哋坐的士返明洞

的士費其實同四人一齊坐地鐵的價錢差不多

所以人多係化算啲

返到明洞就係自油活動時間

明洞真係有好多 skincare 的鋪頭

好彩我唔係咁好, 如果唔係一定買到破產

行咗一陣都無乜收獲 (因為啲衫好多都 MK look)

 於是轉戰甜品

去 O'sulloc tea house 食綠茶 rollcake

呢度有樽綠茶醬好出名, 本來我都打算買

不過試完件 rollcake 之後就打消咗呢個念頭 lu

我咃揀咗 set, 有一件 cake, 一球雪糕 同一杯嘢飲

價錢大約係一百蚊港幣

蛋糕的質地唔夠軟熟, 綠茶味亦唔夠濃

我會覺得 Citysuper 的 Cha-no-wa 好食好多

不過雪糕就幾好

之後行多陣就返酒店休息

而蝸牛先生就同大哥大嫂出去食宵夜

本來佢哋想食部隊鍋. 不過已經收檔

所以最後揀咗食炸雞


病住遊韓國的第一天都算唔錯
好開心終於食到傳說中的韓牛
雖然肉質唔夠日本和牛嫩滑, 不過牛味真係好濃
而加望返相都好想再食

2016.04 雜

而加每日一有時間就溫日文, 好充實, 好鬼忙

下星期就飛韓國了, 係我同蝸牛先生的第一次

唔知好唔好玩呢

今次只係去四日, 所以唔會有太多的行程

加上第一次去, 所以只係 plan 吓去明洞, 弘大之類熱門的地方

無乜特別的期望...

只係期望可以食到好食的韓牛

上星期買咗機票九月去名古屋

今次主打岐阜縣 (高山, 白川鄉. 奧飛驒溫泉鄉) 

未出發先興奮

已經搵緊溫泉酒店, 好多間都好似好靚呀~

(希望到時  yen 唔會升得太高)

7-11 最近 換的 Le Creuset 小餐具

其實本來唔覺得特別靚

不過換完一個之後, 又好想儲齊一套

多得同事, 朋友, 屋企人的幫助之下, 我已經換咗六個啦

要繼續努力!

(不過每次都唔知抽到邊隻, 攪到無乜心機再換落去....)

有次 weekend 同蝸牛先生去翠園飲茶

一打開點心紙, 咦...點解咁少選擇嘅

當我哋以為中伏之際, 阿姐就話出面有點心車

已經好耐無見過點心車啦, 真係好懷舊~

亦令我諗返起以前細個同屋企人飲茶的時光

有一晚學人整燒肉

過程雖然唔算煩覆, 但因為味道無乜特別

最重要係整唔到脆皮

所以應該唔會再整第二次了

今年會去三次旅行

呢半年都要慳慳哋儲下彈藥先~

2016.04.04 {銅鑼灣} Lunch @ Dazzling

The One 的 Dazzling 喺 openrice 有成二百幾個好評

我一直都好想試

但諗起要排隊都係咪攪

前排發現原來佢喺皇室堡開咗分店

或者未係太多人知（抑或熱潮已過）

假期的中午唔算多人

等咗大約十分鐘就有位

Dazzling cafe

告士打道311號皇室堡3樓313-314號舖

朱古力鬆餅 （跟糖漿，雪糕）

質地可以揀普通或鬆脆

我哋揀咗鬆脆，但其實又唔覺佢脆

加 $15 升級，餅入面就會有麻糬

但升咗我又唔覺佢有煙韌感覺，所以我懷疑佢加漏咗

雖然係咁，鬆餅的確係幾好食

cream 好滑，糖漿亦唔太甜

檸檬雞意粉

酸酸哋味道都幾清新幾特別

只係份量太少

咖啡

旁邊的餅乾幾好味，咖啡都幾香

水果茶

味道太普通，雖然可以refill 但唔多扺 

整體味道ok 的

不過又唔算好特別

價錢亦唔平

呢餐埋單要三百多

環境, 裝修隔局都幾舒服

不過我覺得侍應唔多專業亦唔多夠

等好耐先有人幫我地點菜

執碟時有食物跌落枱面但無意識幫忙抹返乾淨

*****

最後一天的假期

有時間嘆杯咖啡食件餅都幾唔錯