2016.09 名古屋 {Day 2} 高山行

2016.09.15 {Day 2} 高山行

今日一大早就要起身 check out, 然後出發去高山

酒店嘅 check out 時間係十點鐘

真係好早~

起身食返尋晚個飯團

凍食又係另一番風味

可能因為肚餓, 我覺得比尋晚仲好食

今日會坐兩點幾嘅火車去高山

有幾個鐘時間喺名古屋行吓街

我哋行咗高島屋同地下街

但因為唔想帶住啲戰利品去高山

所以都係齋行

尋晚廚師話名古屋出名食味百烏冬

於是我哋今日 lunch 就去食鳥冬

山本屋 古屋駅前店の口コミ

Tabelog 3.52 分

日本嘅地下街真係好難行

我哋搵咗一陣先至搵到間鋪頭

一去到已經有幾個人排緊隊

好彩最後都只係排咗十分鐘就入到去

先來前菜

烏冬出場, 全部都係用呢款沙煲上枱, 保證熱辣辣

烏冬的款式唔多, 主要係雞肉, 牛肉同豚

我就揀咗雞肉, 蝸牛先生就揀咗豚肉

一上枱就急不及待先飲啖湯 (我係湯怪)

味噌味好濃, 亦即係幾咸

再食麵, 好有咬口, 亦即係都幾硬

我同蝸牛先生都覺得好失望

估唔到咁多人推介嘅烏冬麵店會咁架

食完, 感覺自己哂咗個 QUOTA....

食完之後去落咗高島屋超市買下午茶上火車食

名古屋名物, 手羽先

可能超市買到嘅係凍, 我同蝸牛先生都覺得無乜特別

可能熱食的話會好啲

Harbs 蛋糕喺日本又係好出名

我哋都係第一次食

勁多生果, 似食果盤多過似食蛋糕

不過味道幾好, 唔會太甜

坐咗兩個幾鐘頭車終於都到高山喇

呢度比我想像中荒蕪

我哋住高山呢間酒店又係好方便

喺正車站對面, 樓下又有便利店

價錢亦只係五, 六百蚊晚

Country Hotel Takayama

呢度要求客人出門時要交返低條 key 去前台

我哋試過交低, 然後返房時去前台拎返

櫃台大叔剩係問我哋咩間房就比返條 key 我哋

感覺可以有人隨便亂拎 key 入房都得, 好唔安全

所以我哋之後都無再放 key 去前台 

來到高山一定要食飛驒牛

我哋揀咗又係好多人推介嘅 味藏天國

(Tabelog 3.59分)

六點未夠就已經要等位

都等咗成四, 五個字先入到去

飛驒牛

牛味唔濃, 油花多

食落有種好油膩嘅感覺

我同蝸牛先生都覺得麻麻哋

好失望啊~

食到最尾先發覺加少少鹽吊味會好食過點醬汁

豚肉

無驚喜

雞肉

無驚喜 x 2

牛肉辣烏冬

個湯底酸辣辣哋, 都幾惹味, 好飲

呢碗烏冬我哋喺香港都食過, 同呢度味道竟然有七, 八成似

不過我覺得香港食到嗰碗濃味啲, 仲好食啲

食完飯先係七點幾, 返上房都係無乜娛樂

於是搵吓附近有乜行

上網比我搵到間 24小時嘅超市

都幾大間

行完超市, 行咗去高山老街嗰邊

有人覺得頭先唔滿足

於是走去搵拉麵食

不過我就已經食唔落

唯有自己先返酒店

喺便利店買咗個青森蘋果

又甜又大個

真係唔明點解日本嘅生果會咁好食

2016.09 名古屋 {Day 1} 到著

2016.09.14 {Day 1} 名古屋 到著



隔咗大半年無去日本, 心情好緊張

可能因為太緊張, 一大早又肚痛

今次去咗翠華食早餐, 麻麻哋

 

