2014年6月15日星期日

2014.05 - 北海道遊 {Day 5} - 道東之旅第二站: 釧路

呢日好早就起身
就是為了享受多一次我哋的私人風吕
尋晚落過雨, 涼涼地,好岩浸溫泉

浸到八点鐘就落樓下食早餐
通常溫泉酒店的早餐都特別豐富 (誇張)
今次都唔例外
早餐分洋式同日式,我哋揀了日式

不過尋晚肚痛,所以今早我都唔敢食太多
我主力食粥,蝸牛先生就乜都試,乜都食


呢個豆腐超清淡, 以我今日的狀態, 好岩食! (正常人就應該唔係幾岩)

呢兩條魚都幾好味


早餐明顯比晚餐岩我哋胃囗
除了每人一set 外
出面仲有牛奶,果汁,生果,沙律任食

最後的餐飲 & 生果


明明 order 了玉子燒,卻來了煎蛋
日式早餐配煎蛋,感覺怪怪

食完早餐就返房收拾行李
之後坐 shuttle bus 回带廣

今日得 4 度咋, 好凍~

我哋對三余奄的期望都好高
但入住後覺得無論房入面的私人風呂同膳食都比唔上上次的箱根吟遊
雖然佢都唔算差, 但就覺得唔值呢個價錢, 失望!!

離開三余奄
本來想去牧場, 不過天陰陰好似想落雨, 再加上我0地搵唔到去牧場的巴士
所以最後打消咗念頭,留返喺带廣行街 

先去車站放低行李喺 locker (JPY300)
哈哈, 塞到個 LOCKER 勁 full

之後就去改車飛時間 (今日會出發去釧路, 行程調動關係, 決定提早出發)

跟住就去返尋日間鋪頭 {Amatati & Amati kkozawa.co.jp} 買煲
途中見到六花亭, 入去買左小小蛋糕同朱古力試食

包裝袋好靚

鍾意佢有得散買, 可以試多幾款
基本上, 所有都好味, 可以放心買來做手信

鋪頭入面有幾張小枱, 方便客人買完即食
仲有免費熱咖啡供應, 好大方



跟住就去買煲
想買牛奶煲好耐喇
好開心終於買到,真係好靚~
原本見佢標價 JPY5xxx, 點知收錢時只收 JPY3xxx, 感覺好抵!!
不過........幾日後就 dum 心口 (請留意之後的 blog)

離開呢度, 見仲有時間
蝸牛先生提議去 緑ヶ丘公園

由於路程唔近, 我0地決定坐的士過去 
最後落車 JPY8xx, 尚算可接受

公園冇想像中咁靚,似香港的行山徑

行0左一陣, 我0地決定轉場
真鍋庭園睇花
睇地圖同呢度距離好近, 於是我0地又坐的士
等咗好耐先有的士,呢度真係好荒蕪!

其實我0地剩返的時間唔多 (一個鐘都無)
猶豫緊仲去唔去之際, 忽然又有的士

以為好近,点知我哋坐咗好耐的士呀
(佢個錶每跳一下, 我0地個心亦都狂跳)

上車冇耐司機就問我哋來自邊度
佢感覺怪怪的,一邊揸車一邊同朋友傾電話,笑騎騎的,又聽到佢 up HK
覺得佢好似笑緊我哋戇居咁 (又懷疑佢係咪兜緊我0地路)
落車時佢主動話0係度等我地, 之後車返我地去車站
我0地怕陣間難截車, 所以就話 OK

入場費都唔平, JPY800 (around HKD60)
旅遊書影到呢度好靚
但我0地入到去又覺得唔太特別
加上我0地時間唔多, 可逗留的時間得 30 分鐘
胡亂行0左一陣就出返去

上返怪司機的車, 佢依然係同人傾電話, 依然係笑騎騎, 感覺好奸!!

今日仲未食過正餐
打算買多次豚丼上火車食
去到先知佢今日休息
唯有去第二間
行0左幾步, 司機又0係後面指我0地去前面
(其實真係溝通唔到, 唔知佢想指我0地去邊)
最後我0地都係搵返旅遊書介紹的

呢間係老字號


買完就急急腳返車站, 呢幾日真係時刻都要同時間競賽

帶廣再見喇~

14:23 帶廣 --> 15:58 釧路

由離開溫泉酒店到而加上車, 原來只得三個鐘
但我0地已經去0左咁多地方, 唔怪得我會覺得攰啦

上車急不及待開餐, 由於要留肚, 兩人 SHARE 一個

豬肉比元祖的鬆化, 不過味道就唔及佢好味
但整體我覺得都幾好, 唔錯!!

