2014.05 - 北海道遊 {Day 9} - 小樽

今日我地出發去小樽
札幌入去好似一個鐘唔駛


到步後先去車站旁的三角市場行一圈
地方唔大, 主要賣蟹, 海膽同元貝


之後就去搵食啦
猶豫緊去政壽司定旭壽司好
最後都係揀0左旭壽司


呢餐超級期待呀!
因為據聞小樽好出名食魚生, 而好多旅遊書都有介紹旭壽司

MENU 好吸引, 樣樣都想食, 但無咁大個胃


蝸牛先生揀了壽司 SET
剩睇樣, 唔覺得好新鮮
蝸牛先生的食後報告, 都係話唔夠釧路和商市場食到的咁鮮
噢!  太令人失望


我的魚生飯
唔好以為大碗, 其實只係碗太細
海膽, 超散超碎, 而且色水都唔太靚
蝦同帶子又唔算好新鮮
勁勁勁勁失望呀!!!

呢兩碗0野都唔平, around 五百蚊碗!!!
一心諗住一場來到要食好0野. 點知根本就唔值!!


唉.......哂錢唔緊要, 最唔抵係哂0左個胃口...........

沿途周圍行下
一場來到北海道, 無理由唔食蜜瓜 (其實仲想食燒海鮮, 不過食唔落啦~)
可能未係時候, 唔算好甜


中途去了 LETAO CAFE 休息
呢件 cheese cake 都幾好味


熱朱古力都好好飲


休息完就去 LETAO 同 六花亭買手信 (其實可以留返0係機場 OR 百貨公司買)
黃色盒蛋糕好食, 隻茶包都唔錯, 茶味好香


就係呢款蛋糕, 之後我地都買0左一盒自用




跟住, 有人又心思思想食雪糕


我無佢咁好胃口, 所以剩係叫0左杯茶


之後拎住大包小包行去運河
可能未到夜晚, 條河無想像中咁靚
本來蝸牛先生有興趣坐小船遊河
但我就麻麻...所以最後都係無坐到

本來又有諗過去天狗山睇夜景
但又覺得攰攰地....所以最後都係唔去

臨上車前去三角市場買0左盒海膽返酒店食
但究竟係咪我地咀刁, 又或期望太高
點解食唔出鮮甜的感覺?!
(但當然質素比香港食到的好)

小樽比我想像中少0野玩, 唔算特別靚
魚生亦無傳說中咁鮮甜肥美 (定係我地唔識揀呀?!)
但如果有機會再來的話, 我都想試下呢度的燒海鮮同燒粟米

返到酒店休息0左一個鐘

之後諗住落大通的 TOKYO HANDS 逛下

我地選擇行落去

沿途見到想入的鋪頭又走入去望下

行下行下......忽然驚覺原來已經八點

人家已經打佯了........失望~ 

其實今次我 miss 0左好多次去 Tokyo hands 的機會

第一次0係 outlet, 走0左先知原來入面有

第二次係前幾日, 又係走0左先知原來 Tokyo Hands 0係大通

而今日已經係第三次了!!!

證明我0地真係好無緣

之後就去搵飯食

我想食燒肉, 居酒屋之類

去到一間都多人推薦的牛乃家, 不過無位, 店員話要最少要等一個鐘喎

跟住去另一間, 佢就話只招待日本人 (明明有台灣 blogger 介紹)

最後去0左旅遊書介紹的 串鳥 食串燒

可能今日係星期五, 呢度都要等位, 不過 AROUND 十分鐘就有位

味道中規中矩, 勝在價錢相宜

但就唔 like 呢度唔係禁煙, 煙味好大呀!!

