2018.10 北海道 {Day 2a} 定山溪賞紅葉

2018.10.28 北海道 {Day 2a} 定山溪賞紅葉

北海道早晨~

十月去北海道就係希望可以睇到紅葉

雖然十月底係有啲遲

但都決定去定山溪碰吓運氣

搵資料時見到好多人話紅葉季節時入定山溪會勁塞車

閒閒哋可以塞成幾個鐘

有坐長途車恐懼症嘅我當然係有啲擔心

於是我哋決定早啲入去

同埋...........坐的士

呢日大約八點就出發坐車

沿途交通順, 大約 45 分鐘就到定山溪

埋單七千幾 yen

今晚會住定山溪第一寶亭留

我哋先放低行裝喺酒店, 然後再出去四圍遊

之後就向住白絲瀑布方向行

沿途有個好大好大嘅公園

雖然好葉唔多, 而且仲開始轉黃, 但都好靚

睇到我同蝸牛先都好開心好興奮

我哋仲喺度打千秋, 玩搖搖板同食早餐

喺呢個公園都逗留咗差不多成個鐘, 影咗好多好多相

之後愈行愈天陰, 差不多行到白絲瀑布嗰陣仲突然落大雨

有少少狼狽, 但都阻唔到我哋向瀑布進發  (因為附近根本無瓦遮頭!!)

好彩行到瀑布又忽然細咗雨

我哋可以影返幾張到此一遊嘅相

之後沿途行返出去, 又開始無乜雨, 真好~

路經免費足浴場, 見無乜人於是又去體驗吓

浸完休息夠又繼續行程

點知蝸牛先生忽然話肚痛

(明明今早無乜食過嘢, 我懷疑岩岩浴足場踩過石春路觸動到某條大腸神經)

於是拿拿臨去搵廁所

行入觀光協會, 點知係無嘅

好彩見到不遠處有酒店

於是急急腳行過去

最後行到去定山溪萬世閣酒店, 順利搵到廁所

解決完後, 蝸牛先生又回復生猛繼續行程

我哋向二見吊橋進發

瘋狂影相後, 又到食飯時間

呢頭餐廳好似唔係好多

最後我哋入咗呢間清重鐵板燒

門口寫住推獎店, 應該唔會差掛

一推門入去, 入面無人, 而且有少少簡陋

伏味濃!  但已經唔好意思撇退

我哋分別揀咗一碗豚肉飯同牛肉飯

豚肉飯味道尚可, 但唔知點解飯嘅溫度只係微暖

而蝸牛先生的牛肉飯的味道就好"SO"

白白浪費咗一餐嘅 quota

一場來到定山溪, 就算紅葉已經滿開咗都想上豐平峽行個轉

出發前以為剩係自駕或巴士先可以去到

而巴士亦唔係全年都有

咁岩我哋呢段時間巴士已經無開

諗住放棄

點知頭先喺觀光協會比我哋發現佢哋有代 call 的士服務

由觀光協會坐的士去豐平峽停車場車資大約千幾YEN

落車之後要再轉電動巴士

雖然無乜紅葉, 但都比想像中靚

我哋又喺度影咗大量嘅相, 都幾好玩

相信呢度紅葉滿開會幾靚

雖然今次無緣, 但都幾好玩

走嘅時候去返售票處叫職員幫我哋 call 的士去酒店

 三點幾鬆啲就 check in 啦~

(續)

2018.10 北海道 {Day 1} 出發

2018.10.27 北海道 {Day 1} 出發

對上一次去北海道已經係 2014 年嘅事

當時係 5 月, 無花無紅葉, 其實都有少少悶悶

今次決定十月出發, 希望可以睇到紅葉

半年前就開始訂機票

當時見到一張直航的機票要成六, 七千蚊

為慳錢, 唯有買要轉機的, 但都要五千幾

一個月後再睇, 直航機票竟然變到四千幾一張

我計返, 就算我 cancel 機票要罰錢 (一張手續費 $900!!!), 都只係比我原本貴百幾蚊

但就可以一程飛過去

所以最後都係 cancel 再 book

出發前一個月, 北海道發生大地震

都有少少擔心

不過最後都係如期出發

喺機上睇咗 <黃金花>, 又幾好睇 

今次班機坐得唔係幾舒服

因為格離行個男人要湊b, 佢全程揹住個 b 企起身左搖右搖 

而佢個 pet 就喺我塊面側邊搖來搖去, 極騷擾!!

