2013.03 - 東京小旅行 {Day 4} 世外桃源 - 箱根吟遊

2013.03.18 Day 4 新宿 >> 箱根湯本 >> 強羅 >> 宮之下 >> 箱根吟遊

玩了幾日市區, 今日轉移到郊外 - 箱根

叮噹都同我地一樣, 去左箱根~heehe
唔駛同人迫, 可以慢慢影影


新宿 >> 湯本箱根使用車票: 箱根周遊券 (2 DAYS PASS - 5,000 YEN/位)
- 包新宿至箱根來回車票, 任坐登山纜車, 電車, 海賊觀光船及指定巴士等交通工具

我們訂了十點鐘的車出發
在車站附近麵包店買了一個包做早餐
(又話日本麵包好好食0既?! 但我呢個凍又唔好食)

我地坐的是浪漫特快列車

比起普通的急行列車快大約半個鐘
就算買了箱根周遊券 都要額外加 870 yen (每程)

某種型號的列車仲附設展望席(如下)
遊客可於出發前一個月send email 訂位

不過, 第一行超搶手, 我地只訂到第四行....(失望!!)

專登唔食咁多早餐, 就係為了呢個火車便當 (1,000 yen), 造型可愛, 味道正常


hehee...前一日買了新鞋, 第二日即著


大約個半鐘的車程就到達箱根湯本
一出車站已經覺得超大風, 有點凍
先在車站附近逛逛, 有人好快手就買了一包小吃


再行去附近的河邊, 見到有幾棵櫻花樹, 超興奮!!!


之後就周圍行下影下相, 再之後就係手信街
見到好多人排隊買燒餅, 我地又唔執輸
不過味道普通咋

又見到有墨魚波波
呢個大粒又好味

之後就坐登山電車出發去強羅
箱根湯本 >> 強羅 (around 30 mins)

到達強羅, 第一件事就係搵食
沿途被一間標榜鹿兒島黑豚的小店吸引住
加上當時等緊位的日本叔叔同我地講 "Famous"
於是我倆就即刻決定留0係度等
在寒風中等了差不多十幾分鐘先有位
一路等一路都好期待

入面得幾個餐, 但全日文, 跟蝸牛先生各自點了最貴的一款 (2,9XX yen/set)
份量都幾大, 不過, 豬扒好"un" !! 其中有一件又鞋又無味, 感覺似食緊湯渣, 勁失望呀!!!
好彩, 佢的蜆肉麵豉湯又幾好飲
算係有返 d 安慰~

離開食店行0左去附近的強羅公園
用周遊券可以免費入場
不過可能唔岩季節, 公園入面的花全部都係枯的, 無0野好睇
所以我地好快就離開

強羅 >> 宮之下我地住的溫泉酒店在宮之下為了可以用盡房入面的私人風呂, 所以我們計劃四點就check in
爭取飯前飯後都可以浸一次溫泉

到達宮之下才三點
所以我們先在附近亂逛
一出車站就見到通往各大旅館的指示圖

之後又搵到一間接近荒廢的神社

差不多時間就去酒店 check in (時間岩岩好, 呢個時候開始落雨了~)
今晚入住的溫泉酒店 - 箱根吟遊 係成個旅程中其中一個好期待的項目


等待Check in 的 area, 好靚, 好舒服 (心情開始興奮)

welcome drink and 小點心

我地入住的 Tsuki type guest room
呢個房形係最貴的, 本來並不打算咁豪, 不過較平的房已經 FULL 哂
所以最後抱住 "人一世物一世" 的心態, BOOK 0左呢間
好彩最後都無後悔, 因為間房實在太正!!!

飯廳

室內風呂

浴室 - 入面設備超齊備, 洗面, 面霜, HANDCREAM 樣樣都有

重頭戲 - 露天個人風呂
超靚, 超 RELAX....一生人之中可以住一次咁靚0既屋, 真係不枉此生, 今次真係一次好好的體驗呀!!!
結果呢一晚, 有人前後來來回回浸左好多次, 好嘆~

夜晚就在房內享受懷石料理 (menu 係手寫架)

每樣菜都好精緻, 好特別, 好味~
不過, 食到尾聲其實已經好飽 (我直頭成碗飯無掂過!!!)


