2018.04 女子東京一人旅 {Day 3} 最後一擊

2018.05.02 女子東京一人旅 Day 3 最後一擊

本來計劃今日去睇紫藤花, 之後就去合羽橋睇廚具
或者係太心急想睇廚具
結果, 上到地鐵先發現唔係去緊紫藤花嘅方向
今次又無緣喇, 有機會一定要去睇

由涉谷去合羽橋廚具街都算方便
坐銀座線直去到尾, 而且因為係頭站, 仲有位坐添
車程大約半個鐘鬆啲

落車行無耐就進入道具街喇

感覺其實有少少似上海街

可能期望太大, 我覺得無想像中咁多嘢睇

行吓行吓見到睛空塔
又走入條巷仔影下相

跟住行咗無耐忽然覺得肚痛

死火, 附近唔覺眼有商場

好彩比我見到不遠處有間酒店

唯有行入去搏吓有無得借廁所啦

入到酒店大堂, 見到廁所好近門口, 放心哂

9秒9就沖入廁所 (仲要個廁所好大好乾淨)

入到去, 咦.....點解有個男清潔員嘅?

但由於太急, 所以我無理佢就即刻沖入廁格

到攪掂完洗手時都仲見到佢喺度清潔緊

但奇怪地佢又對我若無其視喎

離開洗手間時專登再望多次個指示牌

無錯喎, 真係寫住 Woman 架喎

但點解入面會有男人架?!

不過, 反正都已經舒服哂, 都係唔理佢快快離開算喇

之後繼續行, 心大心細想買個麵包模

但又覺我要拎住全日好重

最後結果都係無買

剩係買咗少少嘢

因為我見唔到廚師頭地標

我一度懷疑自己去錯地方, 所以先咁少嘢買

最後發現原來就喺入口的對面

離開呢度就出發去東京站

首個目標係 New York perfect cheese 嘅芝士餅

我十二點半去到, 點知已經全部 Sold out 啦

好失望~

今次無緣, 希望下次去東京有幸再食

跟住就去東京站間郵局寄 postcard
網上見人話呢度好大
我完全唔覺得囉
不過 postcard 比其他郵局多就真嘅

成朝剩係食咗個包, 寄完就拿拿聲去搵食

本來想試吓根室花壽司

點知又係大排長龍

最後揀咗呢間食牛舌的

伊達の牛たん (tabelog 3.44分)

誤打誤撞入咗來食, 味道都幾唔錯

食飽之後喺東京站行咗一陣, 發覺唔多岩行 (感覺實在太高級)
於是轉戰新宿

行咗 NeWoman, Lumine, Lumine East
真係行到腳都跛

中途路經呢間銅鑼燒專賣店 DOU
又買咗件來試
我覺得太甜

因為手上太多戰利品同埋實在太太太攰

所以行埋Tokyo hands 就決定返酒店

臨離開新宿

打算去買Flipper's 件新出品來試

唉....點知下一 ROUND 要待到8 點先再有

仲有一個鐘

加上鋪頭喺車站入面 (我仲要搵咗好耐行咗好多轉先搵到佢)

一個鐘嘅時間都唔知可以點消磨

唯有又等下次啦

新宿南車站呢邊有個小小的賣手信地方
除咗拌手禮外, 仲有少少熟食
太想食壽司, 但今朝先肚痛完
唯有買呢個蟹肉魚籽飯返酒店食

本來對車站的食物無乜大期望
但估唔到呢個飯都唔錯

食飽又休息夠之後
最後一晚決定去酒店附近的超市行吓

Life 超市澀谷
賣的貨物比較平民化
唔算特別大, 但貨品都幾齊

入咗少少貨就返酒店
沿途見到有間食烏冬的
(發覺其實呢邊都有幾間唔錯的食店, 原來呢間酒店的位置都唔算太差)

好, 一於聽日 Lunch 來試

返酒店再食埋第一晚買嘅甜品
比起嗰杯朱古力, 呢個反而無咁好味, 因為呢個好甜

四日三夜的一人旅
無驚無險終於都來到最後一晚
好彩呢幾日都尚算順利

2018.04 女子東京一人旅 Day 2 {日本剪髮初體驗}

2018.05.01 女子東京一人旅 Day 2 {日本剪髮初體驗}

女子一人遊, 除咗行街 shopping 之外, 梗係要去扮吓靚啦

出發前, 好大膽地 book 咗剪頭髮

希望可以變身做架妹 (haha)