捱過四個幾鐘的機程終於到達北海道

今次過關出奇地快

但行李就等咗差不多半個鐘先有

之後就坐火車出札幌

今次揀咗車站上蓋的 JR Hotel Nikko Sapporo

地理位置真係超正超方便

當然價錢都唔平啦

不過因為岩岩發生完地震, 北海道政府為咗振興旅遊業, 於是向旅客派出訂房 coupon

而我幾過多番努力, 最後搶到近十萬 YEN  的 coupon  (偷笑)

房望出去嘅 view 超正

真係連去JR Tower 的時間都可以慳返

今次間望向南

欣賞完夜景, 拿拿臨落去叫酒店幫我哋打電話去餐廳 confirm 呢幾日嘅 booking

之後就去大丸買少少嘢食醫肚

book 咗九點食燒肉, 所以都唔敢食咁飽

休息陣就出去 Stellar place 行吓

差不多夠鐘就撘車去食飯

我地先坐地鐵去大通站, 之後打算再坐電鐵去東本願寺前駅

去到車站等咗陣發現下班車要成三, 四個字

望吓地圖其實唔係去遠, 於是決定行過去

焼肉 グルマンズいとう (tabelog 3.81分)

之前膽粗粗自己打電話過來訂位

當時明明留哂名, 但唔知點解去到佢話無我個 booking

(好沮喪, 我嘅日文真係仲未到家)

交涉完一輪, 最後佢都比我哋坐低食, 不過限時一個鐘

燒肉食一個鐘確係有點趕

不過難唔到我哋

坐低先研究一輪個 MENU (因為全日文)

最後 order 咗五碟加一碗飯

(其實四碟都夠食了)

食到超飽

肉味都幾濃, 味道唔錯, 值得再 encore

食完之後就行返去坐地鐵返酒店

第一日咁就完了

2018.05 首爾行 Day 4 Last day Seoul 落大雨

2018.05.22 Last day Seoul: 落大雨

最後一天, pancake 控終於出動

之前搵咗幾間比較受歡迎的 pancake 店

最後決定食呢間

弘大  Paulin pancake

呢間 Pancake 店其實唔係開咗好耐

當日我哋未夠十二點就去到

好彩仲有有位, 可以即入

再遲多十分鐘就已經無哂位啦

一份 pancake 兩個人 share, 然後再各自一杯飲品

我哋揀咗呢款清清的香蕉 pankcake

味道同質感都唔錯, 同日本食到的差不多 

(不過當然我都係覺得日本的幸せのパンケーキ 好味啲)

好彩無揀錯~

食完之後就喺弘大最後衝刺
呢度啲衫真係好鬼抵, 件件都百幾二百蚊有交易
最後都執咗幾件衫同兩條牛仔褲返去

行到咁上下要去食個正正經經嘅 lunch
雖然蝸牛先生麻麻哋人參湯飯
但因為我鍾意, 所以佢就陪我去食
(蝸牛先生真好~)

百年百歲蔘雞湯

呢間網上都有好多人推介
之前有人講過話佢份量好大, 可以兩人share 一碗
但似乎係唔得的
兩個人入去, 係要 order 兩碗的

鮑魚人參雞湯
我好鍾意人參雞湯, 相信冬天飲的話, 感覺一定好正
不過真係好大碗, 最後飲到好飽好飽
(其實應該有味精, 我記得之後都有啲口渴)