訂酒店時有提及我地係來慶祝周年紀念的
最後酒店亦送了一對筷子同兩杯 DRINKs 作為禮物
雖然唔係d 咩貴重0野, 但好有紀念價值~ 我鍾意

食飽飯, 休息一個鐘又去泡溫泉
呢 d 生活真係好嘆

今次的體驗, 令我地深深愛上了入住溫泉酒店
睇怕下次有機會....都會想揀返類似的酒店, 好好享受下

~ 第四日完 ~

2013.03 - 東京小旅行 {Day 3} 忙裡偷閒 - High tea @ Bvlgari Cafe

2013.03.17 Day 3 新宿 >> 原宿 >> 表參道 >> 涉谷

今日應該是整個旅程最遲起床的一天 (亦係唯一的一天)
食 LUNCH 前先去小田急服務櫃檯買箱根車飛, 之後再到 JR 櫃檯買輕井澤車飛

之後就出發吃烏冬
揀0左旅遊書都有介紹的 東京麵通團
東京都新宿区, 西新宿7-9-15, ダイカンプラザ, ビジネス清田ビル１Ｆ

一入店就要揀烏冬
有冷有熱, 大約有十幾款, 而 size 亦有大有細
之後行入 d 就有一個類似食buffet 放食物的地方, 有多款天婦羅任君選擇, 旁邊亦有少量關東煮
揀好哂之後就去收銀機結賬

(而加先發現, 竟然無影到主角: 烏冬)

因為天婦羅都放在出面任揀
所以好多已經放涼了
我就不太愛凍了的天婦羅, 反而烏冬就真係幾滑幾彈牙

食飽飽就出發去原宿, 今日主題係 shopping & shopping

撘車路線: 新宿 >> 明治神宮前

第一次撘副都心線其實都唔算好方便, 感覺上要行好多路

新宿 >> 明治神宮前
沒有特定的目標, 四處亂逛, 有商場就入
行攰了就去 high tea
今次去了 Bvlgari Cafe
MENU 同餐具都好高級, 好有貴氣

我是為了呢個 TEA BOX 而來的
我覺得迷李漢堡最好味, 其他的則普普通通

蝸牛先生的評語: 普通無特別

環境幾舒服, 不過服務就怪怪的
一開始就話室內無位, 叫我地坐室外 (難道我倆著得太爛?!), 但當我地堅持要室內的時候, 佢就話岩岩有兩個位
入到去, 其實見到有兩張枱都無人坐的 (其中一張直到我地走都無人坐!!!)
呢度的甜品唔算突出, 服務又怪怪, 只係勝在環境舒服

埋單: 4XXX yen, 唔多值

休息完又再出去併過
今日蝸牛先生有好多收獲, 我都好似買了一件外套

入夜後的原宿

離開表參道, 原宿, 我地再行落涉谷
今次到我一口氣買了兩對鞋
之後就一直逛到晚飯時間

今晚沒有計劃用餐地點
一心只想找居酒屋
最後見到之前網上有人評論過的 東方見聞錄
於是就走入去試

全自助形式
有中文MENU, 自己在電腦落單

呢餐唔算太貴
不過味道就好麻麻
唔知點解當時覺得點得太多 (仲攪到要CANCEL 一個鍋)
但而加睇返其實又得好少

食完就坐車返酒店了
今日又係攰爆

~第三日完~

2013.03 - 東京小旅行 {Day 2} 收復失地 - 驚喜的晚餐

2013.03.16 築地 >> 銀座 >> 東京站 >> 人形町站 (晚餐)
去築地食壽司是蝸牛先生今次旅程的重頭項目之一
但時間太早, 所以佢自己先出發, 我後 join..hehee...

佢揀了人龍壽司店 - 大和排了差不多 45 mins 就有得食, 並無想像中咁耐
佢 order 了壽司 set
由於我未去到, 所以只能靠蝸牛先生報告
蝸牛先生: 味道唔算太突出, 不過舊飯幾好食, 魚生都幾新鮮, 同埋唔點豉油會好D
佢食完我都差不多去到築地
之後就一齊行下出面的乾貨區 (亦順便比機會蝸牛先生消化下, 陣間再陪我食過)
我以前對於出面的乾貨區無乜特別興趣
但自從做了煮飯婆之後, 就開始對於各種的食材好有興趣
場外見到好多鰹魚粉, 冬菇, 元貝, 樣樣都想買
不過, 今日仲有好多路要行....唯有忍痛唔買

行完之後就到我去食壽司
揀了之前食過的 - 喜代村

由於蝸牛先生才剛吃完, 而我一早又不能吃太多魚生
所以 order 得不多
池魚放上枱時魚尾還在震, 不過又覺得無上次食到的咁爽脆
而其他壽司就好新鮮
離開壽司店又繼續逛
有人見到街邊的串燒檔又食慾大增

蝸牛先生: 比起尋晚米芝連一星店的串燒, 呢串仲好味!!!


