2017.03.19 廣島 福岡 {Day 2} 向廣島出發
今日我哋會出發去廣島
出發之前, 先去中洲食 pancake 做早餐
首先放低行裝喺博多站嘅 locker
然後就輕鬆出發
Bills 福岡 (Tabelog 3.51分)
想試 Bills 好耐, 不過聽聞東京店排隊排到癲
所以一直都未敢去試
點知出發前俾我發現原來福岡都有分店
我估呢邊應該唔會太多人吧
於是就叫蝸牛先生陪我去
我哋大約十點去到, 嘩....點知都有人龍
最後都差不多排咗半個鐘先入到去
蝸牛先生的熱朱古力
底部有一粒粒朱古力物體, 飲之前要攪勻
佢話好濃味, 好好飲
至於我就叫了一壺熱茶, 無乜特別
香蕉 pancake
pancake 唔算厚, 不過都幾鬆軟
但唔知係我期望過高定點
我又覺得唔算特別好食
而且, 未食完已經覺得有啲漏
眼見隔離嗰 pair 每人一碟, 仲要另加咸點
真係見到都滯
今餐, 食完後我係有少少失望的~
返博多坐 12:45 班火車去廣島
今次我哋買咗呢張 5日券 JR關西&廣島地區鐵路周遊券 (JPY11,000)
由於只可以坐自由席, 出發前有點擔心無位座
不過原來擔心係多餘的
就算呢日係星期日, 但都大把位
大約個半鐘就到達廣島, 都好快
今次我哋住 廣島 Sheraton
咁大個人第一次住呢啲五星級集團嘅酒店
(喺永安 book, 價錢唔算離地, $16xx 一晚)
雖然附近都有啲低價少少嘅酒店
但見唔係太貴, 人一世物一世, 一於試吓
酒店喺車站北口, 一出去轉右就會見到
雖然好近車站, 不過北口呢邊比較荒蕪
而南口會繁榮少少, 似乎住嗰邊比較好
check in 完仍未夠鐘可以上房, 於是我哋放低行李後就出去搵食
行咗去新幹線名店街 (北口)
本來想食廣島燒, 不過超超超長龍
由於已經開始肚餓, 所以都係放棄, 去咗隔離餐廳
酔心 広島 (Tabelog 3.52分)
無乜期望之下, 呢餐都幾好食
食飽就坐電車去原爆遺址
但由北口行去電車站條路都幾難搵
我哋兜咗好大段路先去到
(之後發現原來一定要經地下通道先可以行過去)
千辛萬苦去到電車站, 但又發覺月台一片混亂
好多人, 而且無人排隊, 真係唔多相信自己喺日本
最後都總算上到車, 但車入面超迫~
去到原爆遺址, 睇返啲歷史介紹, 真係好 sad
為咗要結束一場戰爭, 竟然要犧牲咁多人嘅性命
真係好希望以後可以世界和平
之後我哋就行出去市中心, 行咗陣 Praco, 但唔多岩睇
行到咁上下, 蝸牛先生就帶我去食烏冬
鋪頭 20:00 close, 我哋 19:45 分先去到
好彩都趕得切
乃きや 広島 (Tabelog 3.56分)
我揀咗湯烏冬, 好好食呀
烏冬好彈牙, 木魚湯底都好好飲
(可惜當晚我口渴到想死)
蝸牛先生就揀咗撈烏冬, 佢都話好好食
一入到房, 嘩, 好大, 好靚
美中不足係煙味好大 (不過我呢間係吸煙房)
廁所乾濕分離, 我鍾意
不過浴室呢邊嘅地板有水就會變得好滑, 有啲危險
今晚張床好大, 真係打橫打直瞓都無問題
我相信如果間房無咗陣煙味的話, 感覺會更正
瞓之前兩個無聊人喺窗邊望街
見到樓下嘅的士好有秩序咁排隊等客
當第一排的士走哂之後 (即 6,7,8 號)
第二排的士會一齊駛上去第一排, 好得意
望一陣就去沖完瞓覺啦
第二日完~
沒有留言:
發佈留言