2016.11 大阪 {Day 3b}大阪瘋食 - 人氣意大利餐廳

2016.11.28 大阪 {Day 3b}大阪瘋食 - 人氣意大利餐廳

蝸牛先生好鍾意去日本食西餐

因為相對地比香港抵食

用香港 lunch 嘅價錢, 喺日本就已經可以食到 dinner

而且服務, 環境全部都一流

不過今鋪真係俾蝸牛先生"扇" 咗一鑊

事前完全唔知呢度咁鬼高級

兩個著到爛撻撻咁走入去, 真係超級樣衰

食咗乜其實已經無哂印象啦

但記得整體味道都幾好

Quintocanto ristorante (Tabelog 4.35分)

Wager with fole-gras and lemon jam

威化餅鋪住鵝肝醬, 食落都幾得意

Pheasant and beetroots

另一杯係紅菜頭汁, 都幾醒胃

Red shrimp and pink grapefruit with corlander flavor

蝦都幾爽甜

Frog leg plccata with green salad

初頭見到 menu 係田雞腿覺得有啲驚

不過佢拆肉加上係炸的, 所以食落完全唔覺得佢係田雞

而且味道仲幾好, 不過食完感覺有啲漏

White kidney been soup and trippa Montalcino style

呢碗湯都漏漏哋

Variation of jerusalem artichoke with scallop and white chocolate

呢味直頭無哂印象

Roasted wild boar with chestnut confit

剩係記得栗子幾甜

Lemon sherbet

清味蕾

好攪笑! 食到呢度, 侍應會有幾隻碟仔俾你揀 

原來係用來放麵包的

Red wine risotto

呢個我記得味道幾好的

"Tottori beef"

其實已經食到好飽, 見到menu 有牛好驚

好彩只係得一細舊

個人唔太鍾意食牛有咁多汁, 感覺食唔出佢嘅原味

Tomato sauce pasta

呢碟咁普通嘅意粉竟然係我覺得全晚最好味嘅

佢個汁真係好好味

Cream cake

呢度無論環境, 食物都好正
廚師會專登走出來同客人打招呼傾計
真係有賓至如歸嘅感覺

不過呢餐飯好似都食咗兩個幾三個鐘
食到有少少眼瞓

呢次又係一次唔錯嘅體驗
不過我決定下次去呢啲餐廳一定會著好啲!!

2016.11 大阪 {Day 3a} 大阪瘋食

2016.11.28 大阪 {Day 3a}大阪瘋食

返到來大阪嘅第一日, 一早起身就出去搵食

一直都好想試呢種梳乎里 pancake

今次來到大阪終於都試到

幸せのパンケーキ梅田店 (Tabelog 3.52分)

因為怕要排長龍, 所以我哋十點幾就去到

結果..平日嘅早上不用排隊, 直入

由於之後要去食拉麵, 所以我哋只 order 了一份 share

香蕉 pancake

pancake 好鬆軟, 又唔會太甜, 我哋覺得好好食 

有機會要再來食

另外再 order 了飲品

離開 pancake 店, 就去食正餐

らーめん 弥七 (Tabelog: 3.82分)

拉麵店開十一點, 我哋十一點幾去到就已經要排隊了

不過呢度好好, 係派籌制

職員會叫你大約幾點返返去

不過附近主要係民居, 無乜嘢行

有個公園, 不過唔太多設施

差不多時間就返去啦

 呢度拉麵款式唔多, 我揀咗醬油拉麵

麵條係我鍾意嘅粗身拉麵, 湯底唔會過咸, 好飲

整體都好食嘅, 但就唔會有想返食嘅感覺

蝸牛先生嘅鹽味拉麵

可能佢加了大量嘅蕃茜, 湯底有少少西式嘅感覺

蝸牛先生就覺得唔錯, 但我就比較鍾意傳統嘅醬油味

食完拉麵之後, 就開始我哋嘅 shopping 之旅

今日我哋行咗 EST, Hep five, 阪急

行到咁上下就返酒店小休同順便放低戰利品

返去之前先去超市買少少嘢食

松阪牛壽司, 味道都唔錯, 幾好

魚餅就普普通通

蛋糕 @五感 阪急百貨

蛋糕好鬆軟, 不過我就覺得甜咗少少

休息完就出去行埋 LUCUA

行到咁上下就坐的士去食飯啦

(梅田區都幾難截的士, 我哋最後要行返去車站附近先有車)

由於晚飯相太多, 所以要下個 post 再出..

待續.....

2016.11 大阪 {Day 2b} 大阪到著

2016.11.27 大阪 {Day 2b} 大阪到著

由於呢日落大落, 所以我哋只係去咗三個景點

離開とれとれ市場之後, 我哋決定提早返大阪

先去酒店 CHECK IN

今次住 Granvia Osaka, 地點超方面, 就在梅田大丸旁邊

CHECK IN 時, 職員撩我哋加錢 upgrade 間房

我聽錯咗 200 yen 一晚, 見咁抵當然 up 啦

 但最後 check out 時先發現原來係 2,000 yen 一晚

不過, 間房同張床都好大, 都算無白俾

第一日落機時喺機場用托運將行李先送來酒店

check in 完就叫職員拎埋比我哋

點知佢推咗兩個唔屬於我哋嘅喼出來

嚇到我以為啲件行李寄失咗

好彩只係職員拎錯

咁大間酒店, 估唔到咁失魂

喺房休息一陣之後就爭取時間出去行下

去咗我最鍾意行嘅 Tokyo hands

之後就去食飯

今晚 book 咗一間食蟹的餐廳

想食蟹但又唔想次次都食蟹道樂

於是蝸牛先生就喺 Tabelog 搵到呢間

香住 北由商店 (Tabelog 3.6分)

兵庫県美方郡香美町香住区若松691-3

呢度全日文menu, 全日文staff, 真係好難溝通

見到個外國人樣嘅staff 以為可以講英文啦

點知, 佢唔識英文的!!!!!