離開築地就步行過銀座
n 年前第一次跟團遊日來過一次
由於呢度賣的都是高檔貨, 所以一直都無意欲再來
今次再來, 完全是因為呢度有想吃的甜品店

在銀座逛了百貨公司, Burberry..行了幾個鐘都無收獲 (我今次入貨好謹慎)
等肚裡的壽司消化了終於可以去食甜品

今日的目標店: Mikimoto Lounge
東京都中央区銀座2-4-12 ３階 ミキモトラウンジ

Mikimoto 其實係出名賣珍珠的, 香港 Time square 都有分店
不過我對珍珠興趣不大, 所以一去到就直上 3/F CAFE

入面的環境好舒服, service 好好, 每個侍應都充滿笑容

我點的是櫻花主題蛋糕, 好靚, 雖然味道都幾好, 但就無傳說中講到咁好味

蝸牛先生的布丁, 佢的評論係...無乜特別!!!

每次來東京總係趕頭趕命的 shopping, shopping & shopping
無試過可以咁優閒在 cafe 嘆甜品
其實放慢腳步去感受一下人地國家的生活都幾嘆丫

離開甜品店又在附近閒逛
行下行下又覺肚餓
途經一間人龍 waffle 店 Manneken
有人又唔執輸排埋一份


而我今早的壽司亦已消化得七七八八
隨意在附近找了一間天婦羅快餐店
兩個人SHARE 一碗飯
印象中呢碗飯只係五, 六百 YEN, 但絕對有誠意, 好抵食

之後就去買我第一樣戰利品, A Bathing Ape x Porter backpack

因為今晚會去人形町站食飯 (離銀座不遠)
所以只能繼續在呢區閒遊
最後遊到有樂町 LUMINE 又入去行一陣
之後行下行下又去到東京站地下街 (其實當時已經超攰, 無乜心機再行)
最後時間差不多終於可以出發去食飯

乘車路線: 東京站 >> 秋菜原站 >> 人形町站

人形町今半

東京都中央区日本橋人形町2-9-12, 地下鉄人形町駅徒歩1分(可網上預約)


其實在新宿高島屋有分店, 不過有人堅持要去本店, 所以就老遠跑來呢個渺無人煙的人形町站不過本店較有日本特色, 入面的裝修格局全部都好和式, 而且全程仲有著和服的侍應招呼 (招呼仲好好添), 都算係一次幾好的體驗

我們分別點了兩 set Sukiyaki, 揀了第二貴同最平的牛
(大家看得出左同右的分別嗎?!)
兩款牛都有入口即溶的感覺, 好令人感動
貴牛就比較滑 (但我覺得平牛已經好好味啦)

今餐終於可以收復尋晚的失地
超好味, 超滿足!!!
絕對值得推介比來東京的朋友

埋單: 19xxx yen

食飽就返酒店

飯後生果 - 又甜又多汁的日本士多啤梨

~ 第二天完 ~

2013.03 - 東京小旅行 {Day 1} 著陸 - 失望的晚餐

2013.03.15 Day 1 香港 >> 東京成田 >> 銀座 出發朝早....可能心情太緊張, 竟然肚痛!! 好彩去完一次廁所就無事.
10:30 機, 我們 7:15 出發, CHECK IN 後先去 大家樂 醫肚, 食完 HEA 一陣就上機

今次坐 JAL, 新款機, 座位好闊落, 完全唔覺得迫, 好 GOOD 呀!!
空姐好 nice, check-in 地勤都好有笑容, 比起國泰, 感覺好好多~
飛機餐都好靚, 而且仲有哈根大c 雪糕, 只可惜, 個餐的味道麻麻 (但總好過國泰要食魚香茄子飯丫, 好無 feel)

今次係我第二次坐JAL , 第一次無乜特別感覺, 但今次覺得幾 good, 下次遊日或者都會揀返佢
唯一美中不足的是機上電影院入面太少戲

蝸牛先生的蛋包飯...麻麻地

我的三文魚飯....無味的

四小時後, 終於著陸...一下機已感到有少少的涼意..不過心情開始興奮 (而加諗返都好掛住日本呀!!)