食飽飽就返酒店休息~

2014.05 - 北海道遊 {Day 8} - 大通，貍小路，札幌

之前有 4D3N 道東郊外遊 (睇景)

今日就開始 4D3N 道央市内遊(shopping， eating n shopping)

第一個目的地係札幌市内米其林三星拉麵店

一粒庵

札幌地下鐵 23 号出口，一出轉右就是停車埸，旁邊有個落地庫的入口，落一層就到

據聞呢間係長龍拉麵店

我哋喺佢開門前十五分鐘就到

結果，我哋排第一，heehee...

跟蝸牛先生同樣點了 元氣拉麵 (160g) + 半熟蛋

湯底: 有少少似味噌，唔會覺得好油，好飲

拉麵: 軟硬度適中

叉燒: 麻麻，太乾，少硬

半熟蛋: 真係好流心

佢的配料除咗有葱同芽菜外，竟然仲有炒蛋

本來擔心有d 唔夾，但咁多樣嘢夾埋一齊食又幾 ok

我同蝸牛先生都好鍾意呢碗拉麵

呢度真係幾 full, 開門唔夠十分鐘已經滿席

建議想試的朋友早少少過來

醫飽肚就進行我哋第二個任務， shopping

首站: Beams, 我同蝸牛先生都有收獲

之後就行下百貨公司, 大通 同 貍小路

今日收獲都唔錯呀!!

(不過今日買到的全部都係 DISPLAY....umm.....又會咁岩全部都 last one, 太奇怪!!)

中場休息, 在 PRACO 樓上隨意找了一間餐廳

蝸牛先生被 "甜品放題" 吸引住

JPY1,420/人, 其實都幾抵

入面的款式都算多, 有甜品, 飲品同熱食

不過我地唔太肚餓, 所以食得唔多

餐廳裡面差不多清一色係女仔

哈哈, 蝸牛先生有點唔好意思, 唔太敢出去拎0野食

其中有一轉佢出去拎cake, 但唔知點解個服務員0係度忍笑

攪到蝸牛先生好尷尬, 哈哈!

食物水準一般, 唔太差, 勝在價錢平又坐得舒服

食飽之後再去併過!!

今晚會在札幌站附近食晚飯

見時間差不多就慢慢散步返去

沿途行下大通公園, HEA 下休息下

不過無想像中咁多0野睇, 只係普通公園一個

本來打算返酒店放低0野, 但最後都係趕唔切

但就夠我先去富澤走一轉 (hehee...)

貨就無乜特別, 款式都係同香港差不多

但我就發現, 呢邊的貨食用期限比香港買到的長好多!!

(肯定係將 d 就快過期的貨運0黎香港賣啦~ 太過份!!)

今晚我地去食法國菜

係位於 JR Tower hotel  nikko sapporo 入面的 Mikuni

入面格局有點高檔

但我倆今日都著得很爛, 哈哈

加上我倆死0靚仔的外貌

好似跟呢度格格不入

我地一個點果汁, 一個點茶 (旁邊的人都係點酒........)

侍應好認真地成支果汁/茶拎過來比我地睇完先再倒入杯

感覺有點攪笑 (心諗, 酒就話睇下0者, 果汁睇乜鬼)

不過我呢杯唔係普通的茶, 佢的名堂係 Royal blue tea

呢一小杯要成千幾 yen 架!!!

茶味的確幾濃, 但就真係太太太貴!! 