釧路
而加睇返呢張相, 覺得呢度有少少大陸 Feel

落車後先去酒店 CHECK IN
今次我地揀了在車站旁的 Super hotel
貪佢方便同平, 一晚才 JPY7,180
一入房, 嚇親, 點解咁似青年宿舍, 哈哈
感覺好攪笑
雖然房勁細, 但設備又好齊全
空氣清新機, 暖爐都有
Lobby 有唔同款式的枕頭任揀 (不過我地就懶得去揀, 用返房入面的就算)
女士有禮物送 (mask, 沐浴套裝等等, 總之可以揀五樣)
地下有溫泉 (每次限一人入去) , 朝早有早餐
幾百蚊真係幾抵住 
不過住一晚都可以接受, 要住多晚的話就真係唔太 good
(因為實在太細, 床又唔太舒服)

0係酒店休息一陣, 又出去探險
第一站: 和商市場
蝸牛先生朝思暮想的北海道新鮮魚生
今日終於都食到
呢碗就係和商市場好出名的勝手丼
先去買一碗白飯 (有幾種size 的)
之後再去鋪頭揀自己想要的魚生
魚生係續塊計錢的
價錢唔算平, 但勝在新鮮

可惜前一晚我肚痛丫, 所以唔敢試
蝸牛先生就話好新鮮, 好好味

市場入面乾, 濕貨都有, 有少少似築地
但築地的規模就大d

之後行去幣舞橋
不過我0地行錯路....最後又要走返轉頭
 沿途超凍超大風
今日天色好差呀!!

條街又係無人的

漁人碼頭 Moo 出面有間幾得意的爐端燒
見到入面主要食燒海鮮
不過我0地今晚 book 了另一間, 所以無試到

呢個就係 漁人碼頭 Moo 商場入面, 感覺好大陸

0係度坐低休息0左一陣就出發去食晚飯

釧路係爐端燒的發源地, 難得來到呢度, 點都要一試
本來 book 了 20:00 食飯
不過無其他地方去, 所以最後我地早0左一個鐘去到
但入到去又係溝通唔到, 見反正有位, 就坐低0左

呢間係好多台灣 blogger 推介的爐端燒  {炉ばた}

婆婆係鋪頭的生招牌
不過唔係所有食物都由佢燒
所以佢都唔算好忙

我地坐正婆婆的對面, 全晚望住佢燒
點知比我地見到, 佢似乎唔多衛生
例如, 處理生同熟的食物係用同一對筷子
甚至夾過炭的鋏又用來夾食物!!!!

唔算太肚餓, 所以食得唔多

食物味道其實唔錯的

前菜


呢碟露筍好味, 有陣陣的奶味

大蔥豬肉串
個汁同豬肉好夾

燒鰻魚 
鰻魚都燒得好味

燒銀雪魚
好味, 只係咸0左少少

燒帶子
呢碟普通

走的時候開始落雨了
由於太攰太凍, 我地決定坐巴士返酒店

呢日又係好攰
沖完涼就即刻瞓覺了


10 則留言:

  1. 整条街没人是因为傍晚了吗? = =

    那个小玻璃杯里放的是salad?

    回覆刪除
    回覆
    1. 係乳酪...
      唔知啊, 北海道的街上, 經常都係無人的

      刪除
  2. 未到lunch time睇晒你個post而家好難頂!!hhaha...日本果然好多美食, 尤其個早餐等於我地既lunch, 又大份又多選擇又精緻!我而家真係好肚餓=-=

    回覆刪除
    回覆
    1. 呢個故事教訓你, 返工時切忌遊blog...haha

      刪除
  3. 爐端燒似乎唔錯呀~~~ 一日內去了這麼多景點~~ 其實司機冇騙你們的車資嗎?~

    回覆刪除
    回覆
    1. 其實我地唔知佢有無兜路呀...不過真係比想像中遠左好多

      刪除
  4. 正呀~ 帶左我去轉日本喇😂
    牛奶煲好靚呀。

    回覆刪除
    回覆
    1. 個煲我都好鍾意呀, 之不過..........(之後出blog 講)

      刪除
  5. Mr. and Mrs. Snail:
    ~個日式早餐, 真係好別緻, 真係日本人先咁細心,咁樣準備!!
    ~依日,你的行程都幾豐富!!

    回覆刪除
    回覆
    1. HAHA..係呀, 而加睇返都覺得攰...
      日本人真係好細心, 而且包裝好好

      刪除