排隊 CHECK IN, 傻仔地排咗條連行李 BAR CODE 都要自己 PRINT 嘅隊
點知佢個 Scanner 又唔多 work
攪咗一陣先至成功寄到行李
期間又無職員喺附近
唉....國泰嘅質素真係愈來愈差

飛機準時起飛

由於國泰的飛機餐實在太難食

所以今次蝸牛先生決定轉做水果餐

不過原來都係一樣頹, 得幾舊仔, 有三隻碗仔但又有兩個係吉嘅

我的芝士蕃茄通粉

味道怪怪, 我食咗三份一就無食喇

我決定下次都要水果餐 

三點終於著陸, 拎完行李又肚痛...真係救命~

之後攪掂埋張電話卡, 就去坐電車

今次我哋買呢張, 都幾好收

不過 setup 有啲麻煩

我咃見到售票署就衝去買飛, 買咗普通位

但又走錯咗去特急的月台

好彩仲趕得切....

坐車時有pair 香港情侶坐隔離

咁岩大家都係住同一間酒店, 於是傾咗陣, 落車又一齊搵路去酒店

今次住 名古屋駅前モンブランホテル

JR 站行去大約五分鐘, 旁邊有便利店同藥妝店

五百幾蚊晚算係唔錯

不過張床同個廁所實在太細, 住得唔多舒服

可能揀大啲嘅房會好啲

安頓好之後就出去行吓

行咗去名鐵百貨, 不過唔多岩行

之後去地下百貨買少少嘢食醫肚


雞肝
平時我哋唔食內臟, 但見好多人都會買呢款, 所以照跟
好彩都好食


雞肉丸
以為係魚蛋, 但原來係雞肉, 都幾好味

跟住之後就去車站換 JR Pass {高山 北陸 pass}
呢張 pass JPY13,500
單係高山同名古屋來回就已經要萬幾 YEN
之後再坐埋巴士去白川鄉就已經可以回到本
呢張 PASS 仲可以去大阪, 如果有時間去埋的話, 咁就超抵

換完就出發去食晚餐

我哋今晚 book 咗間食日式傳統料理的餐廳

細細碟, 好精緻.  份量唔算太heavy, 不過我就覺得味道偏咸



 もちづき
Tabelog 3.81 分

 桜通線中村区役所1番出口徒歩7分

日本餐廳習慣一座低要你先點飲品

蝸牛先生就揀咗呢支清酒

佢話幾好飲

前菜

土瓶蒸
入面有雞肉, 白果.....
啖湯真係好好飲, 清得嚟味道又唔會好淡
全晚至愛

刺身

燒魚
類似鱔的物體, 都幾好味

薯絲
有點似中國的土豆絲

錦盒
每樣細細件, 可以試到好多款式
呢盒嘢都幾好味
特別係所有的豆製食品, 全部都好有香的豆味

魚蛋

燒牛肉
估唔到配埋麵豉醬一齊食味道又幾夾幾特別

海膽鮑魚飯
份量好足料, 入面有好多海膽同鮑魚
不過食完一碗後已經食唔落
廚師好好, 佢問我哋會唔會拎走, 佢可以將佢變成飯團
就係咁, 我哋第二日的早餐有著落喇

甜品

呢餐飯雖然無叮一餐咁好食
但味道都算唔錯

食完飯就返酒店啦...
今日舟車勞頓都幾攰

第一晚....生保床再加上張床太細.....唔係幾瞓得著......

2016.08 東來順

我同蝸牛先生都好鍾意 [東來順]