今次離開機場前有兩個任務要做:
1) 先去 3/F 的 POST OFFICE (Terminal 2) 拎上網咭.
我跟蝸牛先生一人一張, 方便聯絡

最近幾次旅行都有買當地的上網咭, 因為可以即時上網搵地圖實在好方便
我買的是 Bmobile visitor sim 1GB prepaid, 限期是 14 天 (Android 同 Iphone 都岩用)
出發前預先上網訂定, 之後到機場的 post office 拎咭就可以 (亦有得揀直接寄去酒店的)
九日的旅程, 上網, facebook, whatapp 都用唔夠 500 MB, 所以 1GB 係絕對夠用的

PRICE: JPY3,980 (機場 PICK UP: additional charge JPY 210)

入面有足夠的 INSTRUCTION 教你點 SET

其實另一方法係租 POCKET WIFI, 兩人 SHARE 一隻蛋, 平好多
不過考慮到可能會分開行, 所以POCKET WIFI 就無咁岩用
另外, 出面亦有公司出租BMobile 的上網 SIM CARD , 最平三,四十蚊 一日都已經有交易
上次遊日我就幫襯了 JP RENTAL , 服務都OK

今次發現, 用呢張咭最好係用 IPHONE
在同一地點, 我跟蝸牛先生各自用電話上FACEBOOK, 我的三星NOTE2 load 了十年, 但蝸牛先生的IPHONE 一早已經 load 到 (不過, 呢張咭暫時未支援 IPHONE 5)

雖然 B MOBILE 的上網速度唔算好快, 但勝在覆蓋範圍高, 都算係遊日上網咭的好選擇

2) 買火車 PASS
今次買了單程的 NEX & SUICA 同JR KANTO AREA PASS
之後會講下 JR KANTO AREA PASS 的用法

攪掂哂後就坐 NEX 到新宿, GOGOGO!!! (月台好凍呀!)

今次下榻 Sunroute Plaza Shinjuku
(JR 南口, 步行 5 MINS)

BOOK 了 TWINS ROOM, 貪多張床放0野同間房大D

其實已經第三次住呢間, 但記錯出口, 所以兜了好大段路先去到酒店
去到酒店已經六點幾, 休息一陣就要即刻出發去銀座食串燒
BOOK 了七點, 我倆差不多八點先去到, 好失禮!

BIRDLAND
一間專食雞肉串燒的餐廳, 得過米芝蓮一星
香港的米芝蓮餐廳就試得多, 但外地的則是第一次
我們叫了一個SET, 另外的就散叫
不過可能期望太大, 所以失望亦大

頭盤: 雞肝多士 (個人覺得無乜特別)

豆腐, 都幾滑同幾有豆味

網上的食評講到呢度天花龍鳳, 就連燒白果都話好食到爆 (恕我膚淺, 我覺得佢只係一粒普通的白果, 無乜特別, 亦唔覺得好味)
呢度有日文 OR 英文 MENU, 但有D 部位名稱太專業, 所以其實都唔太知自己食緊乜. 當中覺得最好味的係雞肉丸串
由於味道亦唔算太突出, 所以我地只係食0左好少, 寧願留返個 QUOTA 出去再食過

跟SET 仲有親子井同雞湯一碗, 不過都係普通貨色


最後呢餐埋單要九千幾 YEN, 但完全唔飽加無滿足感 (心靈上)
來到日本的第一餐就食唔飽, 好令人沮喪呀!!!

之後懷住失望的心情加未填飽的肚返新宿
返酒店途中見到 MYLORD 未 CLOSE
決定上去再搵食

不過, 上面的食店無乜特別
於是揀了穩陣之選的 <山頭火>


每人叫了一碗迷李拉麵
終於醫飽了肚, 但略嫌味道無驚喜, 跟香港食到的是一樣的


食飽再行一陣FOOD COURT, 之後兩個人就攰爆咁返酒店

~第一日完~

2013.03 東京小旅行 {序}

九日八夜的東京小旅行已經完滿結束
不過暫時仲未有時間出 blog
希望今晚可以腾出一點點的時間先寫一感想篇

旅行當晚已即時記低當日的行程
所以, 應該夠資料寫一個詳細的遊記
如果可以, 希望趁復活假完成

今次又影了超多的相
一定會post 多d 上來

2013.03 東京小旅行 {預備}

2013 東京小旅行即將出發 ( 2013.3.15 to 2013.3.23)
心情開始興奮

當年的 honeymoon 因為 311 而泡湯
今年決定重新出發

呢次旅行都算幾豪華
有兩晚溫泉酒店 同 三餐已預訂的晚餐
希望今次食, 住都開心

希望返來可以寫返個 detail 的遊記
因為今次做0左好多功課
好想可以好好記低

TOKYO, WE ARE COMING~!!!