我係喺Hot pepper beauty 度 book 的

預約過程好簡單

可以先揀款式, 又或先揀地點

因為當日想去自由が丘

於是就先從地區著手, 最後揀咗 Heaka AVEDA 自由が丘

揀佢係因為見到有我想剪嘅髮型

約咗 10:30 , 我十點就到達自由が丘

未夠鐘就先喺附近的 Tokyo hand 行住先

又去超市買個包

由於髮型屋都算近車站, 所以我好快就搵到

到達髮型屋後, 口哂震咁用我嘅爛日文同人講我book 咗今日

之後佢就帶我坐低

再有毛巾同茶, 又放低幾本雜誌

其實當時我係超級緊張, 好驚溝通唔到

跟住髮型師就嚟問我想點剪

出發前一早溫好哂書, 於是拿拿聲將我嘅願望一次過 up (背) 哂出來

好彩, 最後佢都明我想點

up 完終於舒一口氣

(老老實實, 如果完全唔識日文, 真係會唔知佢想點的)

剪嘅期間, 都有少量的交流

(終於搵到個練日文的機會)

搽好染髮劑後, staff會問你想飲乜, 之後再送一個手部按摩

整個過程真係好舒服

我覺得喺日本整頭髮係絕對會上癮的

染加剪用咗兩個鐘

最後髮型師同我 set 咗個好誇張嘅頭

casual look 嘅我, 感覺有少少奇怪

(變返正常後, 個頭都幾好睇嘅, 唔通我幾個月要飛一次日本整整個頭?!)

埋單 $14,xxx yen

呢個價, 我相信香港的 Aveda 一定做唔到

好彩我無因為淆底而唔嚟

今次真係一次好好的體驗

離開之後, 就去 Cuoca 朝聖

不過懶得拎, 所以都唔算買咗好多嘢

中途買咗呢杯果茶都幾好飲

由於已經開始肚餓

所以喺自由が丘唔係逗留好耐就離開了

下一站: 二子玉川站 高島屋 

之前 search 過高島屋上面有好多好食嘅餐廳

望完水牌後決定食炸豬扒

惠亭 (tabelog 3.54分)

貪心的關係, 所以點咗一份有蝦有豬的 set

味道就普普通通, 但都唔會太差 

其實喺日本一個人食飯唔會覺我唔自在

只係擔心食唔哂唔知點算

食飽後終於有戰鬥力

二子玉川有個大商場, 不過就無想像中咁多嘢岩行

如果唔係路經, 其實唔駛專登過來

畢竟東京可以 shopping 的地方有好多

行咗兩個幾鐘, 之後就返涉谷行街

先去 Hikarie, 之後再去行 Loft (呢間真係好大好多嘢行)

行到八點幾九點, 個人開始攰

雖然仲未肚餓, 但都要快快搵食返酒店休息
諗住試吓美登利, 點知勁長龍
行來行去都無乜心水

有諗過試酒店附近嗰間好出名的吉列牛
但又怕唔夠空間食咁多肉

所以最後揀返 東京油組総本店油そば

我一定又係叫錯咗, 嚟到見到好鬼大碗, 有少少嚇親

我好盡力地食最後都係食唔哂

食到好飽之後就返酒店

一人遊的第二天, 都算幾好玩~

2018.04 女子東京一人旅 Day 1 {到著}

2018.4.30 女子東京一人旅 {到著}

話說蝸牛先生五一嗰幾日約咗朋友去布吉渡假

剩低我一個人孤伶伶喺香港

咁我又一直都好想試吓一個人遊日本

於是就趁呢次機會試吓

雖然都掙扎咗一陣

(因為呢段日子機票貴, 而且我三月先同屋企去完福崗, 五月又會同蝸牛先生去首爾)