黑蒜人參雞湯

黑蒜味太搶, 我比較鍾意普通版的人參湯多啲

但蝸牛就話覺得有黑蒜好飲啲

食完就再繼續行弘大

點知行行吓開始落雨, 仲愈落愈大

最後行多陣就返酒店

而蝸牛先生就去外賣雪濃湯帶返香港

雖然今次飲完無上一次咁驚喜

但都依然覺得幾好飲

同埋佢啲泡菜好好味

後悔無買多幾盒返香港

喺酒店執拾吓, 見無乜嘢做就決定早少少去機場

7:45 機, 我哋三點就出發去機場了

今次住弘大, 可以直接行去坐機場鐵路

不過其實都要行成十幾分鐘先去到月台, 好彩我哋行李唔算多

由於弘大係中途站, 所以無位坐

以為去到金浦機場會好啲, 點知都係無乜人落車

最後, 企咗成個鐘終於到機場

蝸牛先生習慣要食飽飽先上機

T2 呢面感覺比 T1多嘢食

最後蝸牛先生揀咗食呢個

之後就去退稅

T2 呢邊又係無乜人, 而且自助退稅都好方便

退完稅又忙住要去樂天DUTY FREE 拎貨

跟住就結束今次四日三夜的首爾之旅

首爾, 唔知幾耐之後我哋先再見啦

2018.05 首爾行 {Day 3} Celine 控

2018.05.21 {Day 3} Celine 控

今日去食醬油蟹
喺弘大坐的士過去, 又係兜咗好遠路
又上山又落山, 我差啲以為被賣豬仔
如果再去韓國, 下次我一定會拎單, 然後再記低司機資料, 哼!

大瓦房
網上見到好多人都激讚
原本打算 book 位, 點知店方話唔接受外國人預訂

去到大約十一點鬆啲, 無位
好彩只係等咗十五分鐘就有位

order 完餐就會送上小碟

雖然醬酒蟹出名

但我玻璃肚唔敢試

蝸牛先生怕一個人食唔哂, 所以都無叫

最後佢叫咗醬蟹拌飯

我試咗少少, 覺得好鮮甜, 好味

蝸牛先生清哂

鰻魚係另一款出名的食物

雖然無醬蟹咁標青, 但都好味

跟餐有碗湯 (無出到鏡)

我覺得好好飲

呢餐好滿足

雖然又係好多港人, 但味道真係唔錯

食完就沿途行出去, 路經見到個地方幾得意

又入去行吓影吓相

買完入場劵都無留意呢度係景福宮

(直到行完行去車站見到係景福宮站先知)

入面都幾大, 但行來行去嘅感覺都差不多

離開呢度之後, 就向明洞出發

其實今次嚟韓國除咗係想食韓牛之外, 仲想去Celine 朝聖吓

出發之前已經喺香港睇中, 不過價錢太貴所以無買

而韓國買就可以平兩, 三千

咁當然都要去睇吓

我哋去咗新世界百貨

先去佢嘅 Duty free, 不過無我想要的款

之後落 shop 八掛吓

有喎, 雖然唔係我原本睇中嘅色

但試完之後又好想買, 雖然比香港平, 但都係好貴

之後蝸牛先生話同我去飲杯嘢冷靜吓先

掙扎完一輪, 最後都係........

財散人安樂, 之後行程去邊都無所謂了

喺附近行多陣就出發去食晚飯

今晚去食海鮮鍋, 地方有點遠

由明洞坐地鐵過去大約要九個字

 八八海鮮鍋

我哋六點鬆去到, 竟然岩岩好無位, 要等

原來韓國人興咁早食飯!!

最後都等咗大半個鐘

我哋 order 咗一個小size 的海鮮鍋 (夠2-3人食)

個鍋上枱時真係好澎湃 

入面有唔同嘅貝殼類, 有蝦, 有帶子, 鮑魚, 魷魚, 仲有半隻龍蝦

除咗貝殼類外, 食之前會有OPPA 幫你將啲海鮮剪到入到口嘅 Size

所以呢個鍋係可以好優雅咁食的

材料全部都好新鮮, 只係貝殼類太多, 食食吓有啲厭

去到中段其實都已經開始飽, 不過一定要追加麵

雖然只係方便麵, 但個麵吸哂海鮮的精華, 真係好正

(而加見到都想食)

食飽之後就搵的士去永浦登 e mart (超市)

今次發覺韓國都幾難搵的士

等咗好耐先有車

呢間超市雖然比首爾站的樂天超市細

但基本上想買嘅嘢都會有

而其實而加韓國零食喺香港都好易買到

所以係咁倚掃少少返去就夠了

離開超市, 有人話今晚嘅宵夜想食cake

記得酒店附近個商場有間賣 cheesecake 的, 就帶蝸牛先生上去

(去完 cake shop, 有人又要去air jordon 店巡視吓, 不過今次都係無買)

cafe C27 CHEESECAKE & COFFEE @ 弘大 K Square

雪櫃有成十幾廿款, 超多!!