圓波波物體味道有點似魚柳包

我唔太餓, 所以點了最平最少道菜的餐

蝸牛先生眼闊, 點了最豪最多道菜的餐

味道未去到 "叮" 一聲

印象最好的係鵝肝

其餘都係中規中擧

去到尾聲, 上了好多款唔同的甜品

好精緻, 但味道就普普通通

呢餐由 八點食到十點幾, 食到有點眼瞓

可能期望太大, 呢餐有少少失望

今晚返酒店有 "禮物" 收

今日又係攰爆~

2014.05 - 北海道遊 {Day 7} - 双湖台，摩周

一早起身浸多次温泉

尋晚0係公眾浴場拎0左支鮮奶

浸完就去食早餐

照舊 book 咗8 點

落到去早餐已經準備好

又係放到一枱食物，超級豐富

早餐反而無晚餐咁有驚喜

不過都好好味

魚子超鮮甜, 另外燒帶子同魚都好正

見今日天色好好，食完早餐我哋又去遊湖

藍天白雲下的阿寒湖真係好靚

酒店外貌

沿路行出去愛奴村，買咗小小記念品

之後就趕返去check out, 有少少唔捨得

鶴雅鄙之座無論食、住都好正

絕對值得推介

今日我哋包了一架的士遊摩周，双湖 [神秘の湖、摩周湖を望む旅路]

四個鐘 JPY14,000 (有指定路線)

鶴雅別荘 鄙の座～阿寒湖半・阿寒湖温泉～阿寒横断道路～双湖台～弟子屈～摩周湖展望台～硫黄山～川湯温泉

其實原本打算撘觀光巴士的 (http://www.akanbus.co.jp/)

但原來weekend 先有

由於酒店已book, 唔可以調行程

所以最後唯有包的士

在 website online 預約, 佢有指定路線, 亦可自己更改行程 

基本上, 半個鐘內就會收到佢地 email 報價, 效率好高

https://www.humanvehicle.co.jp

司機好準時到達鶴雅

好彩佢識少少英文，再加埋身體語言，大家總算溝通到

原本以為佢只係司機，但原來佢仲係導遊 + 攝影師

出車無耐佢就停車話要出去幫我地影相

(感覺有d 似影結婚相，佢一時叫我哋望呢面嗰面，一時就話自然 d 唔駛望鏡，笑c)

佢好有心，自備大相機之餘，仲有 memony card

哈哈，佢叫我哋喺非誠勿擾張poster 前面影，攪笑！

之後沿途佢會對景點作少少嘅介紹

又請我哋食雪糕同温泉蛋

最開心係加插咗去牧場的路線

望住一大片草原，仲有牛同馬，好得意

沿途的景色真係好靚

好聰明的食蛋方法

最後喺川湯温泉駅落車

原本我哋打算比 tips, 但佢唔肯收

我同蝸牛先生都好滿意呢四個鐘的旅程

用後感: 如果想去偏遠地方但又唔想自己渣車, 包的士真係一個幾好的選擇

不過就每個景點唔會逗留太耐, 走馬看花

另外, 自訂行程會比指定行程貴大約五, 六千 yen

今次雖然我地揀了指定行程, 但都去到我地想去的地方

全程舒服好玩, 我同蝸牛先生覺得幾抵玩

川湯駅附近的景色都幾靚

之後在站内餐廳醫肚

Suite de baraques cafe

咖哩飯，正宗的日式咖哩味道

牛肉飯，我覺得味道有點“ so"

食飽就要坐七個鐘的火車返札幌

16:29 川湯温泉 ~ 16:50 摩周

17:29 摩周 ~ 18:50 釧路

19:00 釧路 ~ 23:10 札幌

  

由川湯去釧路，坐嘅係冇冷氣 JR, 好原始

車上雖然有風扇，但吹出來的風是熱的

以為第二程可以轉車

但原來都係坐返呢架"熱車"

而且仲要等半個鐘先再開

好不容易終於捱過咗個半鐘

(呢程車的行程, 同前一日釧路濕原號的行程一樣, 早知唔哂時間去坐啦)

最後一程車係釧路返札幌

諗住坐大車會好D

點知架車好似冇開冷氣，又熱又焗，有少少想暈

去到最後一個鐘，終於都 feel 到有 dd 風

坐長途火車真係好辛苦

我覺得仲辛苦過坐飛機 (可能因為太焗)

車上便當, 味道麻麻

返到札幌已經十一點多D, 真係超攰!!

4 日 3 夜的道東之旅完了

明天開始另一個 4 日3 夜旅程

都會行 [札幌 + 小樽]