不過又覺得機會難逄, 於是就去馬

蝸牛先生五月一號先出發

我就四月三十號出發

出發前感冒咗成個月都未好, 都有少少擔心

好彩去到後無嚴重到

貪少便宜的我, 每次都會去平民 Lounge 食碗魚蛋米

今次國泰的早餐好似有改善

唔再係稀到似水嘅粥

機上面都有好多新戲, 睇咗空手道, 都唔錯

落機後一支箭咁行去買 NEX 的車飛

平時明明超多人, 今次竟然唔多人

買完飛又咁岩趕到十分鐘後開出的車

所以今次四點鬆啲就出到市區啦

為咗慳錢, 今次唔住新宿, 揀咗涉谷

涉谷都係一個中心點, 交通方便

不過涉谷站實在太太太多人, 而且最近呢頭又多工程
本身對呢區已經唔熟, 所以經常都感到好迷失

今次揀的酒店喺JR車站上蓋

不過酒店呢邊的出口同大街相距十多分鐘

每次返酒店都幾攰

Hotel Mets Sibuya

Nex 的月台咁岩好近酒店, 扶手電梯上一層就到, 出入機場好方便

但由於行出大街實在太遠, 所以應該唔會再住

不過最近有報導話今年十月涉谷會有新的大型商場落成, 正正就係呢一邊

咁可能到時會好方便

同埋呢邊都有幾多出名的食店, 如 牛かつ もと村 (吉列牛)

房唔會太細, 而且好似上年裝修完, 所以都算新淨

 

放低行李 hea 一陣就出發去食嘢

第一站目標係銀座的拉麵店

由酒店行去銀座線

首先要先經過幾個地盤

再到達大街, 之後再行入商場, 再經指示行上數百級樓梯

真係行到我標哂汗

幾經辛苦終於到達銀座

我唔識睇地圖, 純粹靠 google map 嗰一點帶路

點知行行吓話拍緊戲唔俾行

嗰刻我好徬徨, map 叫我向前行我就唔敢向後行

於是我決定企喺度等!

好彩, 5分鐘唔夠佢哋就攪掂

跟住兜咗好多舍圈先搵到間鋪頭

むぎとオリーブ 銀座店 (tabelog 3.63分)

https://tabelog.com/tokyo/A1301/A130101/13164932/

買完飛就要排隊

太心急, 無乜研究應該點叫

我諗, 我應該order 咗一個大餐

雞蛋, 雞肉加餸 

雞, 蜆soba

啖蜆湯真係超超超好飲, 好鮮甜

雞肉都好滑

不過其實我麻麻哋 soba

食飽之後就行去有樂町 Lumine

無收獲, 之後就轉戰新宿的 Lumine

買咗兩件衫, 行到差不多九點就返去

酒店對面有間Lawson

返前去前去搵吓有無 Godiva x Lawson 新嗰批甜品

嘩, 有大量 (去咁多次都係第一次遇到)

最後好興奮咁買咗咁多嘢上房

成日聽人講日本便利店炸雞好食, 但我又唔覺

先試呢杯, 唔算太甜, 我覺得都幾好食

食到一半已經開始狂咳, 唯有唔再食

抖一陣又食下柑

之後先發現原來我買咗美國柑, 唔係日本柑, 傻仔

房望出去會見到東京鐵塔

第一日咁就完, 都算充實

2017-2108 大阪跨年之旅 {Day7} 回程

2018.01.04 大阪跨年之旅 {Day7} 回程

今日係旅程的最後一日

10點鬆啲就 check out, 之後去搵一間賣髮尾油的鋪頭

喺地下街行咗陣就去北新地搵食

蝸牛先生話唔係行好遠

點知都行咗差不多九個字先到, 好攰

本來想搵壽司店, 不過新年的關係好多鋪頭都仲未開

最後見到間食鰻魚的

於是即刻上 tabelog 望吓, 見佢嘅分數都唔差, 於是就揀佢

長崎県対馬市美津島町 しろや 北新地 (tabelog 3.55分)

同蝸牛先生分別叫咗兩個唔同的 set

兩個 set 的飯煮法係唔同的

我覺得兩款都好食

尤其係佢加湯嗰皇食法

食飽又返去阪急買手信

見到呢度好多人排隊買包

我又唔執輸買咗一個好大嘅包同蛋糕

雖然味道唔係驚為天人, 但都好味嘅

行完阪急又行陣 Tokyo hands

差不多鐘數就出發去機場喇

每次去到機場蝸牛先生都會食一餐先上機

壽司同大阪燒都係佢嘅至愛

七日的大阪之旅完了

雖然今次都有幾多意外, 但都算好玩

如果有機會再玩跨年, 一定會做足準備 book 好餐廳