2020年1月2日星期四

2019.09 東京藍帶畢業旅行 {Day 7} 最後倒數

 2019.09.27 東京藍帶畢業旅行 {Day 7} 最後倒數

三個月嘅學藝生活聽日就要結束
明明呢幾個月覺得自己好克制
但到頭來發現兩大一小嘅喼都放唔哂啲嘢 (仲未計有啲嘢我忍痛無帶走)
所以今日要先去郵局一趟, 將一啲唔等洗嘅嘢寄返香港

最後寄在兩箱約 20kg 重 
為咗慳錢, 我揀咗寄船, 一個月後到港
共花費 8,400 yen

寄完行李, 返屋企整理多少少就出去食 lunch
今日無 plan 食乜
上網搵咗間喺代官山嘅炸豬扒店, 都幾高分, 於是決定去試吓

ぽん太 (Tabelog: 3.75分)
 見今日無乜行程, 於是決定由屋企 (惠比壽) 行過去
腳程大約30 mins
行到去門口先發現原來咁樣行都可以通去我學校
估唔到去到旅程嘅最後兩日先發現 (哈哈)
(然而我都係第二個月先識得點樣由屋企行返學校)

講返間豬扒店
店仔細細, 呢日唔算多客人
入面只有兩個店員, 其中一個老婆婆望落似8, 90 歲
佢手震震拎茶俾我哋時真係好想幫吓佢
 order 完我哋等咗九個字至一個鐘先有得食, 好耐

諗住都算高分, 質素應該有返咁上下
點知食落普普通通, 失望, 覺得哂咗 quota

食完我哋向返惠比壽方向行, 沿途有啲賣衫嘅小鋪好似唔錯
(哭, 點解我喺尾二嘅一日先發現)
之後我哋再去咗間甜品鋪買咗啲甜點

無同啲蛋糕整大合照, 甜點嘅味道都唔錯

諗住今日去吓新地方, 諗起之前有人介紹過清澄白河呢個地方
見車程唔算太遠, 於是同蝸牛先生決定去行吓

我哋呢啲老人家都幾鍾意睇吓花賞吓草
見到呢度有個清澄庭園好似幾靚
於是過來睇吓

呢度都幾大幾靜, 有山有水, 不過花種就唔算多
如果想一個人靜靜地諗吓嘢呢度都幾舒服嘅

坐低食吓頭先買嘅小蛋糕
留學三個月, 我學識咗食呢件嘢 (canelé) 
當時係同學介紹, 跟住就一食愛上
我鍾意佢外面脆入面煙煙韌韌嘅感覺
喺日本幾乎我一見到就買
暫時覺得最好食係 Joel Robuchon

喺公園 hea 完就行返出去, 點知發現無乜嘢行
先唔講呢度人影都唔多隻, 就連鋪頭都唔多
但就好多呢D 布公仔 (明明當時只係九月尾, 又未到萬聖節)

諗住入去呢間地標嘆返杯咖啡, 點知推撞岩裝修唔開, 可惜~

見無乜嘢行, 所以都決定離開走人
之後我哋去咗日本橋站行高島屋
行吓行吓又覺攰, 搵咗間餐廳坐低休息

夜晚約咗朋友一齊食蟹
(店名後補)

喺日本食蟹, 我依然係覺得蟹道樂係最抵同最好味的
呢餐我覺得麻麻哋






蝸牛先生同朋友都覺得唔飽, 於是決定落池袋食無敵家
我食唔落所以就決定自己返屋企先
我一早都預計到無敵家唔會係蝸牛先生杯茶
最後如我所料, 佢返來都話麻麻哋 (但佢哋嗰晚都排咗成半個鐘以上)

今晚係東京嘅最後一晚, 真係有啲唔捨得

2 則留言:

  1. 去庭園賞花食cake好文青啊🤣🤣
    其實你最後知唔知點解周圍都係嗰d血腥公仔呢?
    btw, happy new year!

    回覆刪除
    回覆
    1. Happy new year!!
      我其實係一個文青少女,HAHAHAHAHAHA...
      最後都唔知咩事條街咁多呢D 公仔,又唔係靚, 唔知咩事.

      刪除