之後上網睇返, 原來呢間都係人氣蛋糕店

兩人share 一件, 應該唔會太邪惡掛

件 cake 都唔錯, 唔會太甜

芝士味濃, 但又唔太感覺好漏

如果有機會, 下次都想再食

食完就要執行李, 明天返港了

2018.05 首爾行 { Day 2} 嘗 米芝蓮韓菜 [羅宴]

2018.05.20 {Day 2}嘗 米芝蓮韓菜 [羅宴]

今日 book 咗餐廳食 lunch
出發之前先去唱錢, 不過弘大無明洞咁多找換店
而且 rate 又無咁好
不過我哋手上現金唔多, 唯有焗唱
行來行去, 最後終於搵到網上多人講的 Travel depot
預計今日都會去明洞, 所以唱住少少先

唱完就坐的士去餐廳啦
我哋坐咗好耐的士, 同 google map 預計的車程遠咗一半
我估應該被兜路了!!
後來發現其實係有渠道舉報不良司機的
(詳細按呢度)

今日食 lunch 的地點: 羅宴 @ 新羅酒店

由於呢度係米芝蓮三星 + 雙宋都係喺呢度結婚
所以我哋嘅期望好高

坐低就有兩碟"前菜"

薄脆: 無乜味道, 但得閒食兩啖又幾好食

紅棗亁: 呢碟我好欣賞, 甜甜哋又脆脆哋, 有啲後悔無問佢有無得買

request 咗窗口位, 有 view 睇吓都唔錯

蝸牛先生order 咗一 set tasting wine

呢度的食物同一般的韓國菜唔同

味道比較清淡, 唔會好濃

由於唔算特別好食, 所以無下次想再來的感覺

一生人, 試一次就夠了

網上睇人哋呢個飯以為好正, 點知食落味道只係普普通通

無乜味, 太清

反而甜品我覺得幾好味

嗰杯糖水都唔錯的

食完就出去欣賞吓風景

當日雙宋就係喺呢個花園完婚架啦

跟住就行咗過隔離的 duty free 兜個圈

入面好多大陸人, 所以無乜特別都係走先

之後就坐返 shuttle bus 出去東大入口站再轉地鐵去明洞

明洞其實都幾多嘢行, 只是人太多

有人又去買雪糕

行到咁上下又出發去食晚飯

今晚要去搵我朝思暮想的韓牛

今晚目的地係大都食堂

又係坐咗一架行咗好耐嘅的士

可能時間尚早的關係 (六點鬆), 去到唔駛排隊

好緊張!  

上次喺馬場洞食完韓牛後就一直念念不忘

今次轉場試吓呢間都多人推介的食堂

全店只有一個餐 (入面有不同部位), 所以坐低後係唔駛點餐的

不過兩個人食一大盤, 其實有啲漏

加上全晚就只有牛, 食食吓有少少唔想再食落去嘅感覺

下次都係想去返馬場洞, 或揀啲有其他肉嘅鋪頭會好啲

其實最後仲可以追加蘿蔔泡菜炒飯的, 但已經食唔落所以就無要了

不過見到隔離個飯又好似幾正, 無緣~

食飽之後去咗東大門
雖然有好多商場, 但唔係個個都岩行
有啲 MK feel 唔太想行, 有啲就純批發太花多眼亂
只有樂天fitin 係感覺好少少

行完都成九點幾十點
今次我哋坐地鐵返去
返酒店前去買炸雞做宵夜

TwoTwo 炸雞 (弘大店)
雖然唔肚餓, 但一場來到韓國又想試吓炸雞
酒店附近有間 TwoTwo 炸雞店
一於買盒返去試吓

入面大半間店都係港人, 好誇張
外賣等咗差不多十五分鐘

諗住呢間咁出名諗住實好食啦
點知........

雞唔入味, 而且唔滑
失望~

食完炸雞仲要食岩岩東大門買的士多啤梨

(好紅好靚, 點知得個樣, 麻麻哋)

真係飽到上心口