銅鑼灣開咗分店後就更加方便我哋

之前收到 EMAIL 話銅鑼灣分店的夏日套餐做緊特價

最平連埋加一大約$300 一位就有交易, 相當抵食

而我哋今晚呢個就 $300/位 再加一

先來小食併盤: 燻蛋/陳醋海蜇頭/水晶羊肉/四喜烤麩

燻蛋超級好食, 最鍾意佢嗰陣燻過的味道

陳醋海蜇頭口感好特別, 好似JELLY

四喜烤麩都好食, 不過就普普通通

椒鹽小黃魚

感覺好有媽媽的味道, 可能係我媽平時都鍾意煎呢款魚

豆腐羹

味道比較清淡, 唔會覺得好味精

油醬年糕燒六月黃

蟹仔細細, 不過好多膏

年糕再配埋個汁, 好正

蕃茄百頁煮勝瓜

湯底我覺得係魚湯, 好好飲

百頁, 勝瓜連湯一齊食好好味

京式炸醬麵

炸醬有少少似麵豉醬, 再加埋青瓜, 醋撈埋一齊食又幾得意

最初食會覺得唔夠味, 不過食食吓又覺得OK

甜品: 驢打滾/碗豆黃

驢打滾似糯米滋, 係呢度的名物之一, 我同蝸牛先生都幾鍾意

碗豆黃應該係用黃豆整成的, 我就覺得麻麻

平日的晚上, 吉枱好多

我估因為咁所以呢邊會推出特價套餐 

臨走時見到佢嘅午市套餐只係$98/位

以為平日先有, 但職員話一至日都有

於是今個星期日我哋又再試埋個 LUNCH

之前來食 LUNCH , 主要都係食點心

今次見佢個LUNCH SET 咁抵食

於是就叫個 SET 試吓

前菜: 木耳/醉雞/四喜烤麩

炒手擀麵

味道唔錯, 不過我就覺得略為油咗少少

擔擔麵

我好鍾意, 因為佢嘅花生味唔重

唔太辣, 但又有種麻椒的味道

食完唔會有種好漏的感覺

每人仲有兩隻雞肉小籠包 (唔記得影)

不過我就覺得平時食的豬肉小籠包好食啲

碗豆黃

呢個餐 $98/位 (仲要唔收加一!!!!)

地點係銅鑼灣 MIDTOWN

好味, 坐得舒服, 服務又好, 真係好超值!!!!

2016.8 雜煮

最近雖然懶寫BLOG

不過都有煮吓新菜式

有一日忽然興起想食焗豬扒飯

於是夜晚就煮咗

記得之前都煮過一次, 但就唔太成功

今次煮出來都似樣, 但就唔夠汁

下次一定會再試

[焗豬扒飯]

隔咗好耐無玩包, 呢次整的過程好"呢HEA"

因為技術上問題, 等完第一次酵見佢唔漲先發現原來未落酵母

之後好格硬地將啲酵母搓返入個麵團度

好彩最後都發得起, 有驚無險

(不過發得唔係咁好)

[餐肉包]

有晚放工後打大風, 放工急急腳去買糧, 之後就返屋企整包

喺SOGO 買咗隻日本腸, 好好食

今次都有意外, 忘記了二發, 所以包包唔夠鬆軟

第一次整呢隻型嘅包, 包得好樣衰

[腸仔包]

最近心情唔多好

今個月媽媽入咗兩次醫院

雖然只係腸胃不適, 但感覺到佢嘅身體狀況已經大不如前

我幫唔到佢啲乜

唯有多啲陪吓佢, 有時間就同佢傾吓電話

比多啲正能量佢

2016.07 雜

好耐無 update 過個 blog, 希望可以開始 update 返多啲, 好好記低我同蝸牛先生的生活

不過, 我哋嘅生活其實都離不開食, 同食, 同食...

有日去九龍城食泰菜, 食完之後有人又要食雪糕

九龍城真係唔岩夏天去, 周圍都無瓦遮頭, 簡直熱到溶咗

上星期同蝸牛先生去睇 <寒戰2>

我覺得都幾緊張幾好睇丫

不過郭富城同發哥就真係老咗好多

諗諗吓, 其實自己都開始好老喇
真係時光飛逝

睇戲之前去咗 <西苑> 飲茶

都幾好食, 我覺得佢好味過<利苑>
不過服務就麻麻

又要開始認真計劃九月的名古屋之旅
其實大約行程已經諗好
不過就未諗哂要食乜同埋要 BOOK 位
 

今次出發之前, 我一定會溫吓啲日文
話哂都學咗半年, 去到一定要試吓講