最離奇係我講日文單字佢都唔明喎~

不過, 好彩menu 有圖, 勉強都知係乜

呢碟蟹膏嘅前菜, 都幾好食

Order 呢碟嘅時候, 個鬼仔不斷依依哦哦唔知佢 up 乜

最後我哋估係因為呢碟嘢同上面佢送嘅前菜係一樣掛

魚生都幾新鮮

燒蟹腳

其實每人張枱都有兩支醬汁用來點蟹的

但唔知點解咁岩我哋張枱無喎

於是問個鬼仔拎啦, 但佢英文唔明, 日文又唔明

我哋指住 menu 入面堆醬, 結果佢幫我哋落多一碟

頂!!  好彩唔算大碟, 如果唔係真係食唔哂

個鬼仔領悟能力真係超乎常人!!!

無汁點嘅蟹淡而無味, 麻麻哋

成晚最正係呢條魚

蟹飯, 普普通通

牛肉壽司就幾好味

呢餐唔算好貴, 但味道偏普通

加上個鬼仔 staff 實在唔知想點

連最初指住隻有污漬嘅碗叫佢換但佢都唔明!!!!

(不過都真係第一次喺日本見到啲碗筷唔乾淨)

所以呢度唔多推介

離開之後喺街口見到間賣魚仔餅的

於是又買咗一件來食

我哋揀咗蕃薯味, 都幾好食

返到酒店就食士多啤梨

第二日嘅旅程就係咁完滿結束啦~

2016.11 大阪 {Day 2a} 白浜 千疊敷 / 三段璧 / とれとれ市場

2016.11.27 大阪 {Day 2} 白浜 千疊敷 / 三段璧 / とれとれ市場

一早起身望出露台, 白濛濛一片, 好大雨呀!

個心即刻灰咗一灰, 因為今日主要係戶外活動

不過都無辦法, 唯有希望食完早餐後會停雨

海舟嘅早餐係非預約形式的

只要喺特定時間去到餐廳就得

呢個安排我都幾buy, 因為去旅行要瞓到自然醒先至夠 relax 

呢度嘅早餐都幾岩我食, 因為熱盤多

我真係好怕晨早流流食咁多冷盤

其實早餐前有去貸切風呂嗰邊望下, 不過都係全full

食完早餐死心不息又走去望下

今次有位喎

難得有位唔理岩岩食完早餐都去浸

貸切風品有三個, 今次我哋浸石匠之湯

個風呂唔算好大, 不過有view

相信如果晴天會更靚

lobby 有免費梅子水供應, 浸完出去飲返杯凍冰冰嘅嘢都幾舒服

休息咗一陣打算返房

路經貸切風呂門口, 又八掛走去望下有無位

咦....又有喎

於是決定又走落去睇下

今次係梅香の湯

 都係大同小異, view 差不多, 所以我哋浸咗一陣就返房

check out 時間係十一點, 食完早餐, 浸完兩次溫泉都仲有小小時間瞓個覺

住下住下, 又覺得呢度幾舒服

check out 完雨都仲未停

喺 lobby 等咗陣, 但啲雨都係無細到

所以最後都係決定出發

下一站景點係千疊敷

由海舟行過去只係 around 十幾分鐘腳程

如果唔落雨都幾好行
兩人只用一把傘, 每人半邊身都差不多濕哂
好彩呢度有間物產商店, 即刻入去買多把傘

落雨之下嘅千疊敷完全唔覺得靚
如果唔係落雨, 都可能會走落去玩下
不過落雨就費事啦

逗留咗一陣, 之後就出發去三段璧

由千疊敷行過去, 都係大約十幾分鐘腳程

入面其實無乜嘢睇, 大約十五分鐘已經可以行完

行完岩岩好趕得切坐巴士去 とれとれ市場

依然係落緊雨

入面有乾濕貨, 無想像中咁大
撞岩有解體 SHOW
我覺得個刀手有點似變態佬

之後買咗少少刺身同海鮮去燒烤
(刺身係幾新鮮的, 不過燒烤就唔多抵)

蝦同象拔蚌我哋揀咗燒烤同刺身各一半, 呢度係半份
買嘅時候, 隻象拔蚌明明好大隻, 點知........出來得咁少

懷疑被騙, 左下兩隻螺係食唔到架, 入面好似石頭咁硬
無記錯仲要成 700 yen 一隻!!
其他海鮮亦唔覺得有咩特別, 唔怪得燒烤區剩係得香港人, 無日本人啦
(基本上好似九成都係香港人)
不過好彩我哋只係買咗好少嘢~

食完之後就坐的士去車站返大阪啦

返大阪要兩個幾鐘頭車, 岩岩又唔算食得好飽
所以決定上車前買多盒壽司醫肚
(早知喺とれとれ市場 買啦)

第